Ce avimm’ ’a movere pe ffa’ cchiù mmeglia ’a cità nosta, ascenno ’a ll’imputenza e d’ ’a sulitudene che cce sta ppiglianno a ttuttequante
’A nu poco ’e tiempo, a Nnapule ’a vita culturale e ppuliteca se sta appassulianno e asseccanno semp’ ’e cchiù. Certamente l’epidemia ’e Covìdde ha ddato na bella botta, facenno parlà giurnale, radio e ttelevisiune sulo ’e malatìe, cuntagge e vvaccine e ffacennoce campà dint’a na ’mbolla ’e sapone disinfettante e ccu ’e ffacce annascuse addereto ê mmascarine. Però nun ce ’a putimmo piglià sulamente cu ’a pandemia e cu ll’emergenza sanitaria. ’Nce sta quaccosa – e ddipenne sulo ’mparte d’ ’e lìmmete che sso’ state mise – che cce sta arreducenno a ppersone semp’ ’e cchiù apprennetive e rrassignate a ccampà juorno pe gghiorno, senza manco cercà na pruspettiva nova e ddeverza.
Triate e ccinema ’nzerrate; lezziune, discussione e ccunferenze sulo a ddistanza e ’ncopp’ô computér; fermata ubbrecatoria pe ttutte l’attività assuciative, suciale e cculturale; cunfrunto pulitico quase azzerato a ppoche mise ’a ll’elezzione cummunale, comme succedette già pe cchelle reggiunale… ’Nzomma, Napule e ’a Campania stanno sprufunnanno dint’a na crise depressiva assaje preoccupante. E ppe ttramente overo è sprufunnata na parte d’ ’o parcheggio d’ ’o spitale cchiù mmuderno (e custuso…) d’ ’a cità, ’a situazzione d’ ’e traspuorte nunn è cagnata pe nniente, ’o verde pubbleco sta jenno ’mmalora e sse cuntinuano a ttaglià malamente ll’arbere che cce stanno ancora, arreducennole comme si fossero appiennapanne e nno essere vivente.
’Ncopp’ê ggiurnale truvammo cronache deprimiente, che cce contano ’e sparatorie, accurtiellamiente, traffeche ’e droghe, incidente a ffaticature, scarreche abbusive e appicciamiente ’e munnezza, pruteste ’e barriste, pizzaiuole e rristurature, file sempe cchiù llonghe annanze a mmenze e ccentre d’assistenza d’ ’a Caritàs. Nun so’ ccose che ffanno sperà, ’mmaggenà nu futuro cchiù mmeglio, che pperò nu’ ddipenne d’ ’e juoche ’e prestiggio pulitiche ’e chi ce amministra (o ce vulesse amministrà), ma ’a chello che sceglimmo e ddecidimmo nuje, ogne juorno. Nun ce azzecca ’o sanghe ’e san Gennaro che nnun s’è squagliato: si nun facimmo scelte curaggiose e pparticipate nunn ascimmo ’a ’sta crise e nnu’ ccagnammo chello c’ancora nun va buono.
Na cosa strevuza è ca a Nnapule oramaje se parla, se scrive e sse discute assaje poco, però pare c’ ’a discussione s’è spustata ’ncopp’ê mmure ’e sta cità, addò ogne ttanto cumpare nu ‘murale’ novo. L’urdema creazzione ’e nu street artist lucale è ll’immaggene ’e nu Masaniello muderno, cu ’a faccia ’e Pino Daniele e ’na tuta ’a Superman sott’â cammisa ’e piscatore, pittata ’a Luca Carnevale ’ncopp’a nnu muro d’ ’a Marina. Pe ttramente, però, nisciuno ancora ha ffatto scancellà ’e murales pittate ê Quartiere Spagnuole, p’immortalà duje giuvane rapinature muorte sparate, mentre pe ffurtuna so’ state pulezzate ’a graffite varie ’e mmure ’e chiazza d’ ’o Giesù Novo, ma sulo pecché ’nce stanno giranno scene d’ ’a nova serie d’ ’o filme L’Ammica Geniale. Ati murales so’ ccumparze pure a ll’occasione d’ ’a morte ’e Maradona, però già ce ne stevano assaje p’arricurdà a nnuje Napulitane paricchie perzunagge famuse, che vvanno ’a Luther King a Ssufia Lorén, ’a san Gennaro a Che Guevara, ’a Massimo Troisi a Hamsìk.
Sicuramente è na manifestazzione ’e vitalità artisteca e cculturale, che sta facenno addeventà meno squàllede e cchiù bbelle ’e mmure d’ ’e quartiere populare napulitane. Però, comme nu’ pputimmo campà ’e lezzione e ccunfrunte fatte sulo a ddistanza – addò ’e pperzone addeventano faccelle stampate ’ncopp’ô schermo d’ ’o compiutér – accussì nun ce putimmo accuntentà sulo ’e guardà ’e ‘supereroje’ pittate ’ncopp’ê mmure d’ ’a cità, si nun cercammo pure nuje ’e fa’ ’a parta nosta p’ ’a cagnà. Accussì comme nunn abbasta tènere ‘santine’, madunnelle e ffiurelle stampate pe gghì ’nParavìso, accussì nunn ce abbasta manco pittà calciature, cantante e atture ’ncopp’ê mmure p’addeventà comm’a lloro e ppe llassà nu singo.
Dicette Massimo Troisi dint’a nnu film: “Dammo sempe ’a colpa â famma. Lamiente, vigliaccarie, delitte… ’e chi è ’a colpa? D’ ’a famma. Sarria pure overo si chi nun tene famma se cumpurtasse buono, ma nun me pare accussì”. Si cagnammo ’a parola ‘famma’ cu ‘epidemìa’ ce accurgimmo ca chella nunn era sula na battuta… Pe cchesto ce avimm’ ’a movere pe ffa’ cchiù mmeglia ’a cità nosta, ascenno ’a ll’imputenza e d’ ’a sulitudene che cce sta ppiglianno chianu chiano a ttuttequante. Pe’ ccità ancora a Ttroisi: “ ‘O mmassimo d’ ’a sulitudene è na machinetta d’ ’0 ccafé pe nna perzona sola”. Cercammo pirciò ’e turnà a ccafettere cchiù ggrosse, penzanno ammacaro pure a ll’ata gente…
