Accussì dice nu pruverbio antico: “Pasca e Ppifanìa, tutte ’e feste vanno via. Risponne Cannelòra: Nce stongo io ancora”
Diceva nu pruverbio antico: “A Ppasca e Ppifanìa, tutte ’e ffeste vanno via. / Risponne Cannelòra: Nce stongo io ancora.” Chello ch’è sicuro è ca ’sti fffeste ’e Natale so’ state ancora mascarate e cculurate ’e russo, cu pputeche, risturante e bbarre ’nzerrate, pure si nunn è mmancata ’a soleta ammuina p’ ’e vvie e pparecchia gente nun hanno fatto a mmeno ’e sparà botte periculose e ffracassose. Perzì ’a Befana avette quacche prubblema cu ’a Pulezzia, pe vvia ca nun s’era purtata appresso ll’autocertificazzione, teneva na carta d’identità scaduta ’a nu seculo e mmiezo e ’a scopa volante nunn era assicurata…
Deoràzzia, se n’è gghiuto st’anno assaje defficele e ppirciò ce simmo sentute cuntente e cce simmo scagnate aùrie ’e bona salute e ffelicità pe cchello novo. Però nu’ ppare ca ’stu 2021 se sta alluntananno assaje ’a chello che ssuccedette ’nfin’ ’e mo. Accummincianno d’ ’a puliteca (nazziunale e llucale) e arrivanno ê prubbleme ’e tutt’ ’e juorne, comme chello d’ ’e scole che nnun s’aràpeno, d’ ’e traspuorte pubbleche che stanno tal’e qquale e dd’ ’e spitale, affullate ’a malate ’e Covìdde e addò resta defficele se curà n’ata patologgìa. Si agghiugnimmo pure ’o malutiempo c’ ’ave scutuliato pesantemente ’o lungomare ’e Napule, facenno assaje danne, e ppure brutte storie ’e cremmenaletà minurile, comm’a cchella d’ ’e motorine arrubbate ê rraidér, ’o quatro ’e stu pprencipio d’anno nunn è assaje cunzulante…
’Nfatte, nu’ pputimmo arapì nu giurnale senza ce truvà scarreccate ’ncuollo nu sacco ’e nutizzie ’e cronaca nera (sparatorie camurristeche, trafeche ’e droga e ammazzamiente varie). Ma pure chelle che pparlano d’ ’a cità – e d’ ’e prubbleme suciale che ttene- nunn arapeno ’o core â speranza. Doppo l’arco d’ ’o Chiavecone e nnu piezzo d’ ’o Castiello ’e ll’Ovo, mo ’e mmareggiate ’e sti juorne se stanno purtanno appriesso pure ’a diga d’ ’o Molosiglio. ’E pronteseccurze d’ ’e spitale cchiù gruosse e ’mpurtante, comm’a cchillo d’ ’o Mare e ’o Cardarelli, stanno ancora incasinate. ’O cummercio – cu ttutto ca ’nce so’ state ’e ffeste – nun riesce a sse sullevà d’ ’a crise e pparecchie puteche e rristurante stanno chiudenno.
Pe ttramente ca ’e guagliune/one rummaneno ancora â casa pe studià a ddistanza cu ’a DAD, dint’a quacche scola ’nce so’ trasute vranche ’e mariuole, che ss’hanno fatto lavagne elettroneche, compiutér e pperzì ll’infisse d’ ’e ffeneste. Nu’ pparlammo po’ ’e ll’innustrie che addò nuje vvanno chiudenno, lassanno ’nterra e ssenza fatica a cchille che cce fativano.
Cu ttutto chesto, però, nunn’avimm’ ’a perdere ’a speranza. Ce stanno pure nutizzie cchiù cunfurtante, che pparlano ’e sulidarietà, d’ ’a riscossa ’e ll’artiste, d’inizziative culturale e ssuciale urigginale. Certo, ’a gente teneno voglia ’e turnà a se magnà na pizza assettate ô tavulo, senza s’ ’a fa’ purtà dint’ô cartone ’a nu fatturino ’e cinquant’anne; vurriano piglià nu bellu café dint’ ’a tazzulella, no all’erta all’erta for’ô barre e int’a nu becchierillo ’e plasteca; se vulessero abbraccià e vvasà comme na vota, senza mantènere ’e ddistanze e pparlà addereto a na mascarina. Però nun putimmo turnà a comm’ èramo primma, e forze nun avimmo manco ’a turnà a cchella ‘nurmalità’, che cce purtaje già nu sacco ’e guaje, suciale e ppure ecologgiche. Forze, ’mméce, è arrivato ’o mumento ’e cagnà via, ’e fa’ scelte deverze, cu mmeno cunzumisemo e cchiù sulidarietà, cu mmeno chiacchiere e cchiù fatte.
’O pruverbio annummenato ô pprincipio arricurdava ca nunn è overo ca doppo Pasca e Ppifanìa fernesceno tutt’è ffeste, pecché ’nce sta ancora ’a Cannelora , che sse celebra ê doje ’e fevraro. Overamente ’a Befanìa nun ce ha ppurtato riàle overamente bbuone, accussì aspettammo ’e vedé si ’a Cannelora ce purtarrà quaccosa cchiù mmeglia.
Già nu rialo gruosso assaje pe nnuje Napulitane sarrà ’o nuovo Arcepìscopo, munz. Dummineco Battaglia, che vvenarrà a ppurtà aria nova, attiento cumm’è sempe stato a quistione comme pace, giustizzia e sulidarietà. Stesso ’o cardinale Sepe ha ditto: “’A cità nun ha dda perdere ’a speranza, pecché na terra che pperde ’a speranza è na terra morta”. E ppirciò nuje vulimmo arapì ’o core ô novo che sta arrivanno, sapenno pure ca pe ccagnà ’e ccose ce avimm’ ’a ’mpignà tuttequante, pecché nisciuna Befana ce rialarrà niente. Aurie!
