Ah, comm’è bbella ’a staggione!…
Accussì s’intitulava na canzona napulitana d’’o 1924, scritta ’a Rodolfo Falvo e Gianni Pisano. Ogge, però, ’a putimo cità sulo cu nnu poco d’ironia, pe vvia ca chesta d’’o 2020 me pare ’a staggione cchiù stramma ’a nu cuofeno d’anne. Sarrà pe mmezza d’’o Covìd, ma nun m’arricordo na staggione accussì pazzoteca, addò stessa ’a parola ‘vacanze’ pare ca tene nu senzo devierzo. Doppo mise ’e lockdown, che ce àveno tenute ’nzerrate â casa comme muònace e ssore ’e clausura, ce penzavamo ca stevamo turnanno â nurmalità (o a cchella cosa che nuje chiammammo accussì…). E ’mméce no. ’O virùsse – spiecajeno ’e dutturune – s’era sulo addurmuto, ma nunn’era scumparuto né era stato overamente venciuto. Chillu marditto c’ ’a ‘curona’ ’ncapa, ’nzomma, steva ancora ’mpustato, aspettanno sulo ’e ce dà ’ncuollo n’ata vota. Pirciò nunn’êvamo ’a penzà ca tuttuquanto era fernuto e finalmente ce putevamo allascà…
’O turmiento d’’e mmesure ’e sicurezza (“mantenite ’a distanzia, mettitteve ’a mascarina e llavateve spisso ’e mmane”) rimpiazzaje chello d’’o classico ‘disco per l’estate’ ’e na vota. Na canzona bastantamente scucciante (pure si nnecessaria) che ce ave secutato pe ttutta ’a staggione, ’ncopp’ê spiagge e ’ncopp’â muntagna, ’ntussecannoce chellu ppoco ’e vacanze, facenno zumpà prenotazziune, lemitannoce assaje int’’e viagge fora a ll’Italia e faccenno rummané mieze vacante alberghe e rristurante. Na staggione overo stramma, addò pure fa’ ’a spesa int’’o supermercato teneva quaccosa ’e surreale, c’ ’a ggente cu custumette e ciantelle ’e mare c’accattavano puparuole e mmulignane, perzeche e mellune, muzzarelle e ppresutto, accunciate però comme mierece ’e spitale, cu gguante e mmascarine chirurgeche…
“Andrà tutto bene”, dicevano tanno. Mo però nu’ ssongo cchiù accussì sicure e ’a staggione 2020 – arredotta a nnu paro ’e semmane ’e vacanzielle – sta ggià fernenno, mentre accummencia na ‘staggione’ assaje cchiù cumplicata: chella d’’a scola. Nun ce stanno ancora aule e bbancarielle bastante; forze s’averranno ’a fa’ duppie turne o s’ha dda turnà n’ata vota â ‘didattica a distanza’. Accussì guagliune e gguaglione – comme maeste e pprufessure – farranno lezzione mascarate e cu ll’amuchina a ppurtata ’e mano, o pure addereto â telecammerina ‘e nu compiutèr…
Però tuttu ’stu pparlà d’’o Covìd me pare ca ce sta sbianno ’a cose assaje ’mpurtante e cche ddepennono ’a nuje, comme ’e vvutazziune reggiunale e cummunale e ’o referendùm pe ccunfermà o no ’a legge c’arreducette â mmità ’o nummero ’e deputate e ssenature che cce avessero ’a rappresentà ô Parlamento.
Attuorno a nnuje ’o munno cuntinua a ggirà, spisso malamente, però ’a ggente mo pareno cchiù preoccupate p’ ’a pandemìa ca p’ ’e gguerre, ’e ccrise econommeche e ’e cuntinue stierne a ll’ambiente. Accussì cuntinuammo a cce apprennetì – e ppure justamente – pe ll’infezzione d’’o Covìd che se sta spannenno n’ata vota, ma nun me pare ca ce stammo decidenno a ccagnà strada e mmudello ’e sveluppo.
Pure Napule nosta pare ancora suspesa, senza ce da’ nu signale ca quaccosa sta overo cagnanno, scamazzata comm’è ’mmiezo a nna crise econommeca e ppuliteca assaje seria, ma senza na pruspettiva amministrativa chiara e nu pruggetto alternativo. Verde cetadino scancellato o abbandunato; traspuorte pubblece arredutte ô mminimo; scole arrepezzate; prubbleme strascenate senza soluzzione pe’ nu cuofeno d’anne (tipo ’a bunifeca ’e Bagnole e ’e pruggette p’’a zona orientale). ’O decentramento amministrativo manco s’è mmuoppeto ’e nu passo e ’e ddecisiune cuntinuano a ppassà sulo p’’a Giunta, senza na participazzione overa d’’e cetadine e associazziune, cumitate e aggregazziune suciale. Pure a Reggione, cu ttutto ca se vota a Settembre, nu’ ttene na visione ’e nu sveluppo devierzo, comme si tuttuquanto se fosse arredutto sulo a cce assicurà ca ’o virùsse curunato nun torna a sse spannere, ammescanno spisso ’a prevenzione sanitaria cu nu cuntrollo pulizziesco d’’a vita nosta.
“Ah, comm’è bbella ’a staggione / senza lampe e ssenza tuone,/ senza viento, a ccammenà. / Ma, si fa caldo ‘a matina / faje nu bagno a Mmargellina, / te refrische llà pe llà… ”. Accussì cantavano a Nnapule ’o seculo passato, quanno nun ce steva ’o Covìd, se puteva cammenà senza mascarine ’ncopp’ ’o musso e pe sse fa’ nu bagno a mmare nun c’era besuogno d’’a prenotazzione. Però chesta staggione – pure chella econommeca e puliteca – è cchiù caura ancora e nun s’è truvato chello c’ ’a putesse overo… refriscà.
