«Cantà de Cetate zeffonnata / Voglio, e mmo m’è benuto sto golio / E cchiù de na perzona strasformata / Fare sentir co lo canto mio; / No cierto tempo Agnano fu chiammata / Sta Cetate de chi mo ve parl’io; / Ma pe bolè de Giove, auto d’Agnano /Mo remmaso non c’è, che no pantano».
Accussì accummencia l’Agnano zeffonnato ‘poemma aroico’ scritto ’nvierze ô 1678 ’a Andrea Perrucci, pueta siculo-napulitano canusciuto ’ncopp’a ttutto p’ ’a ‘Cantata dei Pastori’). Chillu poema satirico se referiva a nna tradezzione assaje antica, che pparlava ’e na cetà – Agnano – che na terribbele eruzzione vulcaneca e nu terramoto êvano zeffunnata a sott’ô laco (pantano) che ppigliaje ’o suoccio nomme, ma che a ll’Ottuciento fuje asseccato.
Embé, quase tre ssecule e mmiezo doppo, d’Agnano nun se parla cchiù int’a nu puema satirico ma ’ncopp’ a ggiurnale e ttelevisiune, pecché p’ ’o pruggetto GeoGrid, appujato d’ ’a Riggione, so’ state scavate puzze pe ccercà ’e sfruttà l’energia geotermica ’e na terra assaje vulcaneca e ssismica, comme chella d’ ’e Campe Flegreje. Na terra che pperò ’a secule e ssecule cuntinua a se sullevà p’ ’o bradisismo e addò ’nce sta nu vulcano ancora attivo, ’a Zurfatara, una d’ ’e quaranta vocche vulcaneche flegreje. ’Nfra Pezzuole e Agnano ’a terra caccia ’a paricchie parte fummo, vapure cavere e ggasse: propio pe cchesto ce aveno appizzato l’uocchie a coppa tutte chille che vvônno sfruttà l’energia d’ ’o calore (geotermia), pruggettanno scavamiente ’e puzze.
Fatt’è ca – senza ca nisciuno se pigliaje ’a rispunzabbilità d’avé appruvato l’inizzio d’ ’o pruggetto (cunnutto d’ ’a sucietà napulitana Graded cu 4 meliune cacciate d’ ’a Riggione Campania, però ggià ffermato ô 2015) – quanno ’e ttrivelle hanno sfussechiato na zona d’Agnano (via Scarfoglio – via Antiniana) è succieso chello che se puteva facilmente mmaggenà. D’ ’e pertuse d’ ’o scavo è mmuntata na culonna assaje àveta ’e fummo, vapore e ggasse e accussì, ’a cchiù ’e nu mese, ’a ggente che ccampa e ffatica lloco stanno rispiranno anidride carboneca e zurfurosa cu ate schifezze.
Eppure nu geologo famuso comme Giuseppe Mastrolorenzo l’êva ditto già diece anne fa ca era assaje periculoso fa’ sti scavamiente dint’a ll’area vulcaneca e ssismica che tene ’o riseco cchiù gruosso d’ ’o munno. Ca nun era ’o caso ’e strubbà n’equilibbrio idrogeologgico assaje fraggile e ddilicato, spertusanno chillu turreno senz’essere sicure ’e nu ffa’ gruosse danne. Mo, pe ttramente ca pulitiche e scienziate se stanno ancora cunzultanno, ’o guajo già è stato fatto, però nnisciuno sape overamente chello che po’ ssuccedere. Tuttequante chille che ssongo intervenute – cunzigliere riggiunale, cumitate ’e cetatine e assuciazziune ambientaliste – hanno chiesto ’e fa’ chiudere subbeto chillu puzzo, pe scanzà pericule cchiù gruosse ancora, comme schiuoppete o subbissamiente d’ ’o turreno e ate inquinamiente ’e ll’aria.
Però, mentre a scavà puzze è ssempre facile, appilarle quanno s’è aperta na nova vocca fumarolica nunn è accussì ssemprece e pputarria addeventà pure periculoso, comme dice ’o geologo Mastrolorenzo, che s’apprennetisce p’ ’e ccunseguenze che ppônno succedere int’a ’sti case. ’A cosa cchiù preoccupante è ca pare ca nnun ce sta nu piano d’emergenza e ca, pure doppo ca c’è stato n’esposto â Maggistratura, nisciuno ha ddeciso ancora comm’ascì ’a sta situazzione. Pe mmo, ’a cosa cchiù ’mpurtante è assicurà ’a salute d’ ’a ggente d’Agnano e ppruteggere chella zona ’a riseche cchiù gruosse. Ma ’e cetatine napulitane e puzzulane teneno pure ’o deritto ’e sapé chi è stato a dda’ ’o premmesso pe scavà puzze ch’erano state fermate cinc’anne fa, pruvucanno stu ddiece ’e guajo int’ê Campe Flegreje.
‘Stu geyser d’Agnano – àveto 80 metre… – è nu sìmmolo ’e comme scienzia e ttecnologgia nu ssempe ce fanno campà cchiù ssicure e pprutette, quanno ce stanno pe mmiezo ll’interesse ’e chi vo fa’ sorde pure c’ ’a scusa ’e l’energia ‘naturale’. C’hanno già ppruvato a l’appilà, però vapure cavere, acqua, fummo e ffango stanno ascenno ’a n’ata parte. Accussì ’sta situazzione rummane periculosamente for’ ’e cuntrollo, senza manco tené nu piano pe sfullà ’a ggente, si – arrassusìa – sarrà necessario.
Sperammo sulo ca nu pueta d’ ’o seculo XXII nun avvarrà maje ’a cuntà pure chest’ata storia, scrivenno nu novo… “Agnano Zeffonnato”.
