Doppo Pasca ’o core s’arape â speranza…

“Doppo Pasca, vieneme pesca”, se diceva anticamente, pe ffa capì ca ’e ccose, dopp’ ’a risurrezione, pônno sulo cagnà e nniente po’ essere comm’apprimma. E pperò…’a situazzione sanitaria nu’ ppare overamente cagnata manco doppo ’e cchiusure raffurzate ’e ’sta Pasca pittata ’e russo. Ô ccuntrario, sta muntanno ’arraggia d’ ’a gente che, doppo n’anno ’e sparpetuo, nun ce ’a fanno cchiù a ssuppurtà ’e ccunsequenzie d’ ’e guaje che ll’epidemia pruvucaje a ll’economia, â cultura e â vita ’e tutt’ ’e juorne. Oramaje ce stanno poca gente che ccuntinuano a ccredere ca “andràtuttobene” e, siccome “ogne nureco vene a lo pettene”, chell’arraggia se sta trasfurmanno ’mprutesta. Basta c’arapimmo nu giurnale pe ccapì ca nunn’abbasta chiammà nu generale cu ’e cemmeraglie a ccapo d’ ’o ‘cumbattimento’ contr’ô Covìd (comme si stessemmo overamente ’nguerra contr’a nnu virusse…) p’arrisorvere tuttequante ’e prubbleme.

E pperò pure ’o casino che cc’è stato ’ncopp’ê ffurniture d’ ’e vaccine ha scumbinato assaje ’e pruggette d’ ’o guverno, semmenanno scunfidenzia e appaura ’mmiez’â ggente, principalmente viecchie e ggiuvene. ’Nfatte, a Nnapule sulo uno ’ncopp’a dduje universitarie cunvucate a Ccapemonte e una ’ncopp’a ttre pperzone cu cchiù ’e 70 anne azzettajeno ’e se fa’ vaccinà cu ll’AstraZeneca. ’Sti refiute ’nCampania vanno d’ ’o 25% ô 50%, pe vvia c’ ’a gente nun se senteno secure c’ ’o vaccino d’ ’a cumpagnia anglo-svedese, che mmanco aveva cunzegnate tuttequante ’e ddose necessarie… Accussì pare ca sta succedenno ’nCampania, passate ’e ffeste ’e Pasca, pure cu ll’apertura d’ ’e scole elementare e mmedie, doppo ca erano state ’nzerrate paricchie mise.

E pperò nunn’è gghiuto tuttuquanto buono. Ce stanno sìnneche che nnun stanno accunzentenno ô decreto d’ ’o guverno e ’ncopp’ê giurnale se parla pure d’’o “caos refezione”. Ce sta n’istituto comprensivo ’e Bagnole, addò vanno 700 guagliune, c’ha accummenciato cu dduppie turne, rotazzione e llezzione a ddistanza, dop’ ’o tiempo che ggià rummanette ’nzerrato, pe vvia ca nun so’ state adeguate ’e scale antincendio… Nun è gghiuto cchiù mmeglio cu ll’apertura d’ ’e pputeche e nun se capisce manco pecché certe pônno vennere ’e mmerce lloro e ate nno. Accussì giuielliere, risturature, pizzaiuole e ccummerciante d’ ’o settore abbigliamento decidettero ’e  prutestà, mettenno ’nvetrina mutande e rreggipetto, cunziderate articule cchiù…necessarie. Pure ’e ‘mercatale’ stanno prutestanno, pecché so’ rummase chiuse pe ttropp’assaje tiempo e ppirciò arrisecano ’e nunn’arapì cchiù ’e pputeche lloro.

E pperò nun se se vônno cchiù assuggettà a ’stu divieto e accussì hanno prutestato, occupanno cu ccamionne e ffurgone ll’autostrada Roma-Napule a Ccaserta Nord. Centinara ’e machine so’ rummase attrappuliate dint’ô casino d’ ’o traffeco, cumpresa ll’automobbile d’ ’o presidente De Luca…Ati ppruteste ce so’ state a piazza Plebiscito, a Ggaribbaldi e ô mercatino ’e Fuoreròtta, pecché ’e mercatale nun capisceno comm’è ca ’e supermarket pônno vennere ma lloro hann’a sta’ ancora ’nzerrate, senza guadambià niente. Int’a ’stu periodo, pure cu ttutt’ ’e llemetazzione, s’è visto traffeco d’auto e mmotociclette. Però funiculare e mmetropolitane nun hanno funzionato pe Ppasca, e ’a linea 2 d’ ’a metropolitana napulitana è stata rallentata pe vvia ’e “inconvenienti tecnici”, pruvucanno retarde e pprubbleme â ggente c’ha dda ì’ a ffaticà. E ppo’, ’nce stanno assaje gente che ppenzano ca viaggià cu ’e mezze pubblece è periculoso, pe vvia ca facilmente se po’ piglià ll’infezzione.

E pperò manco chesto è overo, pecché 12 carabbiniere d’ ’o NAS – accumpagnate d’ ’o perzunale ’e ll’ASL Na1 – pe nna semmana sana so’ gghiute annanze e arreto ’ncopp’a pulmanne e ati mezze ’e trasporto cummunale. Poche giurnale, però, ripurtajeno ca, doppo ’sti ccuntrolle, nun s’è ttruvata manco ll’ombra d’ ’o virusse curunato. A pparte ’stu fatto, venimmo a ssapé ca cuntinua ’a truvata d’ ’o Cummune ’e Napule che, pe ffa’ sorde, doppo ’e trammué ’e ll’anne 20, se venne pure 10 triéne d’ ’a linea 1. Cinche che nu’ ffunzionano sarranno vennute a 18.000 euro (comme na BMW d’ ’o 2014 o na Giulia d’ ’o 2018), e ll’ati ccinche, che ffunzionano ma nun so’ state manutenute, custarranno 250.000 euro (comme nu SUV Mercedes novo).

E pperò quacche nutizzia cchiù bbona pure se trova qua e llà. P’essempio, ’o Cummune decidette ’e fa’ na nova pista p’ ’e bbiciclette, longa 2.5 chilometre, ’a piazza Bovio ’nfin’ô Centro Direzzionale. Custarrà cchiù ’e 170.000 euro e nnun se sape quanno ce sarrà overamente, però sapimmo comme stanno cumbinate ’e ppiste che cc’erano già… Ata nutizzia bunariella: ll’amministrazzione cummunale finalmente ha ccumpletato ll’intervento p’illuminà ’e purticate d’ ’a Galleria Umberto. Sperammo però ca vede luce pure ’o restauro d’ ’a parte ancora mancante d’ ’a Galleria, che mmeretarria ’e cchiù e avarrì’ ’a essere cchiù pprutetta e vvalorizzata. ’Nzomma, putimmo sulo sperà ca tuttequante ’sti ‘però’ scumpareno a ppoco â vota, rimpiazzate ’a tante ‘e’. Nuje sicuramente ’o sperammo. E pperò…