’Mmiez’a tutt’ ’e guaje che cce purtaje ’sta pandemia, sicuramente na bella botta se l’è ppigliata ’a scola, che ggià primma nun steva scarza a pprubleme. ’Nzerrata pe cchiù ’e tre mmise, aspettanno p’arapì ’e pporte â siconna mità ’e settembre, ’a scola nosta ha fatto ’e cunte cu na trasfurmazzione grossa assaje, che, pe ppruteggere ’a salute ’e studiente e pprufessure, l’ha ppurtate a ffa’ lezzione ’a luntano, ognuno â casa lloro. ’Sta specie ’e ’struzzione a ddomicilio, però, nu’ ttene niente a cche vedé c’ ’a scola verace, che nnu’ sserve sulo pe ’mparà ’a storia, ’a matematica o l’ingrese, ma pure pe ffà sta’ assieme guagliune e gguaglione, educannole ê rreole e ffacennole addeventà perzone e cetatine.
Nun se trattava ’e na scola televisiva ’e l’anne sissanta – tipo “Non è mai troppo tardi” o “Telescuola” – e mmanco d’ ’e prugramme pure mo trasmise d’ ’e ttelevisiune educational. ’Nfatte, ’a Didattica a distanza (DAD) – comme dice pure ’o nomme scurciato… – sta â scola verace comme ’o ddado ’nnustriale sta ô bbrodo ’e carna. Nu surrogato che po’ rrimpiazzà l’urigginale pe ll’emergenza, ma nunn è na rivoluzzione. E pperò ’nce sta chi ha cugliuto l’occasione pe ppruclamà ca, finalmente, ’a scola taliana era addiventatata cchiù mmuderna e tecnologgica, pecché ’o futuro è ddiggitale e ce avimm’ ‘a abbituà a ffa’ tutto ‘a ddistanza’. Songo ’a stessa gente che ce facettero na capa tanta c’ ’o smart working, cundicenno ca faticà â casa è na rivoluzzione pe ll’ambiente e na manera overo intelligente p’arresolvere ’e prubbleme d’ ’a sucietà.
Peccato che se so’ scurdate ‘e dicere pure ca l’occupazzione nu’ cce guadagna, ca ’e deritte ’e chi fatica sparisceno e ca cchiù lassammo fa’ a mmachine e ccompiutér, cchiù ’o munno sta ’mpericulo ’e perdere core e cuscienzia, c’apparteneno sulo ê pperzone umane. Cu ’a scusa d’ ’o distanziamento suciale, int’a ’sti mise nu’ ssulo ce hanno purtato a ffaticà e a ffa’ scola ’a luntano, ma songo aumentate pure ate attività che mmo se fanno spremmenno ’e buttune d’ ’o compiutér. Accattammo panne, pazzielle, mobbile e automobbile ’a luntano. Urdenammo chello che vvulimmo pe mmagnà cu nnu clic. Visitammo ’ncopp’ô schermo ’e ccase che vulimmo lucà o accattà. Pe nnu’ pparlà d’ ’e cuncierte, d’ ’e visite ê museje e pperzì ’e chelle ê pariente luntane. Tutto ‘virtuale’, che nnun ce azzecca c’ ’o cuncietto ’e ‘virtù’, pecché nun ce sta niente ’e buono a rimpiazzà ’e crestiane cu robbotte e avatàr…
Però ’a scola nun ha dda essere ‘virtuale’, si nun vo’ addeventà chello che nunn è. Ê tiempe antiche, pe scamettà na scola ’a chiammavano ‘cavajola’, pe ddicere ca nu’ sserveva né a istruì né a educà, ripurtannoce a nu scrittore salernitano d’ ’o XVI sec., Vincenzo Braca, che scrivette ’na farza cu stu titulo. Però, doppo’ ’a truvata d’ ’a D.A.D., credo ca ce âmm’ ’a preoccupà pure p’ ’a scola che stanno appriparanno, pe ppruteggere ’a salute (fiseca, ma no mentale…) ’e studiente e pprufessure. Pazzianno, ’a putarriamo chiammà ‘scola coviddjola’, pecché p’ ’e distanzià ’e nu metro pe vvia d’ ’o Covìdde, è nnato nu prubblema assaje serio. Fin’a mmo, dint’a ll’aule d’ ’e scole ce aveno ’nfurchiato pure trenta guagliune/one, però accussì nun se po’ cchiù fa lezzione. Scole chiuse p’accurpà l’istitute, aule piccerelle, bancarielle viecchie, servizzie iggieniche mal’arredutte, insegnante e bbidelle mancante…Na traggedia overamente, si penzammo ca, sulo int’ ’e 3.922 scole d’ ’a Campania, quase 130 mila studiente – cu ’sta nova sistemazzione – stanno a rrìseco ’e rummané senza spazzie.
’A ministra ’e ll’Istruzzione ha ditto ca tutto se po’ accuncià: abbasta astregnere ’e cclasse, allarià l’aule, recupetà ati spazzie (palestre, triate…), ristrutturà ’e scole abbandunate, accurcià l’orario d’ ’e lezziune, purtà ’e guagliune a studià dint’a mmuseje, bibblioteche e cciardine, reclutà educature e perzunale ’e servizzio, accattà segge e bbancarielle nove etc. etc. E tuttuquanto, naturalmente, int’a ’sti ttre mmise d’ ’a staggione… Mo, si ppure vulimmo essere ottimiste e tturnà a ddicere e scrivere #tuttoandrabene, me pare ca stammo nu poco esaggeranno…
’O periculo è ca ’sta scola coviddjola po’ addeventà overamente ‘virtuale’, cu studiente (cu ’e mmascarine ’nfaccia) sparpagliate p’ ’e cclasse; lezziune ’e 40 minute; prenotazziune pe gghì ô gabbinetto; orarie devierze pe ttrasì e p’ascì; prufessure ’mpazzute appriesso a ccompiutér e rreggistre elettroniche; bidelle cu ttuta janca e gguante che ssecutano a gguagliune/one cu spray â varrechina e ttermometre… Ato c’ ’a “farza de lo mastro de scola” che Francesco Braca scrivette cinche secule fa! Chesta po’ addeventà na traggicommedia, addò scummetto ca se turnarrà a pparlà ’e didattica a distanza e – pure spennenno meliarde d’euro – restarranno precarie migliare ’e prufessure e se cuntinuarranno a ffurmà classe-pullare.
Sin’a cche ’a scola restarrà pe cchi guverna nu prubblema e nno na resorza, nun sarrà facile ascì a ’sta situazzione. Ma, comme già scrivette quaccuno, nuje sperammo ca ce ’a cavammo…
