Nun vulevo turnà ’ncopp’ a ffacenna d’ ’a scola ‘coviddiola’ ma l’aggio ’a fa’, pecché sulo a Nnapule e ttuttaquanta ’a Campania ’e scole rummaneno ’nzerrate e sse cuntinuarrà a studià a ddistanza. Accussì decidette ’o presidente De Luca, jendo contr’a cchello c’aveva deciso stesso ’o guverno, cuntrastanno nu cuofeno ’e maeste e pprufessure che nnunn erano d’accuordo e pigliannosela pure cu ’e mamme che pprutestavano. Mo sapimmo pure c’ ’o recurzo ô Tribbunale Amministrativo nunn è stato accuòveto e accussì ’e scole d’ ’a riggione nosta – aperte pe ffurmalità sulo pe ccocche juorno – rummaneno ancora vacante e ssilenziose, forze ’nfin’a ddoppo ’e ffeste ’e Natale. A nniente servettero banche cchiù distanziate, caterve ’e mascarine chirurgeche e bbidune ’e disinfettante. Nun abbastaje manco cagnà urarie d’ ’e llezziune e cchille pe ttrasì e ascì; mubbilità preside diretture e ccullabburature p’urganizzà turne p’ogne cclasse; nummenà prufessure apposta p’ ’o Covìd e ccercà cuntatte cu ll’ASL. ’O guvernatore nuosto nun vo’ sentì raggione: ’e scole (e pperzì ll’asile) restarrano ’nzerrate e se cuntinuarrà a ffa’ scola ’a luntano.
So’ ppassate nu paro ’e mise ’a quanno accumminciaje l’anno scolasteco e ppirciò Nnapule cuntinua a mmanténere ’o primmato nazziunale (forze pure ’nternazziunale…) d’ ’a città addò ’e guagliune/one fanno scola sulo cu ’a DAD. (didatteca a ddistanza). Chesto vô dicere ca stanno passanno ore e ore addereto a nu schermo ’e compiutér (si nno annnant’ô display d’ ’o cellulare…), pe ccapì e ’mparà chello che mmaeste e pprufessure pruovano a sspiecà, stanno pure lloro ’nchiuvate â casa, a pparlà cu studiente arredutte a icone. Fanno – e cuntinuarranno a ffa’ – lezziune ‘virtuale’ ’e taliano, matemateca, storia, ma pure ’e… educazzione motoria, museca e arte. Nnu’ pparlammo d’ ’e studiente ’e ll’istitute tecniche e pprufessiunale, che s’avarriano ’a ’mparà ’a cuntabbilità, spremmentà int’ê labboratorie ’e chìmeca, gestì machine ‘nnustriale, o pure cucenà e sservì a ttavula…
Simmo quase turnate ê tiempe d’ ’e trasmissiune televisive comm’a ‘Non è mai troppo tardi’ e ‘Telescuola’, ma ’e ccose so’ assaje deverze, pecché mo ’e scole ce stanno pe ttutte e nu’ mmancano maeste e pprufessure. Però ll’aveno arredutte a ffa’ lezzione a nna classe ch’è na specie ’e albùm d’ ’e ffigurelle, cu alunne che ccumpareno e scumpareno ’ncopp’ô schermo, addeventate faccelle e vvucelle luntane, senza cuorpo. Perzone virtuale, che ss’hann’ ’a accuntentà ’e na scola virtuale, che scriveno d’ ’a casa lloro messaggine e mmannano pe pposta elettroneca teme, prubbleme, questiunarie, recerche e ddisegne. ’Nzomma, na scola virtuale no virtuosa, addò ’e guagliune/one nun se pônno cchiù cunfruntà faccia a ffaccia. Pure si senteno e vvedeno a ll’ate cumpagne, ’nfatte, num pônno cundividere ’a sperienza cchiù ’mpurtante ’e tuttequante: essere nu gruppo overo, addò se ’mpara a sta’ assieme, a rrispettà ’e differenze, a ss’ajutà l’uno cu ll’ato.
’A sigla DAD l’àveno rimpiazzata cu nn’ata nova, forze pecché faceva venì a mmente ’e dade p’ ’o bbrodo. Mo se chiamma DID (“Didattica Integrata Digitale”), però me pare c’ ’o bbrodo rummane sempe ’o stesso. Chella ggente che ggià ll’anne passate s’erano appassiunate a ’stu metodo e ppredecavano ca nun ce steva na ‘cumpetenza diggitale’ bastante, accussì so’ state finalmente accuntentate. Migliare ’e prufessure (paricchie annante cu ll’anne…) s’hann’avuto ’a ’mparà nu cuòfeno ’e parole tecneche ’ngrese, ausanno ’e tutorial pe ccapì comme se trase int’a na ‘piattaforma’, comme se ‘crea’ na classroom, comme se mannano appunte, assigne e nnote, facenno ‘copia-e-azzécca’, o comme se curreggeno (e se spedisceno via mail), elabburate che lle songo arrivate comme ‘ducumiente Word’, ‘piddieffe’ e ccumpagnia cantante… Pe nnu’ pparlà pure d’ ’e cunziglie ’e classe e rriunione ‘scola-fameglia’ fatte ’a luntano, addò p’ ’e pprimme classe se discute ’e guagliune/one canosciute sulo comme immaggenette ’ncopp’ô schermo…
Dice: sì, vabbuò, ma si ce sta n’emergenza se po’ ffa scola sulo accussì. Però nun me pare na risposta justa, pecché ’nce stanno assaje state furestiere e pparecchie riggiune taliane addò ’mméce cuntinuano a ffa’ scola overamente, pure cu mmascarine ammuchine e ddistanziamiente. Saranno tuttequante irrespunzabbele, pe vvia c’ogne juorno stanno arresecanno ’a salute ’e studiente e pprufessure? Forze ca ’e guagliune francise, germanise, spagnuole e ’ngrese so’ speciale e nu’ sse pigliano ’o Covìd? E cchille mericane, russe e ccinise nu’ ccòrreno ’e stesse riseche cuntinuanno a gghì â scola? ‘E statisteche ce fanno sapé ca ’nCampania, già ô 2017 ce steva na disperzione scolasteca quase d’ ’o 20 pe ccento (a Nnapule 22%). Ma che ffine farranno ’sti gguagliune/one, tenute mo pure ufficialmente fora d’ ’a scola, e quanto ’sta suluzzione sta pesanno ’ncopp’ê spalle ’e geniture che tteneno figlie disabbele o prubbleme econommece gruosse assaje?
D’ ’a scola overa DID & DAD songo sulo ’nzìpete surrogate, sottoprudutte ’nnustriale, chille overo ‘geneticamente mudeficate’, quanno ’mméce Vicienzo De Luca chiammaje OGM a mmamme e ffiglie che vvulevano turnà a scola. Però stammoce attiente, pecché, si chi ha dda decidere nun sta a ssèntere ’a gente ’ncarne e uossa, overo arrisecammo ’e mudificà pure ’a democrazzia.
