Nun se po’ suppurtà c’ ’a Reggione e ll’Asl Na1 ritardanno ’a riqualificazzione d’ ’o spitale ‘San Gennaro’
Naturalmente nun sto’ pparlanno ’e san Gennaro ’o prutettore ’e Napule, che ’e miracule ’e ffa. Parlo ’e ll’antico spitale napulitano che pporta ’o nomme ’e chillu santo, mutivo pe nna dimustrazzione ’e prutesta tenuta ’ncopp’ô ponte d’ ’a Sanità. ’O ponte che Francesco Ruotolo (n’ecopacifista muorto a nnuvembre passato) se battette pe ffa’ ’ntitulà a Maddalena Cerasuolo, partiggiana d’ ’e Quatto Jurnate, addò se songo arraunate nu cuofeno ’e gente, cuntrarie ô fatto ca ’o ‘San Gennaro’ sta sempe ’nzerrato. ’A prutesta era urganizzata d’ ’e “Bbrigate medeche e ssulidale Francesco Ruotolo”, gruppo ’e miedece e ccetatìne che ddenunziano ’o scenufreggio d’ ’a sanità pubbleca e ’a mala sciorta d’ ’o spitale fantasima ’e nu rione che sse chiamma propio… Sanità.
Nun se po’ suppurtà – diceno ’e Cumitate – c’ ’a Reggione Campania e ll’Asl Na1 cuntinuano a sse ’ntallià, ritardanno ’a riqualificazzione d’ ’a struttura e nnu’ ddecideno che ffuturo tene, pure mo ca stammo int’a na grossa emergenza sanitaria. So’ passate anne ’a quanno ’o “San Gennaro” fuje chiuso pe sparagnà sorde, fegnenno ca ll’avevan’ ’a mettere a pposto e rriconvertì, ma arreducennolo a nna scatula vacante, cu nu favezo prontoseccurzo senza pussibbeletà ’e ricoverà a nnisciuno. E ttutto a ffavore d’ ’a sanità privata, mentre nu quartiere populare e cchieno ’e necessità nu’ ttene nu presidio spitaliero, comme ’a cinc’anne denunzia ’o missiunario padre Alex Zanotelli.
’O “San Gennaro” è assaje cchiù ’e nu semplice spitale, ma ’a storia soja, antica e ccumplicata, poche napulitane ’a sapeno overamente. Tutto accummenciaje quanno ô 1282 muonace benedettine funnajeno nu cunvento sott’â cullina ’e Capemonte, che doppo diece anne ffuje trasfurmato d’ ’e Cavaliere Templare int’a nnu spitale p’ ’e puverielle, azzicco â Basileca paleocristiana ’e “San Gennaro extra moenia”. Ô ’500 addeventaje nu lazzaretto pe ll’appestate, che pperò fuje rimpiazzato d’ ’o “Spitale ’e ll’Incurabbile”, funnato ’a Maria Longo a Ccaponapule. Accussì fuje cagnato ancora int’a na struttura d’assistenza p’ ’a gente povera e pp’ ’e gguaglione ‘sedotte’ e abbandunate.
’Ste ggiovane sbenturate, ô 1631, fujeno sestimate int’a ll’ospizzio novo ’e San Gennaro a Mmaterdei e accussì “San Gennaro e ssan Pietro” turnaje a essere nu lazzaretto. Ma ô 1735 Carlo ’e Burbone ’o ffacette addiventà nu ‘Reggio Spitale’ e pe ttramente ’e giuvene puverielle, mascule e ffemmene, fujeno ssestimate int’ô “Riale Albergo d’’e Povere”, ditto pure ’o “Serraglio”.
A ll’Ottuciento, Giacchino Murat penzaje buono ’e piazzà dint’ô “San Gennaro” pperzone vecchie povere e struppiate, ausate pure p’accumpagnà ll’esequie, e ’mmece ’e giuvene fujeno spustate int’a Rretire e educandate d’ ’a Cità.
Doppo fatte paricchie accunciamiente d’ ’a vecchia struttura, passata ’a siconna guerra mundiale, lloco fuje criato nu ’mpurtante spitale psichiatreco, ’ntitulato ô duttore Gustavo Morvillo, siconna struttura dopp’ ’a “Neurodeliri” ’e Milano. Ô 1978, pe vvia d’ ’a legge Basaglia che ’nzerraje ’e manicomie, ’o “San Gennaro” fuje ricunvertito int’a nu centro aperto p’ ’a neuro-psichiatria e, dopp’ancora, turnaje spitale, cu nu prontoseccurzo p’ ’e ffemmene che s’avevan’ ’a sgravà. ’Sta longa e ttravagliosa storia ce fa capì che, int’a otto secule, ’o “San Gennaro” nun trovaje pace, passanno ’a spitale cruciato a llazzaretto; ’a retiro p’ ’e giuvene abbandunate a ospizzio p’ ’e viecchie puverielle e ppure a mmanicomio.
E nnun ha ttruvato pace manco chella maravigliosa Basileca rumaneca: primma sacchiata, po’ ausata malamente comm’a nnu deposito d’ ’o Spitale, e ppure mo scurdata, comme si fosse sulo na depennenza d’ ’e cchiù ffamose Catacombe. Embé, ce sta chi penza ca putimmo sulo dicere: “San Gennà, pienzace tu!”. Però chi vo’ bene a Nnapule nun s’ha dda rassignà a ’stu degrado e ppirciò – comme spiecajeno buono Francesco Ruotolo e ppadre Zanotelli, s’ha dda luttà pe ffa’ valé ’e deritte d’ ’a gente, accummincianno ’a chello â salute.
