Doppo n’anno nun se vede ancora na…risurrezzione

Ce sta na bella puisia cu ’stu titulo scritta ‘a Eduardo De Filippo. M’è vvenuta a mmente penzanno a cchesta nosta siconna Pasca d’ ’o Covizzoico, l’epuca d’ ’o virusse c’ ’a curona, ancora cchiù munarchico ‘a quanno è addiventato ‘ingrese’… Scriveva tanno Eduardo: “Natale e Pasca so’ cumpagne tale / ca vanno sott’ ‘o vraccio eternamente […] Eppure ce sta tanta differenza /comme ‘a casa d’ ‘o Papa e ‘a casa mia. / Natale porta friddo e sufferenza, / Pasca strascina ‘a ggente mmiez’ ‘a via”. Sarrà sicuramente overo ca “ ‘O sole ‘e Pasca nun te po’ fa’ male / e scarfa ‘e puverielle mmiez’ ‘a via “ – però, pure si ’nce sta ’o sole, pare propio c’ ‘a Quaresema nosta nunn’è ancora fernuta. Ato ca ‘Pasca Rusata’! ‘A Pasca 2021 rummane rossa, affunnata cumm’è ’a n’auta maréa ’e cuntagge…
A ttènere esposto ’o cartiello “tutto esaurito” monun songo cchiù alberghe, pensione e bb&b, ma spitale e ppolicliniche. E ssi, comme scriveva Eduardo, a Ppasca ’o sole cuntinua a scarfà ‘e puverielle ’mmiez’â via, s’ha dda dicere pure ca parche e cciardine, parecchie puteche, ma pure barre pizzarie e ttratturie, stanno ancora ’nzerrate. A sse fa’ scarfà d’ ’o sole d’ ’a matina â sera, mméce, songo catèrbie ’e raidér, fatturine ’ncopp’a mmotociclette che vvanno cunzegnanno casa pe ccasa pizze e amburghér, sushi e ccrocché, briosce e ttortanielle. Nu cuofeno ’e giuvinotte – e nnu’ ssulo – che ’nzàmmano comm’apecchiune pe vvie e vviche, o se stanno ammuntunate for’ê pputeche, aspettanno ’e assaccà ’a merce ordinata dint’ê vorzùne lloro. Sì, Pasca ave sempe “trascinato ’a gente ’mmiez’â via”, però mo chille ca vanno passianno pônno cammenà sulo mascarate e cu nna scorta d’amuchìna int’ê ssacche…

Sott’ ’o sole d’ ’a semmana santa ’nce stanno pure ’e viecchie che s’hann’a vaccenà. Pure cinc’ore ’e fila (d’ ’e 4 d’ ’o pomeriggio ‘nfin’â sera ê 9,30), comme scriveva ô Curriere nu signore ‘ultrasettantenne’, passate â Stazzione Marittema ’e Napule aspettanno cu nna santa pacienza ’o turno pe sse fa’ inoculà ’o vaccino ingrese. ‘Ncrucianno ’e ddete e, ô finale, pavanno pure 15 euro p’ ’o parcheggio… Sarrà na situazzione cchiù mmeglia quanno s’arape ’a sala d’aspietto ’e ll’Hub vaccinale a Ccapemonte, addò ll’ore passarranno guardanno ’e quatre d’ ’o Museo… Sott’ ’o sole ’nce truvammo guagliune/one che nnu’ pponno sta’ ’a scola, ma pure ’e studiente ’e ll’Accademmia d’ ’e Bbelle Arte, ch’êvano occupato pe 40 juorne l’istituto addò vurriano finalmente fa’ lezzione, però so’ state sfrattate d’ ’a pulezzia… E nniente ’e novo sott’ ’o sole truvammo a Ggiugliano, addò 300 automobbile vecchie o arrubbate so’ state appicciate, justo pe ce arricurdà ca stammo sempe int’a ‘Terra dei Fuochi’…
Ma pare c’ ‘o sole ’e Pasca è gghiuto ’ncapa pure ô Cummissario pe Bbagnole Floro Flores che- doppo vint’anne che stammo aspettanno ca levassero ’a culmata a mmare – dichiaraje ca forze sarria cchiù mmeglio lassà tuttuquanto comme sta, sparagnanno 140 meliune, pecché chella brutta spasa ’e ggiumento carreco ’e tuosseche, ’nfunno, “nun dà fastidio”. E cchi se ne ’mporta si ’a rimozzione d’ ’a culmata sta scritta pure int’a na legge d’ ’o 2007 e ssi ’e linea d’ ’a costa è stata struppiata ’a chillu mostro abbelenuso! Dice Floro Flores ca ’e sta bella nuvità s’hann’a cunvencere ’a Suprintendenza, ma pure l’ambientaliste che ll’hanno vuluta e mmigliare ’e bagnulese che vurriano arrepigliarse ’o mare lloro. Pe nnu’ pparlà d’ ’a Corte d’ ’e Cunte, c’ave sentenziato che d’ ’o 2015 ô 2018 a Bbagnole se so’ ffatte sule “attività ’e studio”, ma senza cumbinà niente ‘e pusitivo. Sì, comme scriveva Eduardo, ‘nfra Natale e Ppasca “ce sta tanta differenza”. Però no abbastanza pe cce fa vedé c’ ’a Napule è cagnata overamente quaccosa. Autro che rrisurrezzione! Stammo ancora ‘nrianimazzione…