Si nun guardammo Napule sulo ’a luntano, ce accurgimmo ca ce stanno troppe ccose che nnun se ponno vedé

Ô ssòleto, quanno guardammo na situazzione ’a coppa, ’a nu pizzo àuto, ’e ccose pareno cchiù mmeglie ’e quanno ’nce stammo ’mmiézo. ’A luntano, ’nfatte, nun se vedono tante defiette e ttenimmo na veduta cchiù llarga, addò ’e particulare se perdeno int’a nna visione panurameca e spettaculosa. Ô ssoleto, però, nu’ ssempe. ’Ncopp’ô ‘Mattino’ aggio truvato n’articulo che overo fa penzà, pecché parla ’e comme po’ pparé Napule nosta si ’a guardammo ’a nu satellite. Nun se tratta ’e fantascienza. Parlammo ’e nu strumiento tecnologgeco c’ausammo quase tuttequante: ‘Google Maps’. ’E vvedute che ’st’applicazzione ce dà ’e na cità e dd’ ’e vvie e cchiazze soje, songo sì ‘virtuale’, però songo immaggene che ffotografano situazzione verace e riale. Embé, liggenno ’st’articulo, venimmo a ssapé ca Napule – a vvolo d’auciello – è na cità overamente maravigliosa e rricca ’e monumiente eccezziunale, ma chiena pure ’e munnezza, schifenzarie, casine e abbuse. ’E ffotografie ’e ‘Street View’ ce ’mmòstano ’nfatte strate affullate e ttraffecate, addò â soleta ammuina d’ ’e mmachine, camionne, pulmanne e mmotorine, s’agghiogne l’indisciplina d’ ’a gente a ppede e ’e chi venne nu poco ’e tutto comme ambulante, o tene na puteca, però occupa pure ’o spazzio ’mmiéz’â via. Pe nnu’ pparlà po’ d’ ’o fenomeno eterno d’ ’e parcheggiature abbusive…

‘Google Maps’ ce porta a gguardà chello che ssoletamente nu’ vvedimmo cammenanno, â autezza d’ommo, p’essempio centinara ’e palazze – pure chille assaje ’mpurtante e antiche – ammalurate, stunacate, cu bbarcune sgarrupate e mmarmule periculante. Ma quanno guardammo assaje cchiù vvascio – dice ll’articulo – ce truvammo annanz’a ate bbruttezze: asfarde crepate, sajittere sparafunnate, sfussecature pe ttutte parte, assaje periculose pe cchi nu’ rriesce a lle scanzà. Nun mancano maje ’e cummule ’e munnezza, pure annant’ê bidune d’ ’a differenziata, specialmente addò se vènneno cose ’a magnà, comme pizze e ppizzette, robba fritta, amburghèr e ppanuozze. Ma ll’uocchio ’e ‘Google Maps’ ce conta pure situazzione streuze e ’mbarazzante: na femmena ch’è ’nciampecata e ccaduta ’nterra, na machina d’ ’a polizzia munecipale parcheggiata ’ncopp’ô marciappiede, o n’ommo che nnun po’ ffa’ a mmeno ’e piscià mmiez’â via…
Nuje, oramaje, ce âmmo fatto l’abbitudene, però n’atu ‘spettaculo’ brutto assaje è chillo d’ ’e mmura d’ ’e palazze spisso ’nguacchiate ’a graffite, cartielle abbusive e manefieste ’ncullate a ccome vene vene. Nun se tratta d’opere d’arte comme ’e murales che stanno spuntanno a tutte parte, ma quase sempe songo scritte – sceme, scrianzate e oscene – o spiringuacchie senza valore. L’urdema cosa che nun po’ scampà a ll’uocchio satellitare è ’o scenufreggio d’ ’o ‘verde urbano ’e Napule. Arbere schiantate, abbattute o atturzate malamente, arreducennole a mmazze senza forma. Pe nnun parlà d’ ’e ciardine pubbleche abbandunate, spuorche e spisso senz’evera, quanno nun stanno pure ’nzerrate… Embé, nu’ ssempe ’e ccose, pure si songo guardate ’a luntano, pônno annasconnere tutto chello che nun va buono. Chello ch’è ssicuro è cca pe ccanoscere na cità s’ha dda scennere ’a coppa a bbascio, comme cuntaje Salvatore di Giacomo c’ ’o puemetto sujo “Lassammo fa’ a Ddio”. ’E vierze ’e ’stu pueta parlano ’e nu viaggio c’ ’o Signore vulette fa’ pe ccapì – cu ll’ajuto ’e san Pietro, comme fosse pussibbele ca Napule, nu Paraviso ’nterra, putesse addiventà nu ‘nfierno pe ttanta gente.
«Oh, qual vista gentile! / (dicette ‘o Pateterno /pusanno o’ cucchiarino) / Ma com’ è che si dice, / caro quel mio Pierino / che la Terra è infelice? / Ma guarda, guarda un po’ che movimento / che scena pittoresca e che allegria! /Via, son proprio contento… /Be’?… Pietro?… E parla, vecchio brontolone! […] Dio guardaie – spaventato. Mmiez’ ‘a strata, /stuorte, struppie, cecate, giuvene e bicchiarielle /guagliune senza scarpe / vicchiarelle appuiate a ‘e bastuncielle /scartellate, malate /e ciert’ uocchie arrussute / chine ‘e lacreme – e mane /secche, aperte, stennute… – ‘A carità!…».
Certamente mo pe mmiéz’a via nun se vedono cchiù gente struppiate e ccecate comm’a ttanno però, si nun guardammo Napule sulo ’a luntano, sicuramente ce accurgimmo ca ce stanno ancora troppe ccose che nnun se ponno vedé. Nun putimmo aspetta sulo ’e miracule p’arresorvere ’sti pprubbleme.
Lassammo fa’ a Ddio” va buono, però pure nuje âmm’ ’a fa’ ’a parta nosta.