’A cummunetà cinìse tene a Nnapule na tradezzione longa e ’mpurtante accummenciata ô XVIII seculo
Vuje forze manco ’o ssapiveve ca mo mmo simmo trasute int’a ll’anno d’ ’o Voje (o Vùfero), animale sìmmolo ’e cuòccio e fforza d’anema. Però ’o ssapevano buono ’e 12.500 Cinìse che stanno ’nCampania, cchiù ’e 9.500 sulo a Nnapule e ppruvincia. ’Nfatte, accummincianno d’ ’e cinch’ ’e sera ’e miercurì 11 ’e febbraro, festiggiajeno pure a Nnapule ’o Capo ’e ll’Anno lloro, cu nn’evento urganizzato ’a ll’Istituto ‘Confucio’ e ll’assuciazzione ‘Ciao Cina’, patrucinato d’ ’o Cumune ’e Napule. ’Nc’è stato pure nu bellu spettaculo cu ccanzone cinese e nnapulitane, balle cu ’e ttammorre e nnu cullegamento cu Ppechino e Wuhuan. Ll’aurie d’ ’a Cetà ’e Napule l’hanno purtate ’o Sinneco de Magistris, ’o Presidente d’ ’a 2^ Munecepaletà Chirico e ’e Diretture d’ ’o Museo Archeologgico, Giulierini, e chillo ’e Capemonte, Bellenger.
Mo quaccuno se starrà addimannanno: va buono, però che cce azzeccammo nuje Napulitane cu ll’ausanze e rricurrenze d’ ’e Cinìse? E ’mmece c’azzeccammo, pe vvia ca ’sta cummunetà tene a Nnapule na tradezzione longa e ’mpurtante. Na storia accummenciata ô XVIII seculo, quanno nu prevete ebbolitano, don Matteo Ripa, jette missiunario cattolico â Cina, addò rummanette a ppredecà ’o Vangelo cchiù ’e 12 anne, d’ ’o 1711 ô 1723, faticanno â corte ’e ll’Imperatore pure comme pittore e rrammàro. Quann’isso turnaje a Nnapule, cu ati quatto prievete cinìse e nnu masto ’e lengua mannarìna, ô 1724 prencipiaje a ccustituì ’o ‘Riale Culleggio d’ ’e Cinìse’, addò se furmavano chille che vvulevano ji’ missiunarie â Cina, ma studiajeno pure giuvene lucale, comme Alfonso de’ Liguori.
Stabbeluto int’ ’a nu Munasterio ulivetano – e addiventato appriesso ‘Riale Culleggio Asiatico’ – l’istituto funnato ’a don Matteo Ripa, pe vvia d’ ’a riforma d’ ’o Ministro Francesco De Sanctis, ô seculo XIX cagnaje n’ata vota nomme e nnatura, trasfurmannose int’a chillo ‘Istituto Urientale’ che ffuje ’a primma unniversità int’ ’o munno sano addò se studiavano (e sse studiano ancora…) ’e llengue cinese e ggiappunese. Propio pe cchesto ’a Nnapule, int’ ’o quartiere Stella ce sta ancora na via chiammata ‘Sagliuta d’ ’e Cinìse’, che pporta a cchella villa d’ ’o seculo XVI, po’ cunvento ulivetano e Cchiesia ‘d’ ’a Sacra Famiglia’, che Ripa facette addiventà ‘Culleggio d’ ’e Cinise’.
Nun ce scurdammo pure che ll’arte urientale è ppresente a Nnapule int’â bella ‘Sala Cinese’ d’ ’a Reggia ‘e Puortece e cca cullezzione ’e purcellane d’ ’a Cina e d’ ’o Giappone se trovano int’a ll’ate palazze riale napulitane e specialmente ô Museo ‘Duca di Martina’, ô Ciardino vommerese d’ ’a ‘Floridiana’. Nun scurdammo manco ’a tradezzione urientale ’e ll’arte marziale, che a Nnapule cuntinua int’ ’e ppalestre addò nu cuofeno ’e guagliune/one– ’struìte ’a maste famuse – se so’ ffurmate a ccumbattere aggrazziatamente, ’mparannose ’e mmosse ’e Karate, Kung Fu, Ju-Jutsu e Ttai-Chi. ’A cummunetà cinese, però, fa parte d’ ’a cità nosta ’ncopp’a ttutto p’ ’o settore cummerciale, cu mmercate gruosse assaje a Ppunticielle, ma pure cu nu cuofeno ’e puteche e rristurante urientale â Duchesca, ô Vommero e int’a ll’ate quartiere.
Embè, apprufittammo d’ ’a festa d’ ’o Cap’ ’e ll’Anno Cinese pe ccanoscere e ppratteccà cchiù mmeglio ’sta cummunetà, che ttene na cultura e n’arte assaje antiche e na lengua e lletteratura che pputimmo ancora studià, propio grazzie a cchillu missiunario nuosto, ’o primmo che ffuje capace d’arapì na via overamente nova e gglubbale, riuscenno a ppurtà ’o Vangelo ê Cinise e ’a civiltà cinese a Nnapule!
