Ê 15 ’e maggio era ’a Jurnata Internazziunale ’e l’Obbiezzione ’e Cuscienza, ma nu cuofeno ’e ggente – specialmente giuvene – nu’ ssapeno manco ’e che stammo parlanno. ’Nfatte so’ ppassate 15 anne ’a quanno l’Italia suspennette (no abbulette…) ’o servizzio militare obbligatorio e accussì, comme a Nnapule tenimmo ’o ccafé suspeso, ’e taliane teneno ’a naja suspesa. C’ ’a legge d’ ’o 2005, che ppure nun scancellava ’o servizzio militare na vota e ppe ssempe, nisciuno giovane jette cchiù a ffa’ ’o surdato, però nisciuno putette fa’ manco ’o servizzio civile comme obbiettore ’e cuscienza. Pecchesto ’sta vota nun voglio parlà ’e pandemia, pecché me pare ca – a fforza ’e parlà d’ ’o Covìdde – ce stammo scurdanno c’ô munno ’nce stanno pprubbleme assaje gruosse e ppesante, comme caristie, crise ecologgiche e ppericule ’e na guerra atomica…
Pe ttramente ca ttelevisune e ggiurnale parlavano sulo d’ ’a pandemia, meliune ’e cristiane cuntinuavano a mmurì pe famme, malatie ’nfettive, bumbardamiente, innundazziune e stiente. Arraccumannavano ’e ce sta’ â casa, scurdannose però ’e dicere ca meliune e mmeliune ’e ggente nu’ ttenevano nisciuna casa, ma na barracca o na capanna o, peggio ancora, campavano mmiez’â via. Ce chiedevano ’e manténere sempe ’o distanziamento suciale, perònun ce raccuntajeno c’a mmarzo 15.000 surdate mericane erano arrivate pe ffa’ ’a cchiù grossa esercitazzione militare int’a 25 anne: Defender Europe. Avite capito buono: decine ’e migliare ’e surdate so’ vvenute cu aerei nave e ccarrarmate… pe cce addefennere. No d’ ’o virusse – anze paricchie e lloro, cumpreso ’o Cumannante, se pigliajeno ’a malatia – ma nientemeno d’ ’o periculo ’e n’invasione russa! Pure l’esercitazzione fuje suspesa, però ’sta specie ’e invasione pe ‘pruteggere’ l’Europa mo sta accummencianno n’ata vota…
Quanta ggente sape ca ’mmiezo ’e ppoche ’nnustrie taliane che nun chiudettero int’a ’stu tiempo ’e pandemia ce stevano chelle che ppruduceno l’arme p’ ’a guerra? So’ state cunsiderate ‘essenziali’, comme si nun putessemo fa’ a mmeno ’e custruì aerei pe’ bbumbardà, nave ’e guerra e carrarmate. Tenimmo 231 stabbilimiente taliane che ppruduceno arme e ammunizziune ma uno sulamente che ppruduce ventilature pulmunare… L’Italia spenne int’a n’anno 860 meliune sulo pe ccustruì F35, però cu 68 meliune che cacciammo ogne juorno p’ ’e spese militare se putessero fa’ nu cuofeno ’e cose, salvanno ’e vvite ‘mmece ca semmenà morte. L’obbiezzione ’e cuscienzia era – e rummane – l’unneca manera pe ddicere ’e NO a ’stu munno, addò è ’o cumplesso militare-’nnustriale’ che ddecide chi vive e cchi ha dda murì.
Mo nun ce sta né ’o servizzio militare obbligatorio né chillu civile. Fa’ ’o surdato oramaje è na ‘prufessione’, nu mestiere comm’a ll’ate, addò a essere recrutate songo specialmente ’e giuvene meridiunale, che nnu’ ttrovano fatica e s’hann’ ’a vennere comm’a mmercenarie. Eppure nuje Napulitane tenimmo na bella tradizzione antimilitarista e nnunviulenta. Passato ’o ’68, se facettero nu sacco ’e sperienzie ’e attività vuluntarie: centre sanitarie populare, scole ’e quartiere, centre ’e cummunità, mense proletarie…Paricchie ggiuvene refiutajeno ’e fa ’o surdato e, ‘nfin’ô 1972, jettero ’ngalera comme ‘renitente’. Però quanno fuje appruvata ’a legge 772/72 fuje possibbile ricusà ’o servizzio militare, facenno nu servizzio civile che ddurava 20 mise ’mmece ca 12. Pure ’nCampania ’e gruppe nunviulente s’organizzajeno e finalmente s’accumminciaje a ffaticà p’ ’a pace e nno p’ ’a guerra.
Quann’io faciétte chesta bella ’sperienzia â Casa d’ ’o Scugnizzo ’e Materdei, ’nce stette a ffaticà pe dddiece anne, primma comme vuluntario e po’ comme assistente suciale. Chillu ‘centro communitario’ – nato addò Mario Borrelli êv’accumminciato l’avventura soja cu ’e scugnizze – addeventaje pure nu centro pe ccoordinà ’o servizzio civile p’ ’o Sudd e ffurmà obbietture che vvenevano ’a tutt’Italia. Na bella fetta d’ ’o vuluntariato napulitano è ppassata p’ ’a Casa d’ ’o Scugnizzo e lloco nascette pure l’I.P.R.I., ’o primmo Istituto taliano p’ ’a ricerca ’ncopp’a pace. Mario Borrelli, Antonino Drago, Giuliana Martirani songo ’e nomme cchiù famuse ’nfra chille che s’occupajeno ’e ricerca, aducazzione e azzione p’ ’a pace, però d’ ’a sperienzia d’ ’o servizzio civile so’ passate paricchie perzone che songo ancora mo ’mpignate sucialmente e ppulitecamente. Ê nu peccato ca tropp’assaje giuvene nun sapeno niente ’e ’sta storia e ca, a ppoco â vota, se stanno rassignanno a ccampà int’a nu munno addò vence chi tene arme cchiù pputente e mmicidiale. Mu munno addò ’e militare se pigliano spazzie d’ ’a vita nosta, militarizzanno pure ’a scola, ’a sanità e ’a prutezzione civile. Nu munno addò pazzéano ancora cu ll’ atomica, comme si nunn’abbastassero tutt’ ’e guerre c’accideno ’a gente ogne juorno… ’A guerra è na pazzarìa – dicettero prufete, sante, scienziate e ppape – però, comm’ ’o Big Brother ’e Orwell, mo ce veneno a ddicere ca “’a guerra è ppace”. Ma nuje tenimmo na Custituzzione addò sta scritto chiaro e ttunno ca “l’Italia ‘schifa ‘a guerra’ e, doppo tant’anne, dicimmo ancora: “Gnornò!”
2 allegati