Tempo di lettura: 3 minuti

‘O munno è strammo overamente. ’Sta pandemia ce sta ffacenno riflettere sempe cchiù spisso ’ncopp’a ccomme âmm’arredutto ’stu povero Chianeta, jenno appriésso a nnu mudello ’e fàuzo sveluppo, ch’àve destrutto l’ambiente e aggrannito semp’ ’e cchiù ’e ddifferenze ecunommeche, suciale e cculturale. Scienziate, psicologhe, suciologhe, ecunumiste e ppulitiche se songo addimannate si overamente putimm’ jì annanze accussì, cunzumanno resorze senza lémmete, sgarrupanno l’ambiente e sfruttanno pure ’e pperzone. Arricurdavo ll’ata vota ca perzì Papa Francisco dicette chiaro e ttunno ca ’stu mudello ’e sucietà nunn è sustenibbele, pecché nu’ ssulo spremme comm’a ppurtualle ’e bbene d’ ’a natura, ma fa vviulenza pure ê crestïane.


Pirciò ce so’ state – e cce songo – muvimente, urganizzazziune internazzionale e mmigliare d’attiviste mubbilitate pe ffa’ capì â ggente ca ce avimm’ ’a decidere a ccagnà strada, e ppure ampressa. Pecché ’a Terra nun ce ’a fa’ cchiù a ssustené ’o pìsemo ’e ’stu sistema cunzumista e antiecologgico, ma pure pecché l’uòmmene nu’ ssanno comme arresòrvese annanz’a sseccogne e llavarune, famme e ccaristie, malanne e epidemìe, tuttequante causate ’a nu fauzo sveluppo c’ammenaccia ’o futuro stesso d’ ’e figlie nuoste. Spiecàva tanno nu famuso ecologgista, Alex Langer, ca ’o mutto latino ’e ll’Olimpiade (citius, altius, fortius, che vvo’ dicere: “cchiù llesto, cchiù àveto, cchiù fforte”) s’avarrìa ’a cagnà cu: lentius, profundius, suavius, pe vvia ca ce avimm’a ’mparà a ccampà chianu-cchiano, cchiù prufunnamente e doce-doce…
Embé, ’sti ppruposte overo alternative pareno quase appassate ’a na putente campagna lanzata ’ncopp’ê mass media nientemeno d’ ’a Coca-Cola Company, c’ausaje ’e viérze ’e nu rappér ingrese-africano (George Mpanga) pe spubbrecà tuorno tuorno nu messaggio ’e cagnamiento ’ntitulato #OpenLikeNeverBefore, tradutto talianamente cu: “Come Mai Prima” (Comme maje primma). Ma tanno ’o marchio Coca-Cola nunn era ’o sìmmolo stesso d’ ’o cunzumìsemo? Comm’è succiesso allora c’ ’o cchiù gruosso pruduttore ’e bbevanne cu ’e bbullicine – c’ ’a 130 anne sta “arrefriscanno ’o munno” ma tene nu fatturato ’e quase 40 meliarde ’e dollare – mo se nne vene a ppredecà l’impurtanza d’ ’a fatica, d’ ’a cullabborazzione, d’ ’o putere d’ ’a ggente e ’e na manera ’e campà cchiù nnaturale e spuntanea? Comme se spiéca ca chi sta inquinanno terra e mmare, pruducenno ogn’anno 100 meliarde ’e bbutteglie ’e plasteca e ccunzumanno 300 meliarde ’e litre d’acqua, ’e botto addeventaje accussì attiento a ll’ambiente e ppure a cchille che ffaticano?
Int’ ’o video, George the Poet ce vene a ddicere ca nun sta scritto a nisciuna parte ca – dopp’ ’a pandemìa – avimm’ ’a turnà a cchella vecchia ‘nurmalità’; c’avimm’ ’a cagnà ’e ccose nuje pe pprimme; c’âmm’ ’a valutà ’e cchiù ’a fatica nosta; ca sarrìa cchiù mmeglio vviaggià ’e meno, ma apprezzanno ogne passo che ffacimmo; ca nun ce avimm’ ’a fa’ carrià a ll’ate, ma avarriamo gghì appriesso a cchello che sunnammo; ca nun ce avarriam’ ’a scurdà ca ’nzemmora simmo cchiù fforte, ecc. ecc. Però ’a sucietà cunzumisteca va propio ô ccuntrario, vuttànnoce a ffa’ tuttequante ’e stesse cose; a ffaticà sulo pe ffa’ sorde; a stutà chello che ssunnammo pe gghì appriesso a cchello che ffanno e ddiceno ll’ata ggente; a ccercà ’e vencere nuje cuntr’a ll’ate; a ppreggià ’e ccose artificiale e ttecnologgeche, scamettanno chelle semprece e nnaturale…
Pirciò nun ce avimm’a fa’ fesse ’a ’sti pubblecità, che sservono sulo pe ffa’ guadambià ancor’ ’e cchiù ’e mmultinazziunale – che sfruttano ‘a terra e cchi ’nce fatica – pensanno però ’e s’annettà na nummenata nu’ ttanto bona sulo cu nna passata ’e pittura verde e rrosa. Doppo ’e guaje passate cu ’sta pandemia – quanno n’ascimmo… – nunn abbastarrà ca facimmo “comme maje primma’, ma s’ha dda cagnà overamente, pecché niente ha dda cchiù essere comm’a primma. ’A Coca-Cola cuntinuasse pure a ppruducere e vvennere ’e vveppete cu ’e bullicine, però nun pruvasse a cce fa’ vevere pure ’e ppalle che vva cuntanno, pe pparè ‘alternativa’ e sse ‘sciacquà’ na brutta reputazzione.
Penzo ca so’ ppoche chille che ssapeno c’ ’a parola napulitana cola vo’ dicere talianamente ‘gazza’. Si guardammo ’ncopp’ô dizziunario napulitano, po’, truvammo pure frase comme: “fare la cola” (fare lo gnorri) o, pe ccità ’o granne Basile: “Comme se vede ca nun saje de cola”, pe ddicere: “Come si vede che non ci sai fare”. Embé, nu’ ppermettimmo pirciò ca mo ’a Coca-Cola ce vene a arrubbà perzì ll’alternativa, facennoce sentì ancora na vota: curnute e mmazzïate.