Tempo di lettura: 2 minuti

Nun me capita assaje spisso ’e accummenì cu ’o Presidente De Luca, però nun pozzo nià ca tene raggione quanno s’ ’a piglia cu “Allauìn”, chiammanno ’sta festa “stupida americanata”. Certamente ’o guvernatore nuosto ave nu pucurillo esaggerato, pe vvia d’ ’o sòleto vizzio sujo ’e sbafunià e ssettenzià.
“Ll’urdema fine ’e semmana ‘’nzerrarràmmo tuttecose ê ddiece ’e sera – dicette Vicienzo De Luca pe ttelevisione, tutto ’ncriccato – …Allauìn, chesta grossa idiozzìa, chesta fessa americanata…è nu monumiento a ll’imbecillàggene”.

Embé, ca se tratta ’e na ‘americanata’ è nu fatto, pure si ’e taliane ll’aveno fatta addiventà quase na festa nosta quanno ’mmèce Halloween, ca tene n’uriggene cèlteca assaje antica, nun ce azzecca cu ’e ttradizziune verace che tenimmo pure nuje pe Ognessante. Casumaje, nunn era opportuno ’nzurdà accussì na tradizzione ca nu’ cce appartene, sulo pecché ’a quacche ddecina d’anne cummerciante, prufessure ’e ’Ngrese e mass media ce stanno abbuffanno cu murticielle, mustricielle e ccocozze allummenate. ’E Mericane spenneno ogn’anno ’a bellezza ’e 3,3 meliarde ’e dollare sulo p’accattà ’e custume pe Halloween, accussì se capisce pecchè pure addù nuje s’è sveluppato nu mercato bello gruosso attuorno a ’sta festa pavana, che pperò fernette cu rrimpiazzà chelle nustrane.

Pe ttutta ll’Italia, ’nfatte, tenevamo ggià nu cuofeno ‘e feste che ffacevano parte d’ ’a tradezzione crestiana ’e annurà ’e sante e ppure ’e muorte, ê primme juorne ’e Nuvembre. Curiusamente, ce stanno tradezziune meridiunale c’ausano pure sìmmule che ce assumigliano, comme a Sserra san Bruno (’nCalàvria), addò ’a secule ’e guagliune vanno giranno p’ ’o paese cu na cocozza ’ntagliata comme na capa ’e muorto e cercano sorde d’ ’a gente cundicenno: “Mi lu pagati lu coccalo?”. A Ssan Nicandro garganeco (FG) songo sempe ’e guagliune ca, sempe ô primmo ’e Nuvembre, vanno tuzzulianno ê pporte pe ccercà riàle, dicenno: “Damme l’anema i morte, ca sinnò te sfascio la porta”. Chesto succede pure ô luntano Friule (addò fanno ’e ‘suche baruche’), ’nZardégna addò teneno ’a tradizzione ’e ll’animeddas (“Carchi cosa pro sas animas?” è cchello che ddiceno ’e cchiù piccerille), addò ’n’Emilia e ppure ’nSecilia ’e dulciere fanno ll’uossa d’ ’e muorte cu ppasta d’amménnule ’nzuccarata.
’Nzomma, nun tenevamo propeto besuogno ’e ’mpurtà Halloween a ll’America e ce putevanno fa’ abbastà ’e ffeste noste. Ma pare ca nun putimmo fa’ a mmeno e cupià chello che fanno ll’ate, pirciò scancellammo ’o coccalo calavrese e ‘’o rimpiazzammo c’ ’a cchiù grossa pumpkin mericana…. Cantava tanno Carosone: “Tu vuo’ fa ll’americano, ma sì nato in Italì/ siénte a mme nun ce sta niente ’a fa’ /okkei napulità”. So’ ppassate 75 anne ’a quanno ’e Mericane ce àveno ‘libberate’, però pare propio ca simmo nuje ca nun ce simmoancora libberate ’e lloro. E accussì ’e guagliune nuoste nun sapeno cchiù parlà napulitano o veneto, però parlano e sstudiano assaje ll’Ingrèse. Nun canosceno vie e mmonumiente ’e Napule o Firenze, però sapeno già ’e strate ’e New York e San Francisco. Nun fanno festa pe San Gennaro o Sant’Ambroggio, però nun pônno fa’ a mmeno ’e festiggià Halloween.
Forze pe na vota De Luca teneva raggione: cocozze vacante ’e ttenimmo già tropp’assaje, e pe ttutto l’anno…