NU SIGNORE AMMATURO CU NA RECCHIA ACIEVERA

Nu juorno, ’ncopp’ô diretto Capranica-Pontevera

Vedette n’ommo cu na recchia acievera.

Nunn’era assaje giovane ma era ammaturato

Tutto, ’a for’ ’a recchia, aciévera restata.

Cagnaje subbito ’e posto, pe lle sta’ accanto

pe mme studià ’o fenomeno, cu nnu poco ‘ spanto.

“Signò – diciett’io – na ciert’età tenite

Ma ’e chella recchia verde che vve ne facite?”

Rispunnett’isso: “Dicite pure viecchio

’e giovene rummane sulo chesta recchia.

Na recchia nennella, me serve pe ccapì

’e vvoce ca ’e gruosse nun stanno maje a ssentì.

Sento chello che ddiceno ll’arbere e ll’aucielle

’e nnuvule che ppassano e ppure ’e sciummarielle.

Capisco ’e ccriature quanno diceno na cosa

Che a nna recchia ammatura po’ pparé misteriosa.”

Accussì dicette ’o signore cu na recchia aciévera

Tanno, ’ncopp’ô diretto Capranica-Pontévera.

’NCOPP’Â LUNA

’Ncopp’â luna pe ppiacere / nu’ mmannate ’o ggenerale

Ne farria na caserma / Cu lla tromma e ’e capurale.

Nun mannatece ’o bbanchiere / ’ncopp’ô satellite d’argiénto

s’ ’o mmette ’int’ ’a casciaforte / pe ll’asponere a ppavamento.

Nu’ mmannatece ’o ministro / cu ssecretarie e usciere

Cu ’e scartoffie enchiarrà / d’ ’a Luna pure ’e cratere.

Ha dda essere nu pueta / ’ncopp’â luna a allunà

Pecché cu ’a capa ’ncopp’â luna / isso già ce sape stà.

A ssunnà ’e cchiù belle suonne / isso ’nfatte è ggià abbituato

A sperà chello ch’è impossibbele / pure si sta disperato.

Mo ca suonne e speranze /songo overe comm’ê sciure

’ncopp’a Luna e ’ncopp’a Terra / facite spazzio ê sunnature.

’O PRUFESSORE E ’A BOMMA

’O prufessò Grammaticus / sentette ’e dicere ’a nu tale:

Chesta bomma a idroggeno / chi ’o ssape si fa mmale?

’O bravo prufessore / rispunnette all’istante 

’A bomma, mio signore / è già assaje pesante

Cu tutt’ ’e megatone / appaura già accussì

n’aggravate ’o periculo / adduppiannole ’a ggì!”

Rispunnette risarchianno / chillu rre’ d’ ’e gnurante

’Mbè, me facite ’a multa / pe sgarro ’e cunzunante?”

Neh signò, nu’ ppazziate / parlanno ’e sti mmaterie

l’ortografia e ’a chimica / so’ ccose assaje serie.

Ô viecchio gasse ‘idrogeno’ / mo mmo cercate scusa

Scancellatece d’ ’o nomme / chella lettera ’ntrusa.

E ppo’ c’ ’a stessa gomma / ’o ssapite che ffarrammo?

Tuttequante ’e bbomme acca / d’ ’a terra scancellammo.”