Tempo di lettura: 2 minuti

Napule nun fernesce maje ’e ce jénchiere ’e spanto

Napule nun fernesce maje ’e ce jénchiere ’e spanto, pecché è na cetà addò po’ ssuccedere tutto e ’o ccuntrario ’e tutto. Na cetà addò ’e prubbleme so’ vviecchie assaje, però ce sta na capacetà ecceziunale ’e se ’nventà soluzzione urigginale e ccreative. Però ’o rìseco è ca, dalle e ddalle, fernimmo cu ccredere ca tuttoquanto s’arresorve sulo grazzie â fantasia, e ppecchesto abbasta n’aizàta ’e capa pe sbruglià ogne matassa, pure si è ’mbrugliata e ’mpicciosa.

Sfuglianno ’e ccronache d’ ’e giurnale lucale, truvammo spisso nutizzie che cce lassano alluccute e ccunfuse, p’essempio chella ca, mentre ca p’ ’e ffeste ’e Natale nun putimmo manco ascì fora d’ ’o cummune pe gghì a ttruvà ’e pariente, ’e gguardie ’e finanza ’e Napule hanno fermato cammionne gruosse assaje, che jevano annanze e arreto, traffecanno abbusivamente rifiute: nientemeno 3 tunnellate ’e gomme pe mmachine e sserbature arruzzute addestenate â Libia e ppure 46 tunnellate ’e panne, pezzecaglie e rrobbavecchia varia, trasute ’nItalia d’ ’a Svizzera.
Leggimmo cu ppiacere ca s’appriparano a ’ngignà ’a filovia che ffarrà saglì na linea ’e filobbusse d’ ’o Museo Nazziunale ’nfin’ô spitale ‘Cardarelli’, però ce fanno sapé pure ca l’ANM sta arreducenno d’ ’o vinte pe cciento ’e ccorze d’ ’e pulmanne e ll’urario ’e chiusura ’e metro e ffuniculare. Nu’ pparlammo po’ d’ ’a Linea 6 d’ ’a Metropolitana, nata comme ‘Linea Tramviaria Rapida’ p’ ’e campiunate mundiale d’ ’o 1990, ma arredotta a nnu paro ’e chilometre ’e ferruvia sottaterra, sulo pe ccullegà Fuorerotta c’ ’o Municipio. Embé, passate 30 anne, po’ essere c’ ô 2021 finalmente sarrà ’ngignata ’sta famosa M6. Pe mmo sapimmo sulo c’ ’a stazzione ‘Mostra’ – ca siddivò arape a Mmaggio che vvene – sarrà ’ntitulata a Mmaradona. Comme se dice: “chi se cuntenta gode”. Male male che ppo’ ji’, ce stanno sempe ’e monopattine… Âmmo leggiuto pure ca ll’urganizzazione d’ ’e cummerciante napulitane facette nu bellu ‘spot’ pe ccuntrastà ’e vvènnete ‘online’ e addefennere ’e pputeche ’e quartiere. Pare overo na cosa bona, però nu’ ppareva ca ’nfin’a mmo se fusseno preoccupate assaje ’e pruteggere a bbarrette, tratturie e pputechelle riunale d’ ’a ’mpustatezza e squarciunarìa d’amburgherie, supermercate e ‘megastore’, nustrale e ffurastiere. N’ata nutizzia spassosa è ca, justo mentre ’o presidente De Luca appresentava ’e ccinche priorità ’e ll’amministrazzione soja, cundicenno ca una è cchella d’ ’a diggitalizzazzione, manco si ’o ffacessero apposta, se nn’è zzumpato ’o cullegamento… e bbonanotte â diretta ‘streaming’ d’ ’o Cunziglio Reggiunale…

Menumale ca ce putimmo cunzulà cu na bella ‘primmera’ d’ ’o San Carlo, addò mettarranno ’nscena l’opera lirica ‘Cavalleria rusticana’. Però nu’ ttrasenno dint’â cchillu maravigliuso e antico triato napulitano, ma guardannoce â casa nosta ’a diretta facebook d’ ’o spettaculo ’ncopp’ô compiutèr. Sulo accussì, oramaje, putimmo participà a ccungresse, fa’ lezziune d’ingrese, ce ’mparà a ccucenà ricette p’ ’a cena ’e Natale o scuprì l’hatha yoga. Però, mentre ca pe ’sti ccose serve comunque nu mantesino ’a cucenero o na tuta p’ ’a ginnasteca, pe pparticipà â primmera ’e l’opera ’e Mascagni d’ ’a pultrona ’e casa nu’ sserve ca ce mettimmo ’ncuollo ‘toilettes’ custose o àbbete scure. Leggimmo ancora ca stanno ’ncrise pure ’e cummerciante che ttanno vennevano nu cuofeno ’e presebbie e ppasture ô centro antico ’e Napule. Accussì, cu n’aizata ’e fantasia, l’artiggiane se so’ ’nventate ’e statuette ’e Maradona cu ’e scelle d’angiulillo, e ppure ’e pizzaiuole appriparajeno nu presepio sano c’ ’a pasta pe ccòcere margherite e mmarenare. ’Nzomma, stammo turnanno a ccampà grazzie a “pizza, ammore e… ffantasia”.