Tempo di lettura: 3 minuti

’Ntiempo ’e pandemia ce stanno paricchie dutture Balanzune, prufessurune e scienziate che ssanno tutto lloro

Me capitaje ’e leggere n’articulo interessante ’ncopp’ê mmascarine c’ausammo tutt’ ’e juorne pe cce pruteggere d’ ‘o cuntaggio. Se spiegava ’nfatte comme facimmo a ccanoscere chelle ‘verace’, che cce pônno da’ cchiù ssecurezza. ’Sti mmascarine – chelle ‘chirurgeche’ comm’a ccchelle ‘filtrante’ – oramaje ’e pputimmo truvà a ttutte parte, però nu’ ssongo tuttequante secure e ccertificate. Pecchesto, buono facimmo a gguardà chello che sta scritto ’ncopp’â cunfezzione, cuntrullanno si ’nce stanno ’e ddiciture juste e ’o marchio CE, e si rispettano ’e nnorme UNI EN 14683:2019 o UNI EN 149:2009. Però nun ve voglio parlà ’e ’sti fatte, che ssongo ’mpurtante ma assaje tecniche.
Chi me canosce sape ca chello che m’interessa assaje e mme cellechéa ’o cerviello songo uriggene e storia d’ ’e pparole, che spisso ausammo senza manco ce penzà. Chi maje ll’avarria ditto ca, ascenno â via ’e fora, ce sarriamo preuccupate ’e ce purtà appriesso guante, disinfettante e mmascarine medeche? Chi l’avarrìa sulo ’mmagenato ’e vedé a ccentinara ’e migliara ’e napulitane – giuvene e vviecchie – che ffanno passo e spasso p’ ’a cetà purtanno na mascarina ’ncopp’â faccia? Tanno ’e mmascare se vedevano sulo a Ccarnavale o p’ ’a festa ’e Piederotta. Erano spassose, culurate e mmettevano allerìa. No comm’a cchelle ’e mo, che pparlano sulo ’e malatia…

Ma ’o vvulite sapé d’addò vene ‘mascara’, che ttruvammo quase tale e quale int’ ’a lengua frangese (masque), ’ngrése (mask) spagnuola (màscara), germanese (Maske), russa (маска) e ggreca (μάσκα)? L’etimologgia nunn è secura secura, però pare ca ’sta parola vene d’ ’o latino medievale, cu ’o segnificato ’e ‘janara’, ‘strega’. Primma ancora, forze l’uriggene era longobbarda, pe vvia ca sta scritta pure dint’a ll’Editto ’e Rotari. ’E ‘mmascare’, pirciò, appauravano già ê tiempe antiche, facenno venì a mmente fattucchiare, spìrete e mmalombre. A Rroma – comme pure a Ppumpeje – ’e mmascare s’ ’e mmettevano ’nfaccia chille che ffacevano triato (latinamente se chiammavano personae, pecché servevano a ffa’ sunà cchiù fforte ’e vvoce…), e ll’accòlete d’ ’e ccungreghe ’e Bacco e Ssileno. Pure ’e ggente africane ll’aveno sempe ausate int’ê cceremmonie religgiose, comm’a nu strumiento pe ttrasì int’a nu munno maggeco e ssacro.
Ô medioevo, quanno capitavano ’e ppestilenze, ’e miedece ’e tanno se mettevano mascare cu nnase luonghe luonghe, addò astipavano spiezzie prufummate, pe nnunn essere appestate d’ ’o fieto d’ ’e malate e ppe nnu’ sse fa’ ’nfettà. ’A chelle streuze ‘mascare d’ ’o spezziale’ nascettero chelle che mmo ce mettimmo ’nfaccia pure nuje, pe ccuntrastà ’sta mardetta pandemia ’e Covìdde. Janche, celeste o disegnate, songo addeventate nu sìmmolo ’e ’stu tiempo periculuso, addò nun ce mascarammo cchiù né pe ccelebbraziune religgiose e mmanco pe rridere, pazzià e ce spassà cu ll’ata gente mmiez’a via, ma sulo pe cce addefennere ’a ll’ata gente e nnu’ cce piglià ’e malatie lloro. So’ ffernute ’e tiempe belle ’e na vota, quanno gruosse e ppiccerille se mascaravano ’a Pulecinella, Allerchino o Balanzone. Comunque pure mo ce capita ’e vedé – specialmente pe ttelevisione – perzunaggie che ce arricordano a Ccarnavale.
’Ncopp’a ttutto mmiez’ê puliteche nu’ mmancano pulecenelle, chille che ddiceno â ggente: “Armàmmoce…e gghiate!” e ppure chille ca “’e ssische ’e tteneno p’applause”. Overamente ce stanno pure assaje allerchine, che se metteno ’ncuollo casacche cu tutte ’e culure, siconno a ccomme lle cunvene, accussì nun se sbagliano maje… Mo – ’ntiempo ’e pandemia – ce stanno paricchie dutture Balanzune, prufessurune e scienziate che ssanno tutto lloro ma che, quanno songo ’ntervistate, nu’ ffanno che rrepetere chello che ggià sapevamo, però cundicennolo cu ggranne protucopia. E nu’ mmanca pure Capitan Spaventa, nu spaccamuntagne che se crede chissacchì e sta sempre a ppuntà ’o dito contr’a quaccheduno e a mmenaccià sfracielle. Però ’sti mmascare nun ce fanno propio ridere e, primma o doppo, venarrà ’o tiempo ca sarranno…smascarate.