Levatose la mascara, se dette a canoscere” (G.B. Basile, Lo cunto de li cunti, IV, 2)

Nunn è overo ca simmo sulo nuje che ccammenammo cu ’e mmascarine ’ncopp’â faccia. L’âmmo purtate – e pparicchie ’e nuje ’e purtarranno ancora – pe nnu fatto ’e sicurezza, pe cce pruteggere e pe ppruteggere a ll’ate d’ ’o cuntaggio – e ggià ’nu cuofeno ’e ggente nunn ’e pputevano suppurtà e aspettavano ’o mumento justo pe ss’ ’e lluvà. Me pare però ca spisso pure ’e fatte teneno ’e mmascarine ’nfaccia, pe vvia ca chello che rriuscimmo a vvedé è ssulo na parte d’ ’a realtà: forze chella che vvônno fa’ vedé e ccapì. Sarrà sempe pe nnu fatto ’e prutezzione? Però pe ppruteggere a cchi? Guardà ’e fatte ’nfaccia sicuramente nunn è na cosa né ffacile né ccommoda, però l’informazzione avarrìa ’a servì propet’ a cchesto; diversamente arrivano sulo meze-verità…

Quanno leggimmo ’e ggiurnale, ê vvote tenimmo ll’impressione ca ce stanno raccuntanno sulo na parte ’e chello che ssuccede. Ati vvote, ’mmece, pare ca ce stamnmo sperdenno ’mmiezz’a ttropp’assaje nnutizzie pubblecate. È comme si, doppo liggiuto, ce rummanesse ’ncuollo na specie ’e desàso, ’a sensazzione ca sì, mo sapimmo nu cuofeno ’e cose, però forze nun stammo capenno overamente qual è ’a verità addereto ê fatte… Pur’io ê vvote aggio penzato: si fusse nu furastiero e mme vulesse fa’ n’idea ’e comme vanno ’e ccose a Nnapule, liggenno ’e ccronache ’e ’sta cità che cc…osa putarrìa capì e scuprì?

Pigliammo na jurnata comm’a n’ata: miercurì, 3 ’e giugno. Si sfugliammo ’e giurnale nuoste, l’immaggine che nn’esce è assaje curiosa. ’A na parte, pare ca ’e ccose stanno jenno bunariello: arrivano ’e primme pullmanne ’e turiste; s’arrepiglia a vvulà ’a ll’aeroporto ’e Capedichino; ’o Museo archeologgico arape ’e pporte e cchello ’e Capemonte ’o farrà â semmana che vvene; finalmente putimmo trasì int’a quacche parco, pure si cu llimitazzione; ’e spitale se stanno svacantanno e ssulo 3 pperzone songo pusitive ’ncopp’a quase 3.000; 26 cammurriste so’ state arrestate pe rriciclaggio e estorsione…  Tutto buono pirciò? Sì, però…  Leggimmo pure: curtellate a Mmargellina; ’o direttore ’e l’A.S.L. Na.1 indagato d’ ’a maggistratura; Napule ‘capitale’ d’ ’e vveste fàuze e d’ ’e mmerce taruccate; vônno fa’ cadé ô sinneco de Magistris…o forze no; doje fravecature accise a Ppianura ’a nu sgarrupo d’ ’o turreno addò faticavano; ce sta ancora ’a crise d’ ’o cummercio e d’ ’o turismo; arrestajeno n’ex-senatore e ggiurnalista pe rriciclaggio e estorsione; guvernatore e ’o sinneco cuntinuano a s’appiccecà ’ncopp’a movida ecc. ecc.

Dice: ma stess’ ’a realtà è stramma e cchiena ’e cuntraddizziune. Nu’ ffa eccezione Napule, ch’è ssempe stata na cità che sse cuntraddice e cce lassa scuncertate. Sì, però, si sfugliammo giurnale diverze, ’o quatro d’ ’a situazzione accummencia a ccagnà: n’allera ammuina a vvia Caracciolo e rristurante affullate; ’nce stanno prupietarie ’e barre che pulezzano ’a via doppo â chiusura; so’ state sequestrate 4.000 mascarine abbusive p’ ’e ccriature. Però: tornano spaccio ’e droga, cuntrabbando ’e sigarette e parcheggiature abbusive; strate e cciardine songo arredutte a scarreche ’e cartune e mmunnezza; cuntinua l’ammuina a Cchiaja e ô Vommero p’ ’a movida, passata l’una ’e notte. Però se conta pure ca ll’Istituto Pascale è addeventato smart e ttene a Ppascalino, n’assistente virtuale pe ddà l’informazzione e cca facettero na muneta a 5 euro addedecata, doppo chella a Totò, pure a Eduardo de Filippo…

Se diceva na vota ca “’o munno è bbello pecché è vvario”, però chesta nun po’ essere na spiecazzione pe ttuttecose. ’O fatto è ca, ’nzì a cche nun pruvammo a dda’ nu pruggetto e na faccia nova a ’sta cità nosta, se cuntinuarrà a campà juorno pe gghiurno, comme si ’e ccose se putessero accuncià esse sole. ’A verità è ca ppuliteche e ’mprenneture hanno fernuto ’a tiempo ’e pruggettà e s’accuntentano ’e se fa’ cuncurrenza l’une cu ll’ate. ’Sta cità campa ’a sempe ’ncopp’a ll’emergenze, quase maje prugrammànno addò comme e quanno s’hann’ ’a cagnà ’e ccose che nu’ vvanno buono. Accussì tenimmo na realtà addò po’ ccapità tutto e ’o ccuntrario ’e tutto, tant’è ca quaccuno, anne passate, prupunette ’e fa’ addiventà Napule ’a capitale d’o rregno d’ ’o ppussibbele

’Stu vizzio pare ca nun s’è pperduto ancora. Vulimmo accuntentà a ll’automobbiliste e a cchille che vvônno na cità semp’ ’e cchiù pedunalizzata; vulimmo aggrannì ’o vverde pubbleco, però chiudimmo parche e cciardine e facimmo nu scenufreggio d’arbere; vulimmo na cità cchiù ssicura e vivibbele, però permettimmo che se fa ammuina e munnezza p’ ’a notte sana sana; pruclamammo Napule ‘cità ’e pace’ però tenimmo surdate p’ ’e vvie e cercammo na scola ’e guerra; vulimmo nu turismo sustenibbele, però tenimmo nu cuofeno ’e B&b abbusive e ffacimmo occupà strate e chiazze cu ccentinare ’e tavuline e ggazzebbe. Vulimmo…però… Embé, s’avarrìa ’a spiecà a cchi ce amministra c’ ’a puliteca se fa sceglienno, no cercanno d’accuntentà tuttequante o, peggio ancora, chi allucca ’e cchiù o tene cchiù pputere. Comme diceva ’0 pruverbio antico: nun se po’ tténere ’a votta chiena e ’a mugliera ’mbriaca. E pe nnun ce ’mbriacà nunn abbasta ca ’nzerrammo barre, birrarie e vvinarie, si  n’alternativa overo nunn ’a ssapimmo da’…