Passajeno nove mise ’a quanno scrivette n’articulo pe ’stu giurnale, ’ntitulato: “’O frutto culurito è ’mmelenato…“, però nisciuna nuvità è nata e mmanco s’è cagnata na situazzione ch’era ggià assaje defficele. Ma si tanno era ’ncopp’a ttutto na quistione iggienica e d’ ’o rispetto d’ ’a legge, mo, pe ccomme stammo cumbinate cu ll’epidemia ’e Coronavirusse, è ancora ’e cchiù nu prubblema che ttocca ’a salute e ’a sicurezza pubbleca. Fatt’è ca, pure si tuttequante ce âmm’a sta’ accuorte a nnun ascì ’a casa senza mutivo e a cce pruteggere cu gguante e mmascarine, paricchie verdummare e pisciavìnnole  cuntinuano a ttené ’e mmercanzie spase p’ ’a via, fora d’ ’e pputecche lloro, comme si niente fosse…

Già ’ntiempe nurmale chi aspone for’ ’e pputeche mele e ppurtualle, cucuzzielle e vvruoccole, mellune e mmulignane, purpe e alice, ’e sta assuggettanno all’inquinamento pe ggasse pòvere e spurchizzia. Però, c’ ’o rìseco pure ’e l’infettà, spannenno ’stu dannato virùsse curunato, mo nu’ pputimmo suppurtà ca nisciuno fa niente pe lluvà ’a miezo ’sta schifiénza. Nun ce stanno scuse e ppeléje âppénnere.  ’Mmiez’a vvie quase vacante, chelli spase ’e frutte e vverdumme, ma pure ’e còzzeche e cciéfare, sarranno pure culurate, belle ’a vedé e ppitturesche. Però mo nun ce sta sulamente ’o periculo ’e ll’inquinà cu anidride gravòneca e ppòvere suttile, pecché ’o rìseco, cchiù ppeggio ancora, è ca pprudutte che sse magnano senz’ ’e cucenà – tipo: mele, pire, carote o ’nzalatella – putarriano essere cuntaminate pure d’ ’o virùsse.

Ô finale ’e l’articulo passato, pazzianno cu ’e viérze ’e Viviani, scrivette: “Fronna ‘e carota / ce vônno ’mpapucchià pure ’sta vota / si frutta e vverdumma ’mmiez’a via lassammo / se pigliano velene e cc’è mmagnammo / abbasta sulo ca nun ce pare all’uòcchio / scorza ’e fenocchio”.  Ma nun ce sta cchiù ’a pazzià: ’a situazzione è assaje seria e nun ce putimmo permettere ca sse cuntinua a ffa’ spannere pe ’mmiez’a via purtualle e llattuche, vongole e bbaccalà. 

Embè, so’ ppassate quase quatt’anne ’a quanno l’assuciazzione ambientalista V.A.S. facette n’appello ô Sinneco, allicurdannole ca ’nce stevano ggià ordenanze sinnacale ca pruibbìvano già ’e vennere frutta e verdumma a ll’apiérto.  Chi ’o ffa nun s’ammeretarrìa sulo na cuntravvenziòne, datosi ch’è ppure nu reato penale (legge 283/1962), comme fuje cunfermato d’ ’a Corte ’e Cassazzione.  Si nun ce vulimmo abbituà a ccampà ’mmiézz’ê vvelene, è arrivato ’o mumento ’e ce movere e pprutestà contr’a cchi nun se cura d’ ’a salute ’e tuttequante. Pirciò V.A.S. ha scritto n’ata vota ô Sinneco e a ll’Assessure cumpetiente, addimannanno ca sse fanno cchiù cuntrolle d’ ’a Pulezzia Munecipale, nu’ ssolo quacche ‘blitz’ ogne tanto, pe ffa’ scena.

Pe ccuncrudere, pure ’sta vota voglio cità ’e vierze ’e na famosa puisìa e ccanzone ’e Raffaele Viviani: “’A rumba d’ ’e scugnizze”, addò sentimmo ’e vvoce antiche d’ ’a ggente che gghiéva vennenno p’ ’a via nu ppoco ’e tutto:

«Scarole ricce p’ ’a ’nzalata / Fenocchie! /…Guè, ll’aglie! …

Puparuole e aulive./  Magnáteve ’o cocco, magnáteve ’o cocco.

Pallune p’ ’allésse, pallune p’ ’allésse./ ’E mellune chine ’e fuoco.

Na bona marenna, na bona marenna./ Cutogne…….

Nucelline americane…./ Tengo ’o ggrano p’ ’a pastiera.

’A pizza cu ’alice, ’a pizza cu ’alice. / Furno ’e campagna…….

D’ ’o ciardino, tutte secche. / ’A capa d’ ’o purpo, ’a capa d’ ’o purpo!…».

Era bello, eh! Ma si ’e vvoce ’e ll’ambulante che ttanno se sentevano mo nun se sentono cchiù, nun putimmo dicere ca sso’ scumparze ’e vinneture ’e puparuole, aulive, cocche, mellune , alice e ppurpe, che sse portano comme si ’a via fosse ’a puteca lloro. E allora propio a ’sta ggente che nnu’ rrispettano ’e rreole  lle voglio dedicà ’stu finale vivianesco:

Chesta è ’a storia ’e na facénna / che succede a ttutte pizze

Truove ’a ggente, ’mpizze ’mpizze / che tte vénneno pe vvizzio

Pire, vruoccole e ppatane / senza da’ na sicurezza

Pe ll’iggiene d’ ’o mmagnà /e rrischianno l’amarezza

Ca nu’ ssulo so’ inquinate / ma cunnìte c’ ’o virùsse.

Chesta storia ha dda fernì / e vvulimmo avé certezza

C’accattammo pesce e ccozze / senza jonta d’ ’e schifezze.

Prutestammo e reclamammo / nun mettimmece ’na pezza

Pecchè, si uno nun s’avvezza / e ssi uocchie e rrecchie appìzza

Po’ ccagnà ’sta situazzione / pe ascì ’a ll’incertezza.