fase-2-napoli - foto comune

Nunn è ffacile, ’e ’sti tiempe, a ttruvà argumiente pe scrivere articule che nu’ tteneno a cche ffa’ c’ ’o Coronavirusse. Pareva c’ ’o munno s’era ffermato, comme si ll’ati pprubbleme fossero scumparute o se putessero leggere sulamente â luce ’e chistu fraggiéllo.  Ma pure mo, quanno poco ce manca â fase doje che c’avarria fa’ ascì fora d’ ’o tunnél ’e l’emergenza, simmo ancora martellate ’a nutizzie che tteneno a cche vveré cu ll’epidemia. L’uneca differenza è ca pparlano ’ncopp’a ttutto d’ ’e guaje che ce so’ state pe ll’economia nosta e ’e comme ’o guverno sta cercanno ’e accuncià ’e ccose.

Però se capisce pure ca è accumminciato n’ata vota ’o triato d’ ’a puliteca, addò ogne partito – o peggio ancora, ogne perzunaggio – va cercanno ’e se luvà ’a miezo ’a scannale e ccuntestazzione pe cchello ch’è gghiuto malamente, addò cercano ’e s’appizzà ’mpietto cemmeraglie pure p’ ’e ccose bone che nunn aveno fatto. Abbasta sfuglià nu giurnale pe vvedé ca è arrivato ’o mumento ’e fa’ ’e cunte pe cchello ch’è succieso int’a ssti mise, ma pure ca nun tornano  quase maje… Pareva c’ ’a pandemia tutto ’o riesto se l’era purtato via. E ’mmece stanno assummanno peggio ’e primma tutt’ ’e guaje d’ ’a sanità, d’ ’e traspuorte, d’ ’a fatica ca nun ce sta, ’e l’assistenza suciale ecc. ecc.

Leggimmo ’e meliune jettate pe ffravecà spitale d’emergenza quanno se putevano spennere pe ssanà chille che già ce stevano o stanno ’nzerrate; ’e triene e ppulmanne zuzzuse e ssenza manutenzione, propeto quanno avarrian’ ’a essere assaje cchiù ppulite e ssicure. Nun ce sta nisciuna bona nuvità p’ ’a ggente che nu’ ttene casa e che ccampa ’e carità; l’ufficie cumunale nu’ ffunzionano ancora. Traffeco e inquinamento stanno criscenno n’ata vota, pe ttramente ca l’amministrazzione penza ’e ausà àte aree pedunale pe ce piazzà barre e rristurante che ss’aven’ ’a allarià… Nun ce sta uno cummerciante che nun s’allamenta ’e quaccosa: ’e piccerille pecché nun ce ’a fanno e ’e gruosse pecché hann’ ’a caccià nu sacco ’e sorde pe ss’adeguà. Tassiste, cafettiere, pizzajuole, avvucate, acconciacapille: tuttequante so’ scuntente e pprutestano…

Fatt’è ca – nun puténnosela piglià c’ ’o sig. Covìdde-19 – s’ ’a pigliano cu ll’autorità. Già, ma quale? ’E cumune ce ll’aveno c’ ’a riggione e cchiagneno miseria; ’e riggiune s’ ’a pigliano c’ ’o guverno centrale, che ddecide tuttecose isso. Ma ’o guverno s’ ’a piglia cu ll’Unione Europea, che ttene ’a manella corta e ce ’mpresta denaro sulo ê ccundizzione soje. ’Nzomma: pare che ssongo tuttequante vittime ’e quaccherun’ato. Pe nnu’ ddicere c’ ’a pandemia sta appiccianno ’o ffuoco sott’a ppignate già ccucente, comme chelle d’ ’e rappuorte ’nfra Americane e Ccinìse, mettenno ’mpericulo ’a pace, ma scummiglianno pure secrete militare, sperimiente cu virusse e bbatterie e scannale pure dint’a organizzazziune unniverzale comme l’O.M.S., che s’avarriano occupà sulamente d’ ’a saluta nosta…

Pe ttramente c’ ’a vita s’era fermata e pputeche, officine e stabbilimiente so’ state pe mmise sane ’nzerrate, pare però ca sulo ’a ’nnustria ’e guerra nun s’è mmaje fermata, accussì comme l’esercizzie militare, pe mmare e ppe tterra, â faccia d’ ’o virusse. Chiudettero pure ’e scole, mettenno a ffaticà studiente e pprufessure ’a luntano, ma perzì dint’â cchella curiosa ‘didatteca a ddistanza’ se songo ammuccate ’e surdate, che cce simmo truvate attuorno pure comme guardie ’e pulezzia, miedece, ’nfermiere, fravecature e pperzì comme ’ncarrecate ’e funarale… So’ ccumparze bannere taliane ’ncopp’a ffeneste e llogge e ô 25 ’e abbrile ce aveno fatto pure nu bello spettaculo d’ ’e ffrecce triculure, abbrucianno centenare ‘e migliare d’eure p’ogne esibbizzione…

Dice: “andrà tutto bene”. Sperammo, però pecché nun pruvammo a ffa’ ji’ bbuone ’e ccose già mo, ognuno â parta soja e pe cchello che ll’attocca? Scurciammoce ’e mmaneche e pigliammoce ognuno ’a respunzabbilità soja. Nun ce accuntentammo e criticà chille che ffanno puliteca, mentre ce facimmo sulo ’e fatte nuoste, nu vizzio che nu maestro comme Ferdinando Russo sapette pittà overamente buono già nu secolo fa.

«-Don Ciccì! Qua la vita, overamente / è piena d’amarezze! Io l’ho capito…/ mangiateve sta zeppula vullente, / che, v’assicuro, vi alleccate il dito! […] Provatele! Qua ci hanno tolto tutto! /Fanno a chi meglio po’ tirarce ’e streppe! / Che vi dicevo? Non si sente ’o strutto…// Io conosco ’a Politica!… La sento! / S’uno mi eleggerebbe depotato, / io gli esplicassi intero il mio mandato, / mah! …lo faressi in tutto sentimento […] Ma i depotati nostri? E chi ’e capisce! / Neh, chi li sente mai pepitiare?! / Pe lloro tutt’ ’e ccose vanno lisce!… // Se li potrei tenere sotto a me, / ah! Don Ciccillo mio!… Che saprei fare!… / Me li mangiassi comm’a sta bigné!».

(F. Russo, “‘A zeppola ‘’e san Giuseppe”, in Piccola Borghesia)