Paìse e ‘mprese d’ ‘o Nord se songo arreccute sfruttanno ‘e ddote naturale d’ ‘o Sud, pruducenno nu ‘debbeto ecologgico’
“Stammo spremmenno ‘e rresorze d’ ‘o Chianeta. Spremménnole comme si fosse nu purtuallo. Paìse e ‘mprese d’ ‘o Nord se songo arreccute sfruttanno ‘e ddote naturale d’ ‘o Sud, pruducenno nu ‘debbeto ecologgico’. Chi pavarrà ‘stu debbeto? E ppo’, ‘o debbeto ecologgico s’aggrannisce quanno ‘e mmultinazziunale fanno – fora d’ ‘o Paese lloro – chello che lloco ddinto nunn ll’è ccunzentito. Chesto ce ‘ncujéta. Ogge – no dimane – ogge ce avimm’ ‘a piglià cura d’ ‘o Criato cu rrispunzabbelità. Priammo pecché ‘e rresorze d’ ‘o Chianeta nu’ ssiano sacchïate, ma spartute ‘e na manera justa e rrispettosa. No a ll’accuppamiento, sì â spartenza!”
‘Sti pparole nun songo d’ ‘e mmeje, ma l’ha ditte Papa Francisco, cu ll’accasione d’ ‘o mese addedecato â prutezzione d’ ‘o Criato (1° ‘e settembre – 4 ‘e ottobre). Comme sempe, so’ pparole semprece e assaje chiare, che nnisciuno po’ ffégnere ‘e nu’ ccapì. E overo stammo spremmenno ‘stu chianeta nuosto comm’a nnu limone o nu purtuallo, accussì comme stammo sfruttanno e scamazzanno senza piatà ‘e pperzone povere d’ ‘o Sud (‘a periferia d’ ‘o munno) p’arrecchì chelle d’ ‘o Nord (‘o centro). ‘A soccia viulenza che ccoglie uommene, femmene e ccriature scellate e ffraggele, ‘nfatte, coglie e cciacca pure ‘a Terra, che avarria ‘a essere na “casa cummune” pe ttuttuquante.
Assaje spisso parlammo e lleggimmo d’ ‘o pesante debbeto pubbleco che ttenimmo, e ccu rraggione ce apprenettimmo pe ccapì comme ne putessemo ascì. Però nu’ mme pare ca ce stammo accupanno bastantemente ‘e chillu ‘debbeto ecologgico’ che Ppapa Francisco ce ave avvertuto ca s’aggrannisce semp’ ‘e cchiù e cc’ ‘a ggente povera e debbole d’ ‘o munno sano pavarrà ‘e na manera cchiù ttosta. “Curnute e mmazziate”, pe ccità nu ditto antico che cce fa capì ca l’ingiustizzia suciale, ‘a viulenza puliteca e ‘o sfruttamento ecologgico camminano sempe ‘nzieme, jenno chiaramente contr’â vuluntà ‘e Dio. “Tuttuquanto ‘o Criato s’allamenta e ppatesce ‘nfin’a ogge p’ ‘e dulure d’ ‘o parturo…” – scrivette dduje secule passate san Paulo int’ ‘a lettera ê Rumane. Però mo, si nun stammo attente ê lamiente d’ ‘o Chianeta, sarranno tuttequante l’uommene a nne pavà, cu ll’interesse, ‘e ccunzequenzie…
“Pigliarse cura” d’ ‘o Criato nun vo’ dicere sulo sta’ ‘mpenziero pe ll’ambiente, ammentà tecnologgie cchiù nnove o pruvà a ppassà na mana ‘e pittura verde ‘ncopp’a ll’economia che ggià tenimmo, manco si fosse l’unneca pussibbele. Nu’ pputimmo arreducere ‘a ‘cura d’ ‘o Criato’ sulo a nn’apprenzione pe cchello che avimmo pruvucato cu ll’inquinamento e ‘o scarfamiento globbale. Quanno nu mudello ‘e sveluppo nunn è bono, pecché è malato a ppe ssé, nun abbastano pinule e sceruppe, ma s’ha ddà cagnà overo direzzione. Na sucietà senza giustizzia e ssenza rispetto pe ll’urdeme d’ ‘a Terra sape sulo sfruttà ‘e rresorze naturale, spremmenno uommene, anemale e ccose comm’a ppurtualle.
“A ccetrangule spremmute se metteno ‘e piere ‘ncoppa”, diceva nu pruverbio antico, ma accussì succede pure mo, pecché ‘e puverielle stanno passanno – e ppassarranno – ‘e guaje ambientale chiù gruosse (carastie, seccogne, lavarune, famme e mmalatie…), addò ‘e ricchepellune s’arrecchisceno – e s’arrecchiranno ancora ‘e cchiù – perzì cu cchelle disgrazzie… Però n’atu pruverbio diceva: “Guajo fatto, remmedio aspetta”. Pirciò Papa Francisco ha scritto ca ce âmm’ ‘a piglià ‘e rispunzabbelità noste, nu’ ffermannoce a cchiagnere p’ê prubbleme ambientale, ma accummincianno a cce movere. Avimm’ ‘a cumbattere contr’a cchi cuntinua a ssacchïà ‘e rresorze naturale, che ‘mmece s’hann’ ‘a spartere cchiù mmeglio, ausanno giustizzia e rrispetto p’ ‘a casa cummune.
