Vi proponiamo un dialogo immaginario tra Pascale e il suo dirimpettaio al tempo del Coronavirus
Pascale (assettato, cu nna tazzulella ’e cafè ’mmano, se sta ffacenno na chiacchiera cu nnu vicino, prufessore ’e scola): “Embé, a nnuje napulitane levatece tuttecose, ma no ’stu ppoco ’e libbertà for’ô bbarcone… Caro professore, specie mo, cu stu dannato Covìdde nun putimmo fa’ niente cchiù e… Che ddicite? Sì, è overo: simmo addiventate arancione e pputarriamo pure ascì for’ ’a casa, però, se sape, è nu ddiece’ ’e prubblema pe ffa’ ogne cosa. S’hann’ ’a fa’ file longhe assaje a ll’ufficie, ê pputeche, pe ttutte parte. E ppo’, cu cchella mascarina ’nfaccia nun putimmo manco sciatà…”.
Beve nu surzo ’e cafè, po’ dà na guardata ô giurnale e rrepiglia subbeto a pparlà.
“Oillòco: “Troppi assembramenti per gli acquisti di Natale. Si prevedono nuove restrizioni”. Avite sentuto, prufessò? Già sta fernenno ’a libbera uscita…Se sapeva ca ’st’ammuina p’ ’e vvie ce faceva turnà comme zona rossa! Comunque, caro professore, io overamente stongo buono pure â casa. E ssì: c’âmm’ ’a fa’, simmo sulo duje perzone, io e mmuglierama, e cce arrangiammo buono pure senz’ascì. Che ssaccio? Tenimmo genio e magnà na pizza, na frittura mista? Facimmo na telefonata â pizzaria e cc’ ’e pportano. A Mmaria lle vene ’o sfizzio ’e nu panino? Chiammammo â ’mburgheria ’e rimpetto e subbeto ce portano tutto chello che vvulimmo. ’Nzomma, cu tutte ’sti ggiuvene che vanno giranno matina e ssera, abbasta chiammà e…Che ddicite? Ah, pure vuje v’ìreve accuorto già ’e ’sti rraidér che ssaglieno e scenneno ’a casa nosta quann’è ’a cuntrora?… Embé, è nna commodità. Una cosa sulamente m’aggio ’a fa’ cu ’e mmane meje… E bbravo ’o prufessore! Avite annevinato pecchè già ’o ssapite ca mme piace sulo ’o ccafè che mme faccio stesso io c’ ’a machinetta». Se ne beve n’atu ppoco d’ ’a tazzulella e ttorna a gguardà ’ncopp’ô giurnale. “Comunque, è overo pure chello che scrive ’stu giurnalista: “In assenza di relazioni personali da vicino, sta cambiando la percezione degli altri”. E ssì, pecché – ’o ccapite meglio ’e me vuje che ssite nu prufessore – nun ce parlammo cchiù faccia a ffaccia, nun ce astrignimmo cchiù ’e mmane, nu’ ddammo n’abbraccio manco ê fammeliare… E cchesta che rrobb’è! Simmo addiventate tuttequante immaggene ’ncopp’ô telefono e ô compiutèr… ’O vvedite, ’o ddice pure nu pissicologo ’ntervistato d’ ’o giurnalista: “Le persone ormai si relazionano solo virtual…mente (bah, chesta nu’ ll’aggio capita buono…) e così rischiano di trasformarsi in immagini senza corpo, in icone, comunicando con noi come spiriti evocati da una medium”. Mamma d’ ’o Carmene! E cche bbrutta cosa! ’Nzomma, prufessò, in poche parole ’stu signore dice ca, a ppoco a ppoco, stammo addiventanno comm’a ffantaseme…”.
A cchistu punto s’interrompe pe ssèntere ’a resposta d’ ’o vicino.
«Che ddicite? No, prufessò. Chillo ch’è ppassato mo mmo adderet’a mme nunn è nu fantasema…E bbravo! Tenite pure genio ’e pazzià!… No, avess’a essere ’o guaglione d’ ’o chianchiere…sì, ’o macellaro, ch’è ssagliuto pe ppurtà ’o spezzatino p’ ’a genuvese… Me pareva ’e sentere ’o campaniello d’ ’a porta… sarrà gghiuta muglierama… Comme dicite? “Ci sono rimasti ormai solo i piaceri della carne”? Neh, ma comme state spirituso stammatina! Overamente a mme me piace assaje ’o rraù… però – detto tra noi – essa nunn ’o ssape fa’ comme Dio cumanna, accussì m’accuntento d’ ’a genuvese…”.
Pascale s’avota, pe pparlà c’ ’a mugliera, che sta dinto casa.
“Marì, dincello ô guaglione c’ ’a vota passata ’a carne ’e vitello era troppa tosta, capito?… Ah, fatte purtà quacche sasiccia…m’arraccumanno, a ppunta ’e curtiello…”.
Torna a bbevere nu surzo ’e cafè e a pparlà c’ ’o vicino.
“Prufessò, e…vvuje nun me dicite niente? Saccio ca tenite nu sacco ’e prubbleme cu ’stu fatto ca ’e scole stanno ancora ’nzerrate… È overo: ce stanno già nu cuofeno ’e perzone che ffaticano ’a casa…comme diceno?… Ah, che ffanno ’o smartuorchìng. ’Nzomma, comme parlaje n’amico d’ ’o mio, praticamente mo stammo turnanno ê tiempe antiche, quanno se faceva ‘casa e pputeca’…! Però, scusate, a ffa’ ’o prufessore me pare c’avess’a essere na cosa deverza… Che nne ddicite? Vabbuò, ’o ssaccio ca pure vuje facite chillu fatto ’e fa’ lezzione a ddistanza, però nunn è ’o stesso ca parlà a gguagliune e gguaglione ‘ncarne e ossa, dico bene? Ah, tutte ’e juorne ve state culleganno cu ll’aule virtuale? Certo, è mmeglio ca niente…però, scusate, io nu’ ccapisco comme facite a ’mparà l’italiano, ’a storia e ’a giografia sulo parlanno ’nfaccia a nnu compiutér. Ah, ’nce stanno ’ncoppa tutte ’e ffaccelle d’ ’e studiente vuoste? Nu’ ddiscuto. Vuje ’e lezziune overo ’e ffacite, ma comme facite a pparlà sulo cu ffigurelle ’ncopp’a nu schermo? Comme? Ll’interrogate pure? E cche v’aggi’ ’a dicere, prufessò? A mme me pare c’accussì è comme si parlasseve cu ’e spìrete…Sì, me pare ca state facenno lezzione ê fantaseme!… E poi… Permettite? Me sta chiammanno muglierama…”.
Pascale s’avota ancora verz’ ’a stanza ’e lietto.
“Che d’è, Marì? Ha bbussato pure ’o guaglione d’ ’o salumiere? No, nu’ pozzo. Sto pparlando c’ ’o prufessore. Pienzace tu a ffallo trasì…”.
Po’ torna a gguardà for’ô bbarcone. “Scusate l’interruzzione, prufessò. Che stevo dicenno?… Ah! Ca è comme si vuje facisseve lezzione a ffantaseme, no a guagliune overe… Comme? Vuje dicite ca ognuno tene ’e fantaseme suoje? Po’ essere, prufessò. Po’ essere pure…”..
