“I due colonnelli”: accussì se ’ntitulava nu film ’e Steno d’ ’o 1963, addò chillu genio ’e Totò faceva ’a parte ’e nu culunnello ’e ll’esercito taliano che, justo â viggilia d’ ’a caduta d’ ’o reggime ’e Mussulino, se truvaje a occupà nu paesiello grieco addò primma stevano ’e ttruppe ‘ngrése, cummanate d’ ’o culunnello Henderson. Nu film tennero e spassuso addò, ô finale, pure ’o culunnello Di Maggio truvarrà ’a manera ’e se riscattà, a ffronte d’ ’a ferocia nazzista d’ ’o novo occupante, ’o maggiore germanese Kruger. Sì, propio chillo che, tutto ’nquartato, alluccava: “Batàte colonello che io ho carta bianca!”, pigliannose accussì ’a risposta culurita che paricchie ’e nuje s’arricordano…
Ogge, però, ve voglio parlà ’e duje ammiraglie mericane, che sse dettero ’o ccagno ô Cummanno NATO “J.F.C. Naples” ô Laco Patria, int’a Ggiugliano ’nCampania (NA). Era viernarì 17 ’e luglio (già ’sta data dice quaccosa…) quanno s’è ttenuta ’a ceremmonia pe ffa’ festa a ll’amm. James G. Foggo III (che sse ne va ’mpenzione) e ô cumannante novo, ll’amm. Robert P. Burke, che (comm’a cchillo ’e primma) accussì è addeventato pure Capo d’ ’a Marina mericana pe ll’Europa e ll’Afreca. A ccelebbrà ’stu cagno (pure si nun cagna niente…) era arrivato a Nnapule nientemeno ’o Cummannante Supremo d’ ’a NATO int’a ll’Europa, gen. Todd Wolters, c’alludaje l’amm. Foggo, che êva guidato missiune d’ ’a NATO int’ê Balcane e a ll’Iraq e ll’esercitazzione Trident Juncture 2018, addò participajeno 50.000 militare, mannate ’a 31 paìse.
’E duje ammiraglie, cu ll’uniforme janca e ccarreche ’e cemmeraglie, facettero pure lloro nu bello discurzo, festiggiate cu ssuone ’e campane, trummette, inne, salute e cunzegne ’e bannera, e ccuncrudettero ’sta tuccante ceremmonia taglianno ’nzemmora na grossa torta tipo ‘gateau mariage’, che tteneva disegnato ’nmiezo nu sottomarino, ’ncoppa ’e sìmbule d’ ’a NATO e dd’ ’a Marina Mericana e ssotto ’e nomme ’e tutt’e dduje. A ppruposeto: ’o cummannante ascente se chiamma Foggo – nomme scuzzese antico che vvuleva dicere: ‘neglia’ (nebbia)… – e chillu novo se chiamma Burke – n’atu nomme ‘ngrese antico che vveneva a ddicere: ‘affucà’, ‘cummiglià’… Embé, ’o ssapevamo già ca chello che succede ô Laco Patria, a ssule 25 chilometre ’a Napule, è top secret e cc’ ’a gente nurmale nu’ ppo’ sapé (e nunn ave ’a sapé) niente ’e chello che stanno pruggettanno ll’Alliate dint’a uno d’ ’e Cummanne NATO cchiù ’mpurtante d’ ’o munno, addò ’a 70 anne pigliano decisiune strateggiche ’ncoppa a capa nosta. Però chilli nomme (Affucamiento,doppo a Nneglia…) nun ce fanno sperà ca sta cagnanno overo quaccosa int’a cchella struttura muderna e tecnologgica, assaje grossa (330.000 metre quatre pe 2.500 militare) e ppure ccustosa (165 meliune d’euro, cchiù 21 meliune comme Funne F.A.S. e 5 meliune d’ ’a Pruvincia – Cetà Metropolitana ’e Napule. E pperò, contano e rripeteno chille signure cull’uniforme, tuttoquanto serve sulo pe ppruteggere ’a sicurezza nosta e p’addefennere ’a libbertà…
Cantava ô 1977 Pino Daniele: «E l’America è arrivata / nce ha purtato tanti cose / so’ tant’anne e tanta storia / e nun se ne va. / S’è pigliate ’e meglio posti ’e chesta città/ mentre nuje jettammo ’o sango / dinto ’e quartiere â Sanità…». Cundicenno, dint’a n’ata canzona d’ ’o 1989: «’O ’mericano beve ’a birra ma le piace ’o vino / ’e nave ’e guerra sempe vicine / ’o ’mericano è n’amico / e nun te lascia sulo…».
E po’ nun ce scurdammo manco ca, addò mo sta ’o Cummanno napulitano d’ ’a NATO, ’nce steva tanno ’a villa d’ ’o famuso generale rumano Publio Curnelio Scipione ditto ll’Africano – arraggiato cu ll’ingrata patria soja – che sse retiraje vicino a cchillu laco (pirciò chiammato Patria) e cce murette ô 183 primm’ ’e Cristo. Pur’isso s’ ’a pigliava sempe cu ’e Ccartagginise (ll’Africane ’e tanno), che nu’ ffernette maje ’e cumbattere cu ’e gguerre puniche, pecché s’era miso ’ncapa ca sulo sgarrupanno Cartaggene Roma puteva sta’ overamente secura… Dujemila e dduiciento anne doppo, pare c’ ’a canzona rummane sempe ’a stessa e accussì ’e Mmericane stanno lloco justo pe cce pruteggere. Pecché, comme cantava Pino: “’O ’mericano è n’amico, e nun te lassa sulo…”.
