A.N.M. se venne ’e viecchie ‘trammuè’ napulitane

Ê 31 d’uttombre 2019 ascette ’ncopp’ô giurnale “napoli” n’articulo d’ ’o mio ’ntitulato: “Atan…a mmo”, addò facevo nu pucurillo ’e storia, accummincianno d’ ’o 1876, quanno ’o belga Edouard Otlet funnaje ’a Satn (Société Anonyme des Tramways Napolitains). ’E primme tramme napulitane (chiammate pure ‘trammuasse” ’a ll’ingrese ‘tramways’) jevano d’ ’a Turretta ô Chiatamone e tturnavano arreto. Doppo ’o 1918 passajeno ’mmano ô Cummune ’e Napule e ô 1929 ’a Succità d’ ’e tramme (Atcn) teneva già 39 linee cetatìne, 10 ’e fore-cetà e 2 speciàle, pe gghì ’Agnano. Fuje dopp’ ’o siconno dopoguerra, cu ll’Atan, ca ’e traspuorte pubblece accumminciajeno a ffa’ a mmeno d’ ’e viecchie tramme ’ncopp’ê rrotaje, rimpiazzannole cu nu cuofeno d’autobbusse e ffilobbusse. Fuje accussì ca tanno Napule perdette… chillu tramme, lassannoce sulo ’a memoria fotografeca ’e sti vvetture verdocene, cu ’e scugnizze appise addereto comm’a scigne.

Pecché mo torno a pparlà ’e ’sti fatte? ’O mutivo è ca ’e giurnale purtajeno ’a nutizzia ca l’Anm (Azienda Mobilità Napoli, participata ô 100% d’ ’o Cummune ’e Napule) decidette ’e se vennere ’e tramme ’e ll’anne ’30 a nnu prezzo base pe cchille che ffunzionano ’e 3.780 euro, mentre chille ‘fora uso’ stanno 2.800 euro. Na nutizzia pesante pecché, si guardammo ’ncopp’a nu sito specializzato, pe ’sti priezze ce putimmo accattà na ‘Corsa’ o na ‘Panda’ che ttene 11 anne, no nu tramme storeco napulitano, luongo 13 metre e ppesante 14 tunnellate… Si po’ calculammo ca se pava una tunnellata ’e fierro viecchio 200 euro, pe 2.800 euro ce stammo vennenno nu tramme storeco d’ ’a Cità comme na ruttamma! ’Sta decisione è stata critecata d’ ’0 Presidente d’ ’a Cummissione Mubiletà d’ ’o Cummune, Nino Simeone e ’nce so’ state pure ati cummente, p’arricurdà comme tutte ’e ccità ’mpurtante – ’a Milano a Lisbona, ’a San Francisco a Praga, ’a Hong Kong a Rio de Janeiro – ausano e vvalorizzano ’e viecchie tramme comme memmoria storeca e attrazzione p’ ’e turiste.

Però comme stanno overamente ’e ccose? Nun fa piacere sapé ca ’mméce Napule s’ ’e vvo’ vennere, e ppure a ccosto ’e fierre viecchie. ’Nfatte, chille ‘trammuasse’ putarriano essere ausate comme ‘bibliobus’ (addò se pônno leggere e rretirà libbre), sale d’esposizzione pe ll’opere d’arte o pure – comme prupone Gaetano Bonelli, criatore e animatore d’ ’o ‘Museo ’e Napule’ a Materdei – p’appresentà e ffa’ circulà mostre, ammacaro ’ncopp’a storia d’ ’e traspuorte pubblece a Nnapule. Certamente nun s’ha dda sperdere sciauratamente nu patremmonio ’e storia ‘materiale’ e s’ha dda fa’ cchiù attenzione ô ppassato, pecché ’o futuro sia cchiù ddegno e ccummeniente a na Cità che ttene migliara d’anne e rrummane ’a terza ’e ll’Italia pe ’mpurtanza. Però sarria nnecessario pure ca ’o Cummune – si nun vo’ fa’ brutte figure – nun facesse circulà nutizzie sballate. Pe cchesto aggio cercato nutizzie cchiù ccumplete e pprecise a ll’Assessore cumpetente p’ ’e traspuorte, Marco Gaudini.
’A situazzione, isso m’ha spiecato, è bbastantamente diverza. ’E viecchie tramme napulitane, ausate primma d’ ’a siconna guerra, songo 26 e 15 ’e lloro so’ state pure accunciate e ffunzionano ancora, ma sulo nu paro pônno essere cunsiderate vetture ‘storeche’ urigginale, pe vvia ca so’ state pure restaurate a mmestiere. Ll’ati 11 viecchie ‘trammuè’ nun pônno cchiù circulà e ppure a ll’interno s’avarrian’ ’a accuncià. Sulamente 5 o 6 ’e lloro so’ cchille che ll’Anm vo’ vennere a assuciazzione e ssuccietà, pe nn’utilizzo culturale, suciale o cummerciale, mentre ll’ati s’hanno sulo ’a rottamà. Sperammo ca l’Amministrazzione Cummunale truvarrà na manera pe vvalorizzà overamente ’sti piezze d’ ’a storia ’e Napule. So’ anne ca Gaetano Bonelli va pruponenno ’e ll’impiegà pure pe cce mettere na bella mostra che cconta cchiù ’e nu seculo ’e traspuorte pubblece. Pirciò, vedimmo ’e nun perdere pure…chistu tramme!