giornata degli sfratti

Mo mmo è passato chillu quatt’ ’e maggio che aspettavano tuttequante, sperute e smaniuse. Primma ce dicettero ca era ’o pprincipio d’ ’a fase 2 ’e l’emergenza, po’ cagnajeno nu ppoco ’e ccarte, cundicenno ca era sulo chella 1 e 3/4, nu nummero ’e fantasia comme chello d’ ’o binario addò parteva ’o treno ’e Harry Potter…  Ce hanno fatto pure na capa tanta, spiecanno ca nu’ pputevemo penzà ca ’a lunnedì passato èramo de botta ‘libberi tutte’, pecché ’o periculo ’e ce cuntaggià ce sta ancora e, si propeto ’o vvulimmo sapé, ce l’âmm’ ’a tené ’ncopp’â noce d’ ’o cuollo pe pparicchie mise…

Però ’a ggente nosta, comme ce putevamo aspettà, hanno fatto festa chiù pe cchisto 4 ’e maggio ca p’ ’o sango ’e san Gennaro che s’era sciugliuto duje juorne primma, quanno cardenale, sìnneco e ccapo d’ ’a deputazzione annunciajeno ’o miraculo a nu Duomo vacante. Chillu fazzuletto janco scutuliato dint’â cattedrale ’e Napule è stato quase nu signale p’ ’a libberazione che nunn era venuta ’o 25 ’e abbrile; na specie ’e semaforo verde pe ddicere: mo finalmente putimmo ascì d’ ’o carcere d’ ’a casa nosta! Mo putimmo turnà a cammenà p’ ’e vvie, a affullà barre e pizzarie, a ffa’ shopping, a ppazzià a ppallone e a ccorrere dint’ê ciardine pubblece…

E ’mmece no, manco pe nniente! ’Stu 4 ’e maggio è stato comm’ ’e bbotte d’ ’o pprincipio ’e ll’anno: assaje fummo e ammuina, ma poca sustanza. Putimmo ascì, è overo, ma sulo pe’ gghi’ a ffaticà, pe ffatte ’e salute o pe ffa’ visita ê pariente. Putimmo fa’ na curzetta o ppurtà ’o cane a ppiscià, però sempe mantenenno ’a distanza e giranno cu’ gguante e mmascarine. Putimmo saglì ’ncopp’a nu pullmànne o â metropolitana, però senza ce affullà (se se…!) e ppulezzannoce ’e mmane ogne ttanto. Putimmo fa’ venì â casa nosta nu guaglione d’ ’o pizzaiuolo o nu rider che vva purtanno panine e ssushi, però nun ce putimmo piglià nu ccafé e mmanco magnà na pizza a llibbretta pe vvia…

A Nnapule dicimmo “è nu quatt’’e maggio” pe pparlà è nu mumento d’ammuina e arrevuoto pecché, tanno, era una d’ ’e ttre gghiurnate ’e ll’anno ca se pavava ’o pesone ô padrone ’e casa e ppecché, d’ ’a fine d’ ’o XVI seculo, era pure ’o juorno pe sfrattà, pe lluvà ’a miezo ’a mubbilia, carriannola a comme vene vene ’ncopp’ê viecchie sciarabballe o, cchiù tarde, ’ncopp’ê camionne d’ ’e trasloche. Ê quatt’ ’e maggio, ‘nzomma, se cagnava aria e ccasa e, pe ssumiglianza, ’sta data addiventaje na manera pe pparlà pure ’e cagnamiente e ttrasformazziune cchiù ’mpurtante. ’O guajo è che stevemo aspettanno ’e cagnà, ma sulo pe tturnà n’ata vota a cchillu modo ’e campà scumbinato, poco justo e pe nniente ecologgico che ggià tenevemo.   Comme si primma jevano bbuono tuttecose e tuttequante campavano overo felice e ccuntente

Embé, nu quatt’’e maggio ce vurrìa overamente, ma pe sfullà chistu munno ’a ll’ingiustizzie, d’ ’a miseria, d’ ’e mmalatie e d’ ’e gguerre. Pe vvutà paggena, facenno pace c’ ’a natura e accummincianno a “campà cu ‘a legge ’e Ddio”, comme diceva Viviani. Pe scuprì finalmente ca senz’agricultura – c’avimmo trascurata e mmalamente trasfurmata – nun se campa, pecchè nun ce magnammo tabblèt arrustute e ppasta cu ’e smartfòne . Ca ce abbastarrìa ’o sole, ’o viento, ’e mmaree e ll’ati ffonte energetiche naturale pe nnun ce abbasà sulo ’ncopp’a ppetrolio e ggasse, accussì fernimmo d’inguajà ll’aria che respirammo, aumentanno ’o calore che sta cocenno l’unneco pianeta che ttenimmo.

’Nce sta na spassosa canzona ’e Armando Gill (1918) ’ntitulata propeto ‘E quatto ’e maggio. Parla ’e nu signore che tteneva na putechella e ppure na casarella, ma ô padrone ’e casa nu’ ll’abbastava ’a mesata e ppirciò ’o sfrattaje senza fa’ tante cumplimente. Isso però, â primma e â siconna vota, s’ ’a pigliaje cu ffilosofia, cantanno: «E aggiu lassato chella putechella (casarella), /speranno ‘e ne truvá n’ata cchiù bella. /Core, fatte curaggio, /’sta vita è nu passaggio. /Facimmoncillo chistu quatto ‘e maggio, /che ce penzammo a fa’, /si ‘o munno accussí va?». Pure quanno se trattava d’ ’a ’nnammurata soja succedette ’a stessa cosa: «E tenevo na bella ‘nnammurata /ch’avevo fatto tanto p’ ‘a ‘mpará. /Ma che saccio che è, ll’hanno ‘nciuciata. /Nun è cchiù chella ch’era n’anno fa. /Primma, na rosa semplice, /mm’ ‘a facevo felice. /Mo vo’ ‘e brillante e dice / ca manco niente so’. /E i’ lasso pur’a essa e bonasera /e mme ne trovo a n’ata cchiù sincera…».

’A meglia cosa sarrìa ’e ce cumpurtà comm’a cchillu signore. ’E pprimme vote s’era sulo rassignato ê cagnamiente che ll’erano capitate, pe vvia ca ‘a vita è nu passaggio e ‘o munno accussì vva. ’A terza vota, però, nun se facette sfrattà ’a nisciuno padrone, ma accummenciaje finalmente a ddecidere isso sulo, c’ ’a capa soja. È accussì è isso che lassa ’a ’nnammurata che nunn era chiù chella ’e primma , pe  nne truvà una chiù ssincera.  Forze pure pe nnuje chesta putarria essere overamente ’a fasa 2: chella addò lassammo ’stu mudello ’e favuzo sviluppo,  pe cce ne piglià n’atu cchiù ssincero. Agurie!