Chiacchiere e ttabbacchere…

da | Feb 6, 2021 | Cronaca

’A ristrutturazzione d’ ’a vecchia sede ’e via Tuledo d’ ’o Banco ’e Napule sta fernenno ’e scancellà nu patremmonio prezziuso

Ê vvote penzo ca nuje napulitane simmo tropp’assaje atturniate ’a maraveglie e ttesore pe ce n’addunà overamente. Ogne juorno cammenammo ’mmiez’a ssecule ’e arte e storia, ma oramaje ce avimmo fatto abbitudene e nnun sapimmo cchiù apprezzà tutt’ ’e rricchezze che ttenimmo annante. ’Sta cunsiderazzione, però, forze nunn’abbasta a spiecà comme succede ca tanta gente – perzone cummune e autorità istituzzionale – songo accussì ppoco ’nteressate a ccanoscere ’e ttestimonianze ’e nu passato groliuso che cce appartene a ttuttequante e ffa ’e nuje nu popolo unneco e urigginale.
Si parlammo ’e banche e bbanchiere, se sape c’ ’a parte cchiù ggrossa d’ ’a gente nosta – diffidente pe nnatura e scuttata ’a sperienzie malamente – tene nu rifiuto pe ffatte e pperzone c’apparteneno ô munno d’ ’a finanza. Ma chesto succede pure quanno se parla d’ ’o Banco ’e Napule, uno d’ ’e cchiù antiche e ’mpurtante ô munno, nato cinche secule fa aunenno istituzziune – ’e ‘Munte ’e Piatà’ – funnate p’ajutà e spallià â povera gente chiena ’e diebbete. Credo ca nunn’è pussibbele raccuntà ’a storia ’e n‘ata banca ch’è stata accussì capace e s’apprisentà comme nu calco fedele d’ ’a storia ’e na cetà e nu populo.

È na storia accezzionale che, forze propio pe cchesto, chille c’aveno primma sgarrupato e po’ zeffunnato ’o Banco ’e Napule teneno tutt’ ’o ’nteresse a nnun fa’ canoscere, scancellanno pure ’a memmoria soja. Cincucient’anne ’e storia ’e succiesse e affermazziune pe tutt’ ’o munno, fernute primma cu chella faveza Unnetà d’Italia – culunizzazzione e rrapina d’ ’o Sud – e ddoppo cu ’e ttrastule che ffacettero addiventà chillu Banco famuso na succurzale d’ ’a Banca cchiù grossa d’ ’e Piemuntise, e po’ ne luvajeno pure ’a miezo nomme e mmarca. Ll’istituzziune che nn’avarri’ ’a tutelà e mmantenere ’a memmoria – ’a Funnazione Banco ’e Napule, che ttene ’o cchiù gruosso archivio bancario ’e tuttuquant’ ’o munno – manco s’è preoccupata assaje ’e pruteggere e ccunzervà ll’allicuorde prezziuse ’e chella storia groliosa. ’A ristrutturazzione d’ ’a vecchia sede ’e via Tuledo, mo sta fernenno ’e scancellà nu patremmonio tropp’assaje prezziuso pe’ ffernì sperzo o, peggio ancora jettato, manco si fosse munnezza…

Pe ffurtuna tenimm’a pperzone eccezziunale comm’a Gaetano Bonelli, che sta facenno tutt’ ‘o ppussibbele pecchè chesto nu’ ssuccede. Dint’a cchillo “Museo ‘e Napule” – ch’isso ave funnato e stabbeluto dint’ ’a storeca “Casa d’ ’o Scugnizzo” a Mmaterdei – ’nce stanno tesore overamente, na cullezzione assaje varia che sul’isso sapette raccogliere int’a 30 anne, curannola cu ppassione, comme si fosse na figlia. E ddint’ ’a cchillu Museo d’ ’a longa storia materiale ’e Napule e d’ ’e Napulitane (che Tripadvisor ha piazzato quinto ’ncopp’a 98 classeficate) Bonelli ha urganizzato na mostra, propeto pe nnun fa’ sperdere ’a memmoria ’e chello che ffuje pe nnuje meridiunale ’o Banco ’e Napule.
Se tratta ’e centinara ’e testemmonie unneche: reggistre, lettere autografe, libbrette d’assigne, fede ’e credito, cuntratte, bancunote, medaglie e nu sacco ’e disegne, lucandine, manefieste e ffotografie. Nu viaggio appassiunante dint’ ’a storia ’e na banca nazziunale antica, che ttanno stampava pure muneta, che ccuntinuaje pe ssecule a ajutà ’e puverielle, assistenno pure ’e guagliune lloro, e cche fuje ’a primma c’arapette filiale perzì int’a ll’Australia e a Nnova York. Purtroppo, paricchie Napulitane ’e sti fatte nun sanno niente e, fin’a mmo, nisciuno ha deciso ancora manco ’e ’ntitulà na via o nu lario a cchillu Bbanco p’eccellenzia, comme ’mmece aveva addimannato Bonelli cu na lettera all’Assessore cumpetente, che ppure pareva ’nteressato.
Embé, s’ha dda dicere ca nunn’abbasta ca nu cuofeno ’e gente – e ppure ‘o sinneco, ’o cardinale, assessure, diretture e ati perzunagge famuse comm’ ’0 scrittore Maurizio De Giovanni – visitajeno e apprezzajeno assaje ’stu Museo e ’a mostra dedicata.

Mo ’nce vônno fatte overe, nu’ ssulo parole. Ajute e ricanoscimiente, nu’ ssulo salamelicche e ppacche‘’ncopp’â spalla. Diceva ’nfatte nu pruverbio antico, che mmo vvene propio a llicchetto: “Chiacchiere e ttabbacchere ‘’e lignamme ’o Bbanco nun s’ ’e ’mpigna”.

 

EDITORIALE

L’arte di evadere le regole

di Alessandro Migliaccio

Quando nel 2010 ho pubblicato il mio secondo libro (anche se il primo era solo una raccolta di poesie giovanili) intitolato “Paradossopoli. Napoli e l’arte di evadere le regole”, nutrivo una ferma speranza che qualcosa sarebbe cambiato. Che i napoletani avrebbero, prima o poi, avuto uno sbalzo di dignità e che si sarebbero in qualche modo presi una rivincita nei confronti di quanti, troppo facilmente, puntano il dito contro di loro.

continua a leggere…

Fallo di mano di Chiellini ma per Sky non è niente

Troisi: Penso in Napoletano, sogno in Napoletano

Un pianoforte nella Stazione Centrale di Napoli

Seguici su Facebook

Facebook Pagelike Widget
badando a te