Nu’ pputimmo leggere nu quotidiano o guardà nu teleggiurnale senz’essere zeffunnate ’a tunnellate ’e nutizzie che pparlano sulo ’e l’epidemia. Mo l’informazzione s’è arridotta a nnu bullettino ’e guerra e tuttequante ce stammo abbituanno a ssentì e ausà nu linguaggio militare. Cape ’e guverno e ministre, dutture e cape d’ ’a prutezzione civile, giurnaliste e perzunagge d’ ’a televisione se so’ mmise d’accuordo a cce fa sentì comme si nun stessemo sulamente ’nzerrate dint’ ’e ccase noste, ma addirittura dint’a na trincea… Sta ppassanno na manera ’e parlà e scrivere ’e ’sta pandemia comme si se trattasse ’e nu cumbattimento, cu attacche, defenza, arme, munizziune. Parlano ’e verzàglie, arme, guerra totale; arraccumannano â ggente ca nun s’hann’ ârrennere ô nemico e ca nun s’ha dda avascià ’a guardia. ’Nzomma, na retorica ’e guerra che ppoco ce azzecca cu chello che, ’mece, è cuntrasto â malatìa, cura pe ssanà ’e malate e accurtezza pe nnu’ ffa’ spannere ’o cuntaggio.
Furtunatamente, ogne tanto ’nce stanno pure nutizzie diverze e, ’mmiez’a tante amarezze, nu ppoco ’e aggarbatezza e dducezza. Mo ca ll’aria ’e Pasca se fa sentì, capita ’e leggere pure quacche bbona nova. P’essempio, nu sacco ’e ggente stanno ajutanno ’e cchiù ’nguajate cu rraccòvete ’e robba ’a magnà, stanno lassanno na ‘spesa suspesa’ dint’ê supermercate e ccunzegnano articule varie ê ccase d’ ’e viecchie che nu’ sse pônno movere. A Caivano, l’Algida rialaje ’e gelate suoje ê cetadine e a Caggiano (SA) ’o sìnneco, turnanno addereto l’indennità soja, arrialàje 300 ova ’e Pasca ê ccriature d’ ’o paese. Solidarietà, attenzione pe cchille che nn’àveno besuogno (disabbele, anziane, senza casa…) e ccura pe rrecupetà ’a casa e ’a fameglia nu’ ssolo comme na gajòla addò avimm’a sta’ afforza, ma comme refuggio pe nna vita diverza.
’A ggente sta tturnanno a ccucenà; ce sta cchi s’è mmiso a ’nfurnà pane e ppizze e chi s’appripara a sfurnà casatielle e ppastiere p’ ’a santa Pasca che ss’abbecina. Ce sta chi va facenno ginnasteca dinto casa e cchi, finalmente, se sta lleggenno nu libbro o studianno quaccosa. ’Nzomma, stammo pruvanno a dda’ nu senzo a sti ggiurnate longhe e semp’eguale, però stammo pure arrivanno a scuprì che comme campavemo ‘primma’ nunn era accussì ‘nurmale’ comme pareva. Tropp’assaje ammuina, tropp’assaje pressa, tropp’assaje sciupìe, tropp’assaje cunzume e spese inutile. Ma quanno ’sta mardetta scajenza fernarrà ce sta ’o rìseco ca turnammo a ffa’ tutto comm’a primma, senza cagnà ’a manera nosta ’e campà, sfruttanno ê pperzone, arraffanno ’e rrisorze e subbissanno ’a natura. Nu pruverbio dice: “Doppo Pasca, viéneme pesca”, pe ffa’ capì ca quanno ’e ccose tornano a jì’ bbuono è ffacile che cce scurdammo tuttoquanto e ’e tuttequante… Nuje, però, nun ce âmm’a scurdà chello c’avimmo passato e cche ’sta pandemìa ce ave ’mparato.
Chesta Quaresema ’e quarantena nun po’ ffernì a tarallucce e vvino né a casatielle e cciucculata. Sperammo allora ca Pasca che vvene ce porta nu ppoco ’e cujetudine e sserenità, ma stammoce attiente a nun cadé dint’ ’o trainello ’e penzà ca nun è succieso niente. Int’a cummedia d’Eduardo ‘Napoli milionaria’, fernuta ’a guerra, Gennaro Iovine se nne torna â casa soja doppo mise ’e priggiunia e stiente. È assaje cagnato e ppe isso niente è cchiù comm’a primma, ma p’ ’a mugliera e pp’ ’e figlie suoje chello ch’è stato s’ha dda sulo scancellà. ’O figlio Amedeo lle dice cuntinuamente: «Nun ce penzà cchiù …Va bbuò papà, ccà è ffernuto tutte cose… ccà oramaje stammo cujete…». Però Gennaro risponne a Amedeo e â mugliera: «Nun ce penzo cchiù? È na parola. E chi se po’ scurda’… ‘A sta guerra ccà se torna buone… Ca nun se vo’ ffa’ male a nisciuno… Nun facimmo male, Ama’… Nun facimmo male…».
Pasca vo’ dicere ‘passaggio’ e ppirciò ppure nuje, fernuta ’st’epidemia, farriamo bbuono a nun scancellà tutto e a ccagnà strada, overamente.
