Na Mina… vagante: ’a prutagunista ’e ’sta fiction ffatica a Nnapule int’a nnu conzultorio d’ ’a Sanità, cumbattenno contr’a ll’ingiustizie
Nun so’ ppassate doje semmane ’a quanno me capitaje, doppo nu cuofeno ’e tiempo, ’e parlà d’assistente suciale e sservizzie suciale int’a nna riunione virtuale cu cculleghe che nu’ ssulo ffanno ’sta prufessione, ma s’occupano pure d’ ’o sinnacato e ’e ll’ordene prufessionale. L’occasione, nu poco appecundrosa, era ’o decennale d’ ’a morte ’e nu caro amico d’ ’o mio, Gigi Bucci, assistente suciale int’ô centro p’ ’e ttuossecodipennenze d’ ’a Sanità, ch’è stato ’o primmo presidente d’ ’a sezzione napulitana ’e tutt’ ’e duje. Sempe assaje attivo, affarato e nnuvativo, isso s’apprennetiva p’ ’o fatto ca spisso ’a gente tenevano n’immaggene sbagliata e ddefurmata ’e ll’assistente suciale. Quase comme si nun fosse nu prufessionista c’ajuta a ccercà ’a meglia soluzzione p’ascì ’a nu prubblema, ma na parte d’ ’o prubblema. ’O stereotipo ’e ll’assistente suciale che fa sulo carte pe ll’ufficie, che ss’occupa ’e cuntrullà cchiù ca ’e pruteggere, o adderittura che “sse vene a ppiglia ’e ccriature”, purtroppo nunn è mmuorto. Accussì capita spisso ca gente povera o sbenturata ’0 vedono comm’a nnu nemmmico ’mmece ca n’alleato. Propio pe cchesto Bucci se pruvaje a ffa’ – e a ffa’ circulà – nu filmino pe ffa’ capì chello che overo fanno ll’assistente suciale, p’ajutà famiglie sane a ascì ’a tante situazzione ’e besuogno.
Chella riunione m’è venuta a mmente quanno, na semmana doppo, m’è ccapitato ’e guardà pe ttelevisione ’o sceneggiato RAI “Mina Settembre”, pigliato libberamente ’a storie ’e Maurizzio De Giovanni. ’A prutagunista ’e ’sta fiction è nn’assistente suciale ’e strada, che ffatica a Nnapule int’a nnu conzultorio d’ ’a Sanità, cumbattenno ogne juorno contr’a ll’ingiustizie e cchello c’ ’a miseria produce. ’Sta bella figliola – buono ’nterpretata ’a Serena Rossi – capatosta e ccu nnu carattere deciso, tene pur’essa casine affettive e quistiune perzunale, però ssape sempe affruntà ’e pietto – e ppoco burocraticamente – prubbleme cumplicate. Guagliune che nun vanno cchiù â scola, giuvene ’e talento che vvanno appriesso â malavita, pate disperate che se vônno suicidà, figlie che ffujeno d’ ’a casa pecché se so’ ’nnammurate e nun supportano geniture apprenzive, femmene c’ ’o figlio pigliato a ostaggio d’ ’o cumpare cammurrista, ecc. ecc. Storie che ssuccedeno tutt’ ’e juorne, ma c’ ’a fiction mette cu ffantasia tutt’assieme, facennole addeventà avventure rumanzesche e ttrasfurmanno l’assistente suciale Mina Settembre int’a nn’eroina avventurosa e spericulata.
Overamente è ’a primma vota ca nu sceneggiato taliano parla ’e sti prubbleme e ttene pe pprutagunista n’assistente suciale. Gigi Bucci ne sarria stato cuntento, pecché accussì se po’ accummincià a ccapì che ttrattano femmene e uommene che ffanno ’stu mestiere, spisso scanusciuto o male canusciuto. Però s’ha dda dicere pure c’ ’a realtà d’ ’e servizzie suciale a Nnapule è assaje luntana ’a l’efficienza e ll’attivismo ’e Mina Settembre. Ancora tropp’assaje burocrazzia, ’o perzunale d’ ’e centre suciale ’e quartiere nunn abbasta, nun ce sta nu buono cullegamento ’e ll’ufficie communale cu ll’urganizzazione d’ ’o vuluntariato e d’ ’o terzo settore e spisso manca ’a cullabburazione ’ntra ll’assistente suciale d’ ’o Commune e cchille d’ ’e sservizzie sanitarie comme spitale e ccentre p’ ’e ttuossecodipennenze. Nu’ pparlammo ’e comme ’sta Amministrazzione ‘prugressista’ sta trattanno ’e ppuliteche suciale, spartute sciauratamente nientemeno ’nfra sette assessure divierze. Nu casino, addò chi pava ’o prezzo ’e ’stu scumbino so’ ssicuramente l’utente d’ ’e servizzie communale, ma pure ll’assistente suciale ’e ll’ufficie centrale e cchille d’ ’e Mmunecipaletà.
Quanno faticavo a Mmaterdei cu chill’amico int’ô Centro communitario d’ ’a stòreca Casa d’ ’o Scugnizzo ’e Mario Borrelli, ce simmo scuntrate pure nuje cu storie assaje simmele a cchelle raccuntate d’ ’o sceneggiato. Ma s’ha dda sapé ca, pe ttrattà case comm’a cchille, pe ll’assistente suciale nunn abbasta essere tuoste e ttènere fantasia. Ce vo’ tiempo, studio, pacienza e pprincipalmente capacetà ’e communecà cu empatìa, pecché ’o servizzio suciale è na cosa assaje deverza ’a ll’assistenza. N’atu ricordo perzunale che mme vene a mmente è quanno io e Luciano Scateni – che êvamo scritto assieme nu libbro che pparlava d’ ’e scugnizze – ’o ppresentajemo â libbreria ‘Feltrinelli’ ’e Cchiaja. Tanno se parlava ’e servizzie suciale a Nnapule e ppartecipava pure Serena Rossi, l’attrice c’ha ’nterpretato a Mmina Settembre… Quanno se dice ’a cumbinazzione!
