Ce stammo abbituanno, però nunn è na cosa normale. ’E ccittà noste so’ ppresidiate juorno e nnotte ’a surdate armate comme si jessero â guerra. Annanze a stazziune, chiesie, munumiente e ppalazze ’nce sta spisso parcheggiata na camiunetta o pperzì nu blindato, cu ssentinelle c’ ’o mitra a ttracolla che se guardano attuorno, comme cumbattiente ’e primma linea. Overamente già nunn era normale quanno, pe mmezza d’ ’o virùsse, ’nzerrajeno città sane e ’nce mannajeno nu cuofeno ’e surdate pe ccuntrullà ’e ‘zone rosse’. Ogge, però, vônno adderittura mannà ’e surdate a ccuntrullà si ’a gente teneno o no ’a mascarina ’ncopp’ô musso e ssi se stanno affullanno e ffanno ammuina ’nnanz’ê lucale d’ ’a muvida. Ce manca sulo ca ce truvammo militare armate pure dint’ê cchiesie, pe ccuntrullà si ’e crestiane lloco dinto stanno bbuono spartute o stanno assettate azzicco a ll’ate, e – pecché no? – dint’ê scole, pe vviggilà si ’e studiente stanno sode e bbastantamente ‘distanziate’…
Accumminciaje ’o guverno Berlusconi, ô 2008, cu “Strade Sicure” però so’ ppassate dudece anne e ttenimmo ancora cchiù ’e 7.000 surdate jettate ’mmiez’â via pe rrimpiazzà (lloro diceno p’affiancà…) pulezziotte, carabbiniere, finanziere e gguardie lucale, accupannose ’e pubbreca sicurezza. Ma overamente nuje ce sentimmo cchiù ssicure si, passanno int’a na piazza, ’nce truvammo nu gippòne blindato, cu dduje surdate annanze, apparicchiate cu ccasche, giubbotte e ccu ffucile ’mbracciate? Overo ’e guagliune nuoste s’avarrian’a sèntere cchiù sserene e pprutette quanno, ascenno d’ ’a scola, se veneno a ttruvà annante nu pattuglione ’e militare c’ ’e mmimetiche ’ncuollo? Pe nnu’ pparlà ’e quanno ’e surdate è ffanno trasì pure dint’ê scole, pe lle ’mparà l’aducazzione civica e pparlà ’e democrazzia e ccustituzzione…
De Luca – ’o guvernatore d’ ’a Campania – fuje uno d’ ’e primme che pparlaje d’ ’a necessità ’e cumbattere gente scrianzate che nu’ rrispettano ’e rrèole anti-Covìd, ausanno pure ’e surdate comm’a ppulizziotte, ammacaro attrezzannole pure cu ’e lanzasciàmme… Però nunn è stato sul’isso, pecché paricchie ati sinnece e ppresidente dicettero e ffacettero ’a stessa cosa, scurdannose ca ll’esercito serve p’ ’a guerra, no pe ffa’ rispettà ’e llegge. Ô 2018, sulo int’a Reggione Campania, ’nce stevano 4.600 guardie ’e finanza, 9.500 carabbiniere, 8.550 pulezziotte e 1.000 surdate. Songo 23.600 perzone già accupate p’ ’a pubbreca sicurezza, pe nnu’ pparlà d’ ’e gguardie ’e pulezzia lucale (1.500 sulo a Nnapule), che manco so’ ppoche. Però pare ca memmanco ll’abbastano a cchille che guvernano, si l’urdemo decreto parla ’e ausà pure ’e surdate pe ffa’ rispettà ’e rrèole che sservono pe nnu’ ffà spannere ’e cuntaggie.
A ll’urdema Biennale ’e Venezzia 2020, ’mmiéz’a ll’ati film, steva chillo ’e nu reggista taliano, Giovanni Aloi, che ddiriggette na pellicula frangese, La troisiéme guerre (“ ’A terza guerra”), addò se conta ’e Leo, nu surdatiello che, doppo fernuto n’addestramento militare tuosto assaje, se trova ’mméce a ffà cuntrolle ’e pulezzia p’ ’e vvie ’e Parigge, stanno sempe all’erta pe mmezza d’ ’o periculo terrorista. Isso s’era esercitato a ffa’ ’a guerra, però se trova a ggirà armato e suspettuso stesso ’mmiéz’a ggente soja che, arraggiata comme sta, va prutestanno int’ê piazze e cche ttene ’nzavuòrio a sbirre, centàrme e, peggio ancora, surdate. Pe cchesto Leo cu ’e cumpagne suoje, addestrate sulo a ccumbattere, stanno a ddesàso int’a cchella ‘missione’ addò nun succede maje niente e addeventano sfastediuse ’ntesecute e ssuspettuse pecché, p’ ’o capo ch’ ’e cumanna ’nce stanno nemmiche, ’mpuoste e ttrainelle pe ttutte parte. Chistu bellu film ce fa capì ca ce avimm’a sta’ assaje attiente, pecchè abbasta poco p’aumentà ’a paranoia d’ ’e surdate e ppe ffà schiuppà chella tenzione cuntinua, pruvucanno overo na guerra. Accussì, è overo pure c’ausà ’e militare armate p’abbadà a ll’ordene pubbreco sicuramente nunn ’e ffa’ apprezzà d’ ’a gente, che nun se vônno sentì sempe ‘in trincea’ e tteneno ggià nu cuòfeno ’e probbleme p’ ’a capa. Militarizzà ’a sucietà civile nunn è maje na bella cosa, pirciò nuje âmm’a obbiettà e pprutestà si ’mméce – cu ’a scusa ’e ll’emergenze – vônno fa’ trasì surdate addovonca, ausannole senza mutivo comm’a mmiedece, ingegniere, pumpiere e pperzì… prufessure ’e scola. Na sucietà armata nunn è – e nnu’ ppo’ essere – cchiù sicura. Chello ca è ccerto è ca nun sarrà mmaje cchiù libbera e ddemocratica.
