Me capitaje scasualmente sott’a ll’uocchie na revista pubblecata ’a n’assuciazzione ’e cunzumature (*), addò ce steva n’articulo ’ntitulato: “Che sfida la spesa”. E a ffa’ ’a spesa è overamente na sfida pe ttuttequante, pe vvia ca quanno, dove, pecché e ccomme accattà quaccosa è una d’ ’e ppoche scévete c’ogne juorno ce attoccano. Però spisso nu’ ttenimmo bastantemente cunto ’e ’stu fatto, accussì nunn apprufittammo ’e ll’occasione ’e decidere nuje a cchi vulimmo da’ ’e sorde nuoste, e ’ncagno ’e cosa. Na puliteca attenta a ll’ambiente, â salute e ppure ê deritte ha dda tené cunto d’ ’o fatto ca, si nun simmo tuttequante faticature e pprudutture, tuttequante però simmo cunzumature. Pirciò chello che ffacimmo (o nu’ ffacimmo) quanno avimm’ ’a accattà quaccosa addeventa assaje ’mpurtante pe ccagnà ’a succità nosta o p’ ’a lassà tale e qquale.
’O guajo è c’ a cchille che cce facettero addiventà na succità ’e cunzumature lle garbizza propio ca facimmo ’a spesa distrattamente, currenno appriesso a cchello che ce fanno credere che cce cunvene. Pe cchesto ce arravogliano cu mmille pubblecità; ce contano ca se preoccupano ’e ll’interesse nuosto; ce lusingano cu nu cuofeno ’e cchiacchiere e ttabbacchere ’e lignamme. Però, ô finale, penzano a ffa sorde e bbasta. Fa’ spese c’ ’a ccuscienzia ’e chello che stammo facenno è ’o primmo passo pe cce piglià ’mmano ’o putere ’e decidere e ccuntà ’e cchiù. È ’a meglia cosa pe ccurà ll’interesse nuosto e cce pruteggere ’a salute, ma penzanno pure ô bbene cummune, a ll’ambiente e â ggiustizzia suciale. Quanno jammo a spènnere ’e sorde nuoste, ’nfatte, tenimmo cchiù putere ’e quanno jammo a vvutà ogne cinc’anne, pecché ’e scévete noste d’ogne juorno pônno overo fa’ ’a differenza. Abbasta ca, quanno mettimmo mano ô portafoglio o â carta ’e credito, nun ce scurdammo ca tenimmo nu cereviello e na cuscienzia. Turnanno â spesa che ffacimmo abbitualmente, ll’articulo nummenato ’mprincipio appresentava nu ‘decalogo’ cu ’e cunziglie p’addiventà cunzumature cchiù ccunzapèvule.
(1) Appriparammoce â casa na bella lista, urganizzannoce anticipatamente p’accattà chello che overamente ce serve; (2) ô supermercato, accattammo sulo chello che tenimmo ’ntenzione ’e cucenà e ccunzumà, pe nnu’ pperdere tiempo e nnu’ ffa’ sciupìo; (3) jammo a ffa’ spese a stommaco chieno, evitanno ’e ce fa’ ’nfruenzà d’ ’a famma; (4) ausammo ’a carriola sulo si accattammo cchiù ’e 20 prudutte, accussì evitammo ’e carrià tropp’assaje robba, spennenno cchiù d’ ’o nnecessario; (5) cuntrullammo quanno scadeno ’e prudutte accattate, tenenno mente ’e ddate ’a rispettà; (6) leggimmo ll’etichette, ’ncopp’a tutto pe cchello che sse magna, stanno accuòrte a ll’ingrediente dint’ê prudutte, ô peso netto e ppure ê ’nformmazziune nutrezziunale; (7) accattammo nu prudutto tenenno mente quanto ce vene a ccustà ô chilo/litro, smicciànno buono ll’etichette e ccunfruntanno priézze e quantità pe ccapì si ce cunvene overamente; (8) stàmmoce attiente ô trainiello ’e ll’ufferte speciale, pecché ’sta jacuvella è na manera pe cce fa’ accattà chello che nnun ce serve o na quantità sprupusetàta ’e robba; (9) sceglimmo prudutte nustrane, evitanno pure chille fora staggione, preoccupannoce accussì ’e sparagnà sorde, ma pure ’e tutelà l’economia lucale e dd’evità ’e cuòste ambientale, pe vvià ca se vanno traspurtanno mercanzìe pe centinara o migliara ’e chilometre; (10) dammo preferenzia ê prudutte che nnu’ ssongo state tropp’assaje trasfurmate, sceglienno chille che tteneno na lista ’e ’ngrediente cchiù ccorta e ssémprece.
Però nu’ ttenimmo ’a fa’ sulo ’a spesa alimentare. Avimm’ ’a ’mparà pure comme avimm’a spennere cchiù mmeglio e accuortamente ’e denare nuoste quanno accattammo na machina, ammubigliammo na casa o facimmo n’investimento int’a nna banca. ’O cuncetto è sempe chello: abbadammo certamente a ll’interesse nuosto, però preoccupammoce pure ’e addò fernesceno ’e sorde che spennimmo, ’e comme pruducettero chello c’accattammo, e ’e chi stammo finanzianno, ammacaro senza manc’ ’o ssapé. Però chesta è na quistione deverza e ddelicata, pirciò ne parlarràmmo n’ata vota.
