’A Giunta vo’ affidà ê private ’o vverde d’ ’a Villa Cummunale

Doppo paricchio tiempo, ’ncopp’ê giurnale napulitane se parlaancora d’ ’aVilla Cummunale. L’urdema volta fuje quanno ’o presidente De Luca facette chiudere parche e cciardine, comme si spannere ’o virusse fosse cchiù ffacele a ll’aria aperta e ’mmiez’ô vverde ca int’a nnu supermercato. ’E giurnale êvano dato pure ’a nutizzia ca, stesso dint’ ’a Villa, ’a vecchia e assaje sgarrupata ‘Casina del Boschetto’ (tanno ausata comme ‘Circulo d’ ’a Stampa’), d’ ’o 2015 è ppassata d’ ’o Cummune a ll’Acquario ‘Anton Dhorn’, p’ ’a fa’ addiventà nu Museo ’e Biologia Marina. Ma pe pparlà n’ata vota d’ ’a Villa Communale – semp’ ’e cchiù abbandunata, sternata e mmale arredutta, pure pe vvia d’ ’o cantiere d’’a metropolitana – c’è vvuluta n’ata penzata gloriosa ’e ll’Amministrazzione Cummunale. ’A Giunta, ’nfatte, decidette d’affidà pe ttre anne ’a manutenzione ordenaria ’e ’stu ciardino pubbreco, storeco e mmunumentale ê ccure ’e n’assuciazzione privata. Na decisione c’ha ppruvucato reazzione cuntrarie ’e ambientaliste, cumitate cetatìne e ppartite puliteche.
Comm’è ppussibbele – s’addimano tuttequante – ca nu bene culturale, artisteco e ambientale ’e chella ’mpurtanza, una d’ ’e mmaraveglie ’e ’sta Cità, è affidato a nn’assuciazzione comme si fosse nu ciardiniello qualunque? E ppo’: quanto ce putimmo fidà overamente d’ ’a sciampagneria disinteressata ’e ’sti bbeneffatture private? È comme si chi sta amministranno stentatamente Napule nosta stesse quase penzanno ’e svennere, a nnu piezzo â vota, ’o patremmonio ’e ’sta Cità. Na liquidazzione ’e fine staggione, pe ffà (o ccomunque pe sparambià) denare, accussì accuncianno ’e cunte che nu’ ttornano. Però tuttequante ’e Napulitane sanno buono e apprezzano assaje chillu ciardino antico, addò passajeno generazziune sane ’e guagliuncielle c’ ’o pallone e ’a bicicletta, migliara ’e ’nnammuratielle, caterbie ’e penziunate e nu cuofeno d’ata gente che ccercavano nu poco d’aria fresca e ppulita int’a chillu paravisiello d’arbere, arbuscielle, statue, chiantulelle addirose, funtane ’e marmulo e pprate chine ’e ciure culurate. Nu bene pubbreco, ’e tuttequante, e ppe cchesto ca ’st’operazzione streveza nunn’è piaciuta quase a nnisciuno.

Ê tiempe antiche ’a chiammajeno “delizzia d’ ’o Rre“, pecché fuje Carlo ’e Burbone che vvulette ’stu ciardino maravegliuso, cu nna superficie ’e 110.000 metre quatre, justo faccefronte ll’arenile cchiù bello d’ ’o munno, che ttanno arrivava addò mo ce sta sulo nu ‘lungomare’. Erano ll’anne ’80 d’ ’o XVIII seculo quanno ’o figlio, Ferdinando I, purtaje a ccumpimento ’stu pruggetto grannezzuso, grazzie a ll’architetto Carlo Vanvitelli, addò ’nce steva sulo ’a vecchia strata fravecata ô 1697 pe vvuluntà d’ ’o Viceré Medinacoeli, cu pparicchie arbere e 13 funtane. Dopp’ancora, ’stu ciardino fuje ristrutturato ’a Giuseppe Bonaparte e ppo’ ’a Ferdinando II ’e Burbone, che ’ncaricaje a Stefano Gasse ’e fa’ cchiù llongo ancora chillu ‘passeggio riale’, purtannolo addò mo sta Piazza d’ ’a Repubbleca e arrecchennolo cu nnu ‘boschetto’ e nnove specie d’arbere, curate d’ ’o tedescoFriedrich Dehnhardt, ispettore d’ ’o ‘Riale Orto Botaneco’. Ma sulo ô 1870 chillu sbrennente ciardino, addò tanno passiavano e ccravaccavano sulo gente nobbele (meno c’ ’a Nnatale e Ppiererotta), fuje finalmente apierto ô populo napulitano comme ‘Villa Cummunale’.
So’ ppassate 150 anne ’a quanno chella nobbele ‘passiata riale’ addiventaje patremmonio munecipale e bbene pubbleco. Ma nun ce scurdammo c’ ’a Villa Cummunale napulitana rummane nu ciardino storeco e mmunumentale, addò nun ce stanno sulo arbere prezziuse, ma pure 9 funtane artisteche, 1 obbelisco, 3 statue e 15 buste ’e marmulo, 2 tempiette neoclassiche, ’a ‘Casina Pumpeiana’, ’a Cassa Armoneca ’e Enrico Alvino, ’a Stazzione Zoologgeca ‘A. Dhorn’ e ppure ’a ‘Casina d’ ’o Boschetto’… ’Nzomma, nun stammo parlanno ’e nu prato cunduminiale o ’e nu ciardeniello d’ ’o paese, che po’ essere ‘affidato’ êccure ‘vuluntarie’ ‘e n’associazzione. È pe cchesto ca, pe mmettere na pezza a ll’incuria soja, chi guverna ’o Cummune ’e Napule nun se po’ arrisecà a ccausà nu pertuso ancora cchiù gruosso, facenno trasì gente private int’â ggestione d’ ’a Villa d’ ’e Napulitane.
Accussì Eduardo De Filippo arricurdava ’nvierze chillu paradisiello verde:
«Ma ce sta sempe ’a Villa Comunale / ch’ ‘e cugliàndere nterra sparpagliate? / […] Chella funtan’ ‘e fierro mmiez’ ‘o ffrisco /cu tre cannielle, e cu tre vaschetelle… / addò ferneva, fatto a barchetelle, / ’o libro ‘e scola… mèna ancora, o no? […] Nu juorn’ ‘e chisto, quanno è maletiempo, /ca so’ sicuro ’e nun truvà a nisciuno, / me ne vac’ ’int’ ’a Villa. E a uno a uno / veco ll’àlbere… […] E me voglio allungà fin’ ‘a funtana, / pè bèvere a canniello, guliuso…».
Sperammo ca quanno Eduardo decidarrà ’e scennere d’ ’o Paraviso pe tturnà a vvisità ’a Villa Cummunale, truvarrà ancora frisco, verde e ffuntane comm’a ttanno, e nno quacche ‘installazzione’ pubblecitaria o nnu distribbutore…d’acqua minerale…!