Fa na certa ’mpressione scuprì quanto cuntava na vota Napule e ’o regno sujo, pure for’a ll’Italia
Po’ essere ca quaccuno ’o ssapeva già, però fa na certa ’mpressione scuprì quanto cuntava na vota Napule e ’o regno sujo, pure for’a ll’Italia. Ogge, nuje napulitane canuscimmo l’Ucraina e ’a pupulazzione soja quase sulamente pe mmezza ca tenimmo na cummunità ’e faticature ucraine grossa assaje. ’E statistiche d’ ’o 2019, ’nfatte, ce fanno sapé ca sulo a Napule cità se cuntavano 8.755 ucraine. Int’a ttuttaquanta ’a cità metropoletana se nne cuntavano 23.337 (’o 10% ’e tuttequante ll’ucraine d’Italia), specialmente a Ggiugliano (1.149), Somma V. (488), Marigliano (419) e Acerra (415). ’Nzomma, si ll’ucraine che stanno mo â pruvincia ’e Napule se mettessero assieme, putessero furmà nu cummune cu ’a pupulazzione d’Ottaviano… Ma comm’è ca Napule è addeventata accussì…ucraina? Liggenno ’a storia d’ ’a cità cchiù ’mpurtante d’ ’o sud ’e chillu Paese capimmo comm’è ppotuto succedere ’stu fatto bastantemente streuzo. Mo a Odessa, affacciata ’ncopp’ô Mar Nero, àbbetano nu melione ’e perzone, proprio comm’a Nnapule. Comm’a Nnapule, Odessa è na cità turisteca cu no puorto e, addereto, na filera ’e culline. Però accà fernesceno ’e ssumiglianze, pecché stammo 1.500 chilometre a nnord-est luntano ’a Napule, addò ’o clima, pure si temperato, è assaje cchiù friddo. “E allora…?” – vene ’a dicere, citanno a na canzona d’Ernesto Murolo – che ce azzecca Napule cu Odessa?
Embé, anticamente, primma ’e chesta cità, lloco steva na culonia greca (Tyras), che ddoppo fuje abbetata d’ ’e Tatare e cagnaje nomme (Haçi-Bey) e a ll’Ottomane (addeventanno Yeni Dűnya). Quanno ô XVIII seculo ’e Turche perdettero a guerra cu ’e Russe, ô 1784 ’sta cità furtifecata passaje a ll’impero d’ ’a Zarìna Catarina ’a Granne e ssulo tanno fuje chiammata Odessa (Одесса). Chello che nnu’ ssapeno tuttequante è cca â nasceta ’e ’sta cità dette nu bbellu cuntributo nu signore napulitano che se chiammava Giuseppe de Ribas. Overamente ’e nomme faceva Josè Pascual Domingo de Ribas y Boyons (1749 – 1800), figlio a nu nobbele spagnuolo. A 16 anne trasette int’a ll’esercito burboneco, addeventanno maggiore a 20 anne. N’amico d’ ’o sujo, ’o conte russo Orlov s’ ’o purtaje appriesso â corte russa e accussì Giuseppe participaje pure â guerra contr’ê Turche. Amico d’ ’o putente princepe Grigorji Potëmkin (cumpare ’e ll’imperatrice Catarina…), ’o culunnello Josif Michajlovič Deribas participaje pure â guerra ’e Crimea. Pare ca fuje isso propio che vvulette da’ ’o nomme Odesso a ’sta cità (p’arricurdà na culonia greca chiammata Odessos), però ’a zarina lle cagnaje ’o nomme ô femmenile… Nun sapimmo si jette propetamente accussì. Sapimmo sulo ca Josè-Giuseppe-Josif De Ribas murette doppo 16 anne – abbelenato ’a chi steva urganizzanno na cuspirazzione contr’ô Zar Paulo – e ffuje atterato ô campusanto germanese ’e Pietrobburgo.
Nu libbro ’e storia che pparla d’ ’a vecchia Odessa (“Staraja Odessa”) fuje pubblecato ô 1913 ‘nlengua russa a nu descennente d’ ’o sujo, Aleksandr Deribas. Chello che cconta overamente è cca doppo 66 anne, ô 1950, a Odessa ce steva ggià na culonia ’e 3000 perzone che vvenevano d’ ’o Regno d’ ’e Dduje Sicilie. N’atu napulitano, Francesco Boffo (1790-1867), architetto capo pe 40 anne, facette addiventà Odesa (ll’Ucraine ’a chiammano accussì) nu museo apierto, cu cchiù ’e 30 palazze neoclassiche e ’a famosa ‘Scalinata Potëmkin’, (s’, propeto chella d’ ’a curazzata russa chiammata comm’ô princepe, che ddette nomme ô film ’e Ėjzenštejn…) Odes(s)a è stata gemellata cu Ggenova, però ’a cità che lle ddette ’e cchiù è Nnapule, e pperzì ’o stennardo sujo – russo e ggiallo – arrassumiglia a cchello napulitano.
’O fatto cchiù ’mpurtante, cumunque, è ’a storia d’ ’a canzona ch’è sìmmolo ’e Napule. ’Nfatte, pare c’ ’o musecista napulitano Eduardo Di Capua pigliaje ispirazzione d’ ’a fenesta ’e casa soja a Odessa quanno cumpunette ô pianefforte “’O sole mio “, canusciuto pe ttutt’ ’o munno comme inno ’e Napule. Pirciò, quanno sentimmo sunà e ccantà ’stu capolavoro d’ ’a museca napulitana, arricurdammoce ca – pure si â Cetà Metropolitana nosta campano quase 25.ooo ucraine, nu pezzullo ’e Napule sta ppure lloco, affacciato ô Mare Nero. Sarrà ppure “n’atu sole”, ma pur’isso ce po’ scarfà ’o core…