Napule cetà aperta?

192

Sittantacinche anne fa ascette Roma città aperta, nu capolavoro d’ ’o cinema taliano, cu ’a reggia ’e Rossellini e ’nterpretato ’a atture eccezziunale, comme A. Magnani e A. Fabrizi.  Mo però pare ca stanno appriparanno n’atu bellu filme: Napule cetà aperta, diretto d’ ’o sinneco Luiggi de Magistris. Stess’isso, ’ntervistato d’ ’o Curriere d’ ’a Sera ha fatto ’sta bella ’mmasciata, cundicenno: “Int’ ’e juorne che vveneno farraggio ’na serie d’ordinanze p’arapì l’attività ’e Napule 24 ore ’ncopp’a 24. Niente cchiù barrette furzate a ’nzerrà ’e pporte ê 23, niente cchiù orarie pe nnisciuno!”. Isso dicette pure ca risturante, puteche, servizzie, ciardine: “putarranno sta’ tuttequante apierte, senza se fermà, juorno e nnotte…accussì ’a cetà sarrà cchiù accugliente…”.

‘Ecchiù vviecchie, sentenno ’sti pparole, forze hanno penzato: “Ma che d’è, stanno ancora facenno ’e filmluce?”. Effettivamente, ’stu tipo ’e discurze sfurgiuse e ppretenziuse pareno chille che se sentevano tanno dint’ ’e cineggiurnale ’e ll’Istituto Luce. Dichiarazziune nu poco smargiasse, che assumigliano a ddichiaramiente pecché, cchiù ’e dicere, serveno a cuntraddicere chello ch’ êva ditto n’ata perzona.  Chi?  Si nun s’era capito buono, ’o sinneco ha ccuntinuato a pparlà: “’A fase uno è ffernuta cu ’o lockdown e ’o bbesuogno ’e sta â casa. Mo ’o fatto d’urganizzà ’a vita int’ ’e cummune ha dda passà a cchi ’e canosce, a cchi sape buono spazzie, strate, ciardine e mmercate. Nuje simme sinneche, no vicesceriffe”.

Parlanno ancora ’e filme, a ’stu punto pare ’e sentì a museca ’e Miezojuorno ’e fuoco, addò ’o scurbuteco sceriffo Vincent O’Luke, chiammato spuntutamente ’ncausa dint’ô saloon, s’avota arraggiato cu na mana ’ncopp’ô revolvér…Simmo passate d’ ’o drammateco Roma cetà aperta ô westérn Duello a ll’OK Corral… ’O guajo è ca a rummané ’mmiez’ê bbotte sarrà ’a ggente ’e Napule, che na vota sente sunà na campana e ppo’ ne sente sunà n’ata…  Nu’ pputimmo nià ca ’sta fase doje nun accumminciaje buono. ’E prubbleme, ’nfatte, songo assaje e cchi va cammenando pe Nnapule se n’addona facilmente.

Risturante, barre, pizzarie, alberghe e ttutte chille c’àveno a cche ffa’ c’ ’o turismo nun se songo ancora arrepigliate d’ ’a botta d’ ’o lockdown. Pure puteche e nnegozzie d’abbigliamento nun vanno buono, pe nnu’ pparlà ’e cinema, triate, discuteche, ma pure asile, scole e lludoteche, che stanno ancora ’nzerrate.  L’unneca cosa che ffunziuna, specie p’ ’e giuvene, songo burgherie, pizzetterie, barrette, birrarie, vinerie e ccumpagnia bella, addò se fa periculosamente chella che quaccuno chiammaje ’a covìda… ’O guvernatore  facette sta’ apierte ’sti lucale fin’ê ll’unnece, però ô sinneco nuosto ’st’ordenanza nu’ lle garbizzava, accussì facette ’sta sparata ’e quarta, pruclamanno Napule cetà aperta  ‘acca-vintiquatto’.  Però simmo sicure ca ’e napulitane vanno cercanno chesto e cche ’o mudello ’a cupià è na Las Vegas aulive e cchiapparielle? Simmo overamente certe ca nna cetà che ttene quase tremila anne ha dda campà ’e sta manera, ’ncopp’ô cunzumisemo sfrenato, cu sfizzie e sballe senza rèole e ffacenno ’a notte juorno?

’On Luiggi ha ssempe tenuto ’st’idea ’e Napule comme Parigge, Berlino, Barcellona o Amsterdam, cunvinto comm’è ca na cetà ‘aperta’ è cchiù ssicura, accugliente e ggiovane. Peccato ca ’sta Napule nutturna, cu ammuina museca a ppalla alcòl e ddroghe, nunn è cchiù mmeglio ’e primma e, pe ttramente, ’e prubbleme d’ ’a ggente c’ ’a notte vulesse durmì so’ ddiventate cchiù gruosse.  ’O 40 pe cciento d’ ’e napulitane so’ dissoccupate e ’a pandemìa certamente nu’ ll’aiuta.  Nu guaglione ’ncopp’a ccinche lassa ’a scola primma d’ ’o tiempo. Cchiù d’ ’o 35 pe cciento d’ ’a ggente nosta tene nu reddito annuale che vva ’a 10.000 a zzero euro. A Nnapule ce stanno quase quatto viecchie p’ogne criatura…

‘A fatica che sse trova è pprecaria, griggia o nnera. Asile, scole e lludoteche starranno ’nzerrate pe ttre mmise ancora, mentre ’e bibblioteche farranno sulo prestito, ma ’e studiente nun ce putarranno faticà. ’O reddito ’e cetadinanza arrivaje a cchiù ’e 100.000 napulitane, però ’o 20 pe cciento ’e lloro pigliano sì e nno 200 euro ô mese. ’A 40 anne stanno parlanno ’e l’Albergo dei Poveri (’o Serraglio), ma pe cchi nu’ ttene casa ’nce stanno sulo nu paro ’e strutture e… ’o marciappiede. ’E centre suciale e cculturale p’ ’e ggiuvane so’ ppoche e ssempe cu mmeno aiute, pe nu’ pparlà d’ ’e strutture pe ll’anziane (quase tutte private e ccustuse) e d’ ’e servizzie suciale p’ ’e migrante. E ppo’, pure nu sacco ’e parche e cciardine stanno ’nzerrate o, comm’ a Ccapemonte, so’ state apierte pe mmanco na semmana… 

Cu ’stu quatro d’ ’a disperazzione, simmo overo sicure ca ’o prubblema ’e Napule è cchillo ’e fa sta’ apierte h24 barre, puteche e llucale? Ca na cetà accussì ‘aperta’ sarria cchiù accugliente pe tturiste che manco se vedono?  Certamente ’o Cummune miracule nun ne po’ ffa’, specialmente si ’e sorde so’ ppoche e ’e prubbleme assaje. Però ’a n’amministrazzione ‘alternativa’ ce aspettavemo p’ ’a ggente che campa juorno pe gghiuorno cchiù attenzione ca pe’ chille che ’a notte ’a fanno juorno. A nnuje napulitane ce piacevano canzone comme: Voce ’e notte, Notte ’e Surriento, Notte ‘ncantata, Notte d’estate, Tarantella ’e notte, Notte d’ammore, Notte senza dimane, Notte senza fine, Notte ’e nustalgia…). Mo però è cchiù mmeglio si ce arricurdammo d’ ’o rumanzo Gesù, fate luce ’e Domenico Rea o ’e llantica invocazzione: Jesce sole!