È ppassato justo n’anno ’a quanno accumminciaje l’avventura ’e ll’articule c’aggio scritto napulitanamente pe nnu ggiurnale curaggiuso che nu’ ppe nniente se chiamma ‘napoli’. So’ ccuntento, però me pare ca nun abbasta appiccià na canneluccia ’ncopp’â torta pe ffa’ festa. Doppo n’anno vale ’a pena ’e raggiunà ’ncopp’â ’sta bella sperienzia, pe ccapì si quaccosa sta cagnanno overamente. ’A primma cosa è c’ ’a ggente nun se fanno cchiù maraveglia liggenno n’articulo ’e giurnale scritto ’nNapulitano, pure si rummane na cosa nu pucurillo strevuza e rrecenale. Pe vvia ca nun ce sta abbitudene a lleggere na lengua quase sulo parlata, ’nfatte, pure Napulitane verace fanno ancora fatica quanno stanno annante a nna paggena sana scritta napulitanamente.
Sarrà ppe nnu prubblema ortografico, datosi che nisciuno l’ave ancora ’mparato buono ’e rreole pe scrivere senza sgarrà. Sarrà ppecché ’e ppoche cose scritte che sse vedono tuorno tuorno (cartielle, puisie, canzone, frase liggiute ’ncopp’â internét o pittate ’ncopp’ê mure) fanno adderezzà ’e capille. Sarrà ppure pecché nu cuofeno ’e parole napulitane stanno ggià scumparenno, rimpiazzate ’a nu slang ‘napulese’ nu poco vastardo… Fatt’è ca lleggere nu testo napulitano pe quaccheduno nunn è ppropeto facele facele. ’O guajo è ca meno se fa na cosa e mmeno se sape fa’. Sulo nu paro d’editore ’e giurnale hanno tenuto ’o curaggio ’e pubbrecà articule napulitane, pe ppruvà a mmenà ’nterra ’o muro ’e l’autocensura ’e chi se mette scuorno stesso d’ ’a lengua soja.
E accussì,chianu chiano, forze quaccosa sta ccagnanno, pure si nu’ mmancano maje chille c’arricciano ’o nasillo pecché lle pare na cosa pruvinciale, o pure che se penzano ca ’o Nnapulitano ha dda rummané nu dialetto sulo parlato o, casummaje, na materia ’e studio pe ll’accademmie, manco si fosse na lengua antica, comm’ ’o llatino o ’o ssanscrito… Embé, mo ca chillu muro è stato sfravecato, me pare necessario ’e ji’ annanze, cercanno ’e ffa’ ate sperienzie ’e scrittura che – cu tutt’ ’o rispetto – nun songo però sulo puisìe, canzunette o bbattute pe ffa ridere â ggente int’a ccinema e ttriate. S’ha dda pruvà a scrivere napulitanamente pure quanno se parla ’e cronaca, ’e scienza, ’e pulitica, accussì se fernesce ’e trattà ’o Nnapulitano comme lengua vascia, na parlata ’e serie B che sserve sulamente pe ppazzià o pe ’ntennerì.
Io aggio pruvato a ffa’ ’a parta mia e, int’a n’anno, aggio scritto ’ncopp’ê fatte che succedeno tutt’ ’e juorne, specialmente a Nnapule, ma aggio parlato pure ’e nu cuofeno d’argumiente, che vvanno d’ ’a partecipazzione puliteca ê prubbleme ambientale, d’ ’a necessità ’e na scutuliata meridionalista ê quistione d’ ’o militarisemo e d’ ’a guerra. Aggio scritto ’e quanto po’ essere attuale ’o penziero ’e Filangieri ma pure d’ ’a fatica che nun ce sta, d’ ’e traspuorte pubbrece, ’e na bbona alimentazzione, d’ ’a sanità, d’ ’e museje, ’e parche cetatine e ccemeterie, d’ ’e ffeste e ttradezziune napulitane e pperzì d’ ’o coronavirusse… Embé, nu bello ventaglio ’e prubbleme, justo p’addimustrà ca c’ ’o Nnapulitano putimmo parlà e scrivere ’e tutte cose, sapenno pure ca stammo ausanno na lengua nobbele, che ttene secule e ssecule ’e storia e se po’ avantà ’e na letteratura che pparte d’ ’0 XIII seculo p’arrivà ’nfin’a mmo.
Pe cchesto, ce avimm’ ’a sta’ attiente ca nu munno sano e na cultura unneca nu’ ffernesceno sparafunnate e ssubbissate ’a na globbalizzazione catammara, che vva scancellanno ’e ddevierzetà pusetive d’ ’e cculture, pe ttramente ca sta aggravanno ancora ’e cchiù ’e ddifferenze socio-econommeche. Pirciò âmm’ ’a fa’ festa si ’sta sperienzia c’ ’o ggiurnale ‘napoli’, doppo n’anno sano, è sservuta a scetà – pure nu pucurillo – ’a cuscienzia ca è overo ca Napulitane verace se nasce, però s’ha dda pure addeventà. Aùrie!
