Tempo di lettura: 3 minuti

Chi nu’ ssape ’sti pparole, pigliate d’ ’a canzona “Tammurriata nera” che E. A. Mario e E. Nicolardiscrivettero ô 1944? Giro, o meglio ancora Ciro, fuje sempe nu nomme paricchio ausato d’ ’e Taliane, e ancora mo 79.605 perzone se chiammano Ciro/a. Però s’ha dda dicere pure ca doje ’ncopp’a ttré (66,8%) apparteneno â riggione Campania e cca ’o 90% ’e lloro stanno a Nnapule e pprunvincia. Ma comm’è succiesso ca ’stu nomme s’è spaso accussì ttanto addò nuje? E, ’ncopp’a ttutto, che ssapimmo overamente ’e ’stu ssanto martire, festiggiato ô 31 ’e jennaro, patrono e pprutettore d’ ’e ccetà campane ’e Puortece, Vico Equense e Nnucera Superiore?
Chillu nomme tene uriggene antica, venenno d’ ’o perziano Kurush,e’nfatte Ciro ’o gruosso fuje nu ’mperatore d’ ’a Perzia assaje famuso e groliùso. L’Ebbreje ’o chiammavano Kurésh; ggriecamente addeventaje Kyros (sìmmele a kyrios, che vvuleva dicere “signore”), però nun sapimmo buono ’o segnificato uriggenale che tteneva (giovene, pastore, aroje o figlio d’ ’o Sole…?). Sapimmo buono, ’mméce, ’a storia ’e chillu Ciro d’Alessandria che ffacette arrivà l’annummenata soja ’nfin’a nnuje, comme prutettore d’ ’e malate. Po’ essere pure c’ ’o nomme sujo nu’ ffosse manco chello, pe vvia ca ’stu santo medico egizziano d’ ’o III seculo d.C. – ch’êva ’mparato ll’arte nientemeno d’ ’o famuso Galeno – curava pe ssenza niente ’a gente paccariata e ppezzente, tant’è c’avette pe scagnanomme anàrgyros, ’nGriéco:“senz’argiamme”, “senza denare”. ’Nzomma, fuje nu verace medico d’ ’a carità, antecipanno a ssan Giuseppe Moscati d’ ’e tiempe nuoste.

Però tanno (250-300 d.C.) Dioclezziano teneva ’nsavuorio ’e Crestiane e era pure assaje suspettuso ’e cchille che ssanavano a ggente, angariannole comme maghe e ffattucchiare. PecchestoCiro/Girod’Alessandria, secutato d’ ’e gguardie d’ ’o prefetto Siriano comme medico e ccomme crestiano, fujette a nn’oasi ’e ll’Arabia addò se facette monaco anacoreta, nu’ ccuranno cchiù ’o cuorpo ma ll’anema d’ ’a gente, facenno accussì ancora cchiù mmiracule. Ô 303 na persecuzzione ’e Dioclezziano cugliette Ciro e ll’ammico sujo Giuvanne d’Edessa (surdato fatto monaco), turnate a Alessandria doppo quatt’anne p’assistere a ffrate e ssore ’e chella cummunetà crestiana. Cu lloro fujeno prucessate e mmalamente turturate pure Ciro e Ggiuvanne, che ppo’ ffujeno scataruzzate, testemmonianno c’ ’o sango ’a fede lloro.
’Nfin’ô pprencipio d’ ’o V seculo, ’e cuorpe decullate ’e ’sti dduje martire rummanettero atterrate int’ô tempio alessandrino ’e san Marco, ma ô 404 fujeno purtate poco luntano, a Canòpo, addò assaje gente accumminciajeno a gghì pe sse fa’ sanà e 70 ’e lloro fujeno pure miraculate. Si chella parte d’ ’a custiera egizziana fuje chiammata Abukir (Abu Quir), forze è proprio p’allicurdà ca lloco ce steva ’o sebburco ’e ll’abbate Ciro. Doppo cinche secule, ’e cuorpe d’ ’e martire Ciro e Ggiuvanne fujeno spustate a Rroma, primma dint’a nna basileca ’e via Portuense e ppo’ – pe scanzà ’a lava ’e ll’acqua d’ ’o Tevere – â cchiesia ’e Sant’Angiulo â Peschéra. Però ô 1600 ’o cardenale Francisco Sforza facette traslà chelle rrelliquie a Nnapule, â cchiesia d’ ’o Gesù Novo, addò ’o gisuìta De Geronimo cultivaje ’a devozzione che ’e Napulitane tenevano ggià pe ssan Ciro, che ffacette assaje miracule e gguariggiune.
Ce stanno parecchie cetà campane e ppuglieseche mmanteneno ’a secule ’o culto d’ ’o duttore martire d’Alessandria. A Ppuortece, addò ’e Burbone vulettero c’addeventasse ’o santo prutettore, int’ ’a basileca che pporta ’o nomme sujo ce sta na teca cu nna parte d’ ’o cellevriello ’e san Ciro. ’Sta storia ce fa capì quant’era – e rummane – grossa ’a devuzzione c’ ’a gente nosta tene pe ’stu santo duttore e mmartire, facenno cuncurrenza purzì a ssan Gennaro… Spieca pure pecché nu cuofeno ’e piccerille/elle fujeno chiammate accussì. Pure chillo d’ ’a canzona scritta dopp’a siconna guerra ’a Eduardo Nicolardi, diriggente d’ ’o Spitale ‘Lureto-Mare’, addò sgravaje na napulitana, parturenno nu nennillo paricchio…culurato. ’E ssolete cummare murmuliajeno pe ’stu fatto, cundicenno marpionamente, comme sona ’a canzone: “Ca tu ’o chiamme Ciccio o ’Ntuono /ca tu ’o chiamme Peppe o Giro /chillo, ’o fatto, è niro, niro /niro, niro comm’a cche!”. Nu’ ssapenno c’ ’o santo miedeco egizziano Giro forze era pur’isso nu pucurillo niro…
Nuje però – int’a ’sti tiempe perigliuse ’e pandemìa – arricurdammo san Ciro alessandrino comme testemmonio d’ ’a carità crestiana, pecché ’stu medico ‘anargyros’ sapette mettere fede e mmedecina ô sservizzio d’ ’e mmalepatenze d’ ’a gente cchiù ppovera e ttrevulata. E accussì sia pure mo!