Home Cronaca di Napoli e provincia ’NCOPP’A RAI 2 “CE STA ’O MAR FOR…”

’NCOPP’A RAI 2 “CE STA ’O MAR FOR…”

È accumminciato ’o sceneggiato: tratta ’o prubblema suciale d’ ’e guagliune che fernesceno carcerate

È accumminciato ’ncopp’a Rai 2 ’o sceneggiato “Mare fuori” e fforze è ppresto pe ccriticà, pecché n’opera s’ha dda canoscere cchiù mmeglio, pe vvalutà pure ’e ccose ppusitive che ttene. ’A chiammano ‘fiction’, però conta storie che nu’ vvônno apparì fénte, trattanno ’o prubblema suciale d’ ’e guagliune che fernesceno carcerate a Nnìsita. È ffacile ca ’e sceneggiature (Cristiana Farina e Maurizio Careddu) penzavano ’e fa’ na cosa novo, ma nun me pare ca ce riuscettero, pecché è ddifficile definì ’stu sceneggiato ‘anti-Gomorra’ o accunzentì c’ ’o reggista ca ‘Mare fuori’ è na storia “realista e non buonista”. Me songo scucciato ’e sentì parlà ’e buonismo comme si fosse na malatia, ’mméce ca na manera pe ppruvà a cce gguardà attuorno senza ce fa’ cuntaggià d’ ’o vveleno d’ ’o suspetto, d’ ’a scunfidenza e d’ ’o currivo. Nu’ ssaccio manco che vvo’ dicere realista, pecché ’a realtà – specialmente chella napulitana – tene assaje facce e nu cuofeno ’e cuntraddiziune.
Carmine Elia – ’ntervistato ’a Repubblica – dicette pure ca ’e guagliune/one ’nzerrate int’ ’o carcere minorile napulitano so’ ffrutto ’e na “realtà difficile”, campanno int’a nu “tessuto suciale cumplicato”. ’Sti pparole sonano nu pucurillo generiche, pe vvia c’ ’a sucietà sana è ddifficile e ccumplicata. “Napoli è un personaggio, e non fa da cornice”, dicette ’o reggista. Ma ’e quale Napule steva parlanno? P’ ’e sceneggiature, ’sta serie televisiva“…conta chello che ssuccede a cchille che ffernesceno carcerate addò ce sta chi s’occupa d’ ’o futuro lloro, ’e lle restetuvì nu sguardo pusitivo ’ncopp’â vita e ’e lle da’ n’alternativa”. Pozzo sulamente accunzentì, però me pare ca ’stu messaggio pusitivo cuntrasta cu nnu cuntesto suciale disperato, che spisso fa penzà – pure p’ ’o linguaggio assaje viulento – a ll’atmosfere cupe, bruttone e ttamarre d’ ’o serial Gomorra. ’O primmo episodio, “Vite spezzate”, già ce lassa ’a scura ’mpressione ca carceriere e educature nun ce ’a farranno a ccagnà overamente ’e vvite ’e chille guagliune/one, pure si ce provano a accuncià chello che na mala sucietà, iniqua e vviulenta, êva ggià spezzato.


Dichiaramiente ’e camorra, schifo p’ ’e rrèole, desprezzo pe ll’infame, ’mpustatezza guappesca, viulenza ’e gruppo pe mmettere sotto ’e cumpagne scellate e ddevierze… Embé, nu’ mme pareno cose nove int’a ffilm e sceneggiate che pparlano (e sparlano) ’e Napule. Trattanno ’e nu carcere minorile, po’, se puteva da’ na meglia immaggene ’e na ’sperienzia suciale addò pure s’è pruvato e se sta pruvanno ’e tutto pe ‘rieducà’ guagliune/one che ppareno signate ’a na sorte ch’è quase na maledizzione. Certo: ll’atture so’ bbrave e ’o sceneggiato tene bone qualità. Però int’a ll’uocchie ’e ’sti gguagliune leggimmo cchiù disperazzione ca speranza; cchiù rassignazzione, raggia e ppaura ca voglia ’e riscatto. E mme pare ca pure c’ ’a culonna sunora cunferma ’o tono cupo e scuro d’ ’o sceneggiato, ’mprìmmese ’a canzone principale: “‘O mar for”. Lassammo perdere ll’ortografia (pure si nun me faccio capace ’e quanta gente cuntinuano a mmaletrattà ô Nnapulitano quanno scriveno…) e ppenzammo sulo a cchello che ’sta canzone ce dice. Truvammo frase tipo: “So’ ccrisciuto ’mmiéz’a na via / ’o ssaccio chello che m’aspetta…” e sse parla d’ ’e “guagliune d’ ’o sistema”, chille che “â scola nun ce vanno cchiù”. Sentimmo spisso ’e dicere “chillo m’è ffrate”, ma nu’ ssongo accòlete ’e san Francisco, pecché se parla ’e gente ca: “è mmeglio ca tene ’e fierre…” e ggia sape ca, primma o doppo, “acchiappa na cajola”. L’unneco messaggio pusitivo d’ ’a canzone è: “Nun te preoccupà guagliò / ce sta ’o mare fora”: na frase ripetuta nu sacco ’e vote, che pperò sposta ’a speranza da ’e crestiane a nn’elemento naturale…
Già 25 anne fa Claudio Mattone e Enrico Vaime (auture d’ ’o film e ccummedia musecale ‘Scugnizzi’), nun s’aspettavano assaje ajuto ’a chella “magnifica gente che vede e che sente / e fa finta di niente / pe nun se spurcà”, pecché spisso songo: “perzone…che stanno sulo a gguardà”. Pure tanno se cantava guappescamente: “È bello a cumannà / quanno tiéne sott’ ‘e piéde na città. /È bello a cumannà /quanno passi e a tuttequante ‘e ffàje tremmà”. Però ’nce truvavemo pure nu poco ’e speranza, quanno ’e guagliune cantaveno: “E ‘ncuntràmmoce e dàmmoce ‘a mano /si stammo vicine putimmo parlà /e parlanno parlanno parlanno /quanti ccòse se pònno accuncià /quanti ccòse ca sulo si ‘e ddice / te fanno fa’ pace e te fanno scurdà / e parlanno parlanno parlanno /ciente strade se pònno truvà […] e parlanno parlanno parlanno / chi ha sbagliato se fa’ perdunà…”.
Guagliune e guaglione ’e mo, fernute int’a chillu “Carcere ’e mare”, pare ca nu’ tteneno cchiù voglia ’e parlà né “…’a pacienza d’aspettare”, e nemmanco sperano overamente ’e cagnà vita. ’O fatto ca mmiéz’a ’sti cammurristielle ’nziste se vene a ttruvà, comm’a n’àseno mmiezo ê suone, nu giuvinotto milanese ‘virtuoso’ ma pure vizziato (’o chiattillo), fa’ cadé ’stu sceneggiato int’ê stereotipe nord/sud cchiù cummune, che però nu’ ffanno buono â ggente nosta. Nemmanco ’o titulo d’ ’o siconno episodio (“Educazione criminale”) pare c’aràpe ’o core a nna speranza. Nuje però sapimmo buono ca ’a fatica ’e chi fatica overamente, juorno doppo juorno, pe ’sti guagliune nun sarrà inutile e cche, furtunatamente, cuntinuarrà pure doppo ’stu sceneggiato.

Previous articlePiazza Mercato fabbrica di San Pietro. Lavori interminabili, stato di abbandono
Next articleAntonio Pariante (Comitato Portosalvo): “Così si perde l’identità”