So’ ppassate 400 anne ’a quanno Giambattista Basile scrivette ’sta frase dint’a uno d’ ‘e famuse Cunte suoje. Però me pare ca putarrìa ji’ bbuono pure mo, pecché – pure si nun stammo parlanno d’ ’o juoco d’ ’e ccarte – vale sempe ca quanno scarzeano ’e denare, ce âmm’ accuntentà…d’ ’e ccoppe. Pe ccarità, stammo tuttequante allere, priate e ccuntente pe vvia c’ ’o Napule ha vvenciuto ’a Coppa Italia e ssicuramente ce vuleva, doppo nu periodo accussì ddifficile e scuro. Infatte, aspettavemo tuttequante ca se turnava a campà normalmente, libbere d’ascì d’ ’a casa pe ffa’ tutto chello che facevamo primma d’ ’a pandemia. Però ’e nnutizzie che lleggimmo o sentimmo addemostrano ca stammo turnanno â soleta ‘nurmalità’ scumbinata ’e ’sta cità. Tant’è cca quaccheduno quase quase tene nustalgia ’e quanno stevamo ’nzerrate dint’a casa, ’e vvie erano cuiete e ssilenziose, se sentevano cantà l’aucielle e ll’aria e ’o mare erano cchiù ppulite…Dicevano (e scrivevano): #andràtuttobene; però me pare ca ’sta ripartenza – che ggià sapèvamo difficile e stentata – sta ffacenno assummà a ggalla ’e guaje ’e primma, c’ ’a differenza ca cierti pprubbleme (comme ’a fatica, ’a scola, ’o traffeco…) mo se so’ ccumplicate cchiù assaje.
Abbasta ca sfugliammo nu giurnale e ttruvammo titule che pparlano ’e sparatorie e accurtiellamiente, regulamiente ’e cunte camurriste, rapine a ssupermercate, spaccio ’e droga, appicceche e vviulenze ê ffemmene. Pe nnu’ pparlà d’ ’o scenuffreggio a ll’ambiente: appicciamiente ’e plastiche, scarreche abbusive ’e munnezza, allurdamiente ’e sciumme, inquinamento ’e ll’aria… Pe ccumpenzà ’e pperdete ’e quase tre mmise senza faticà, barriste, pizzaiuole, gelatare ecc. – appujate ’a l’amministrazzione cumunale – penzajeno buono ’e s’allargà ’e cchiù mmiez’â via, piazzanno tavuline, ’mbrellune e ggazzebbo pe ttutte parte, senz’avé piatà pe cchi cammina a ppede schivanno filere ’e ggente c’aspettano ’o turno pe’ ttrasì int’a pputeche e ufficie, motorine ’mpazzute, spase ’e frutta e vverdura, bancarelle varie, edicule ’e ggiurnale, biciclette e monopattini… E vvulimmo parlà d’ ’a movida? Over’è ca simmo state p’assaje tiempo ’nzerrate dinto casa, però mo ’nce sta n’evasione ’e massa! Quanno fa sera, po’, ’o casino addeventa ancora cchiù gruosso, â faccia d’ ’o distanziamento, d’ ’a sicurezza e d’ ’a pace ’e chi tene ’a mala sciorta ’e sta’ ’e casa addò ’nce stanno barrette, pub e llucale c’ ’a museca a ppalla.
Però ogne ttanto capita ’e leggere pure quacche bbona nutizzia. ’Na campagna pe nnu’ sciupà l’acqua; nu piano p’aumentà ’e liette int’ê spitale; 2500 assunzione â Riggione; n’impianto fotovoltaico ’ncopp’ê titte ’e l’EAV a Ppunticielle; quacche museo che finalmente sta arapenno ’e pporte… ’Nzomma, signale pusitive pure ’nce stanno. Sperammo però ca nun se tratta sulo ’e prupaganda e d’ ’e ssolete chiacchiere e ttabbacchere ’e lignamme, che sse senteno sempe quanno s’abbecinano ’e vvutazziune… Fatt’è ca scole, cinema e ttriate nunn àveno aperto ancora e ’o pputarranno fa’ sulo cu mmille accurtenze e ccumplicazziune. Fatt’è ca sulo quacche parco e cciardino sta araputo, ca pulmanne e mmetropolitane funzionano comm’a primma, ma pure cu mmeno passeggiere, e cca ambulatorie, visite ê spitale e ddentiste vanno ancora cu ssibemolle. Fatt’è ca s’accummencia a pparlà ’e quacche caso novo ’e Covìd e cca ’e guagliune nuoste stanno facenno l’esame adderet’a nu compiuter o sperdute dint’a n’aula meza vacante.
Sì, però a lluglio accummencia n’ata vota “Un posto al sole”, âmmo venciuto ’a Coppa Italia e dd’ ’a semmana che vvene putimmo pure cammenà p’ ’a via senz’ê mmascarine… E cche vvulimmo ’e cchiù? Pe mmo, nuje e ’e prubbleme nuoste simmo state arrimannate a ssettembre, quanno ce sarranno ’e vvutazziune e tuttecose, siddivò, #andrannotuttobene. Però, si ’sti prubbleme nun s’accunciarranno e nnun ce starranno abbastante denare, beh, ce putarriamo sempe jucà… ‘e ccoppe. Speranno c’ ’a nisciuno, ’mmece, le vene ’ncapa ’e pazzià cu spate e bbastune…
