Tempo di lettura: 3 minuti

Nun saccio si pure vuje ma io, passiànno’mmiez’a ttavuline, gazzebe e bbancarelle e scanzanno ’e mmachine parcheggiate a ddoppia e ttripla fila e ppure ’ncopp’ê strisce pedunale, spisso m’addimando: “Neh, ma ’e viggile addò so’ ffernute?”. A Nnapule, ’a terza cetà d’Italia cu quase nu milione d’abbitante, ’e guardie munecipale pareno overo scumparze. Cu cchello che sta succedenno e ccu tutt’ ’e rreole ordinanze e ddecrete pe vvia d’ ’o Coronavirùsse, nuje penzavemo ca ’nce sarriano state cchiù pperzone p’ ’e ffa rispettà, cuntanno aggente ‘e pulizzia statale, carabbiniere e gguardie municipale. E ’mmece ’o guverno e quacche presidente ’e Riggione se stanno ’ncapunénno a chiammà ati surdate ancora, pe ffa’ addiventà ’e vvie cchiù ssicure ma fernenno pe ffa’ fa’ a ll’esercito chello che nu’ lle spetta. Na bona parte ’e cuntrolle, ’nfatte, servono a ffa’ rispettà ’e rreole contr’ô virùsse (purtà ’e mmascarine, scanzà ’a carca e ssituazzione ammuinate, mantènere ’o distanziamento…). Ma pe cchesto nun servono surdate cu ffucile, casche e ggiubbotte, ma guardie statale e llucale.

Guardanno ô pizzo web d’ ’o Cummune ’e Napule, scuprimmo c’ ’a Pulezzia Municicipale teneva n’urganeco ’e 2.236 perzone (cumannante, diriggente, funziunarie, istrutture e gguardie) e ati 150 fra autiste, funziunarie amministrative e ttecniche. Stammo parlanno ’e quase 2.400 perzone pe na cetà cu mmeno ‘e nu melione d’abbitante: uno ogne 415 napulitane. Sapimmo ca cchiù ’e 800 ’e lloro teneno cchiù ’e 60 anne; ca 260 faticano sulo int’a ll’ufficie e c’ati 34o guardie teneno prubbleme ’e salute. Âmmo leggiuto ’ncopp’ê giurnale ca mo tenimmo pure na trentina ’e viggile cuntaggiate d’ ’o Covìdde e ate 170 mise aspartate pe ssicurezza. Pure si calculammo ca ’e guardie munecipale faticano ’ncopp’a dduje turne, cumunque s’avarrìa ’a assicurà nu servizzio cchiù decente. Però dint’a Pulezzia Lucale s’ausa pure ca ’e guardie s’hann’ ’a movere sempe duje a dduje, accussì ’o nummero inizziale vene smezzato ancora. ’Nzomma, luvanno ’e motocicliste e quacche pattuglia ca va giranno sulo cu ll’automobbile, pare propro c’ a vviggilà overamente guardie bastante nun ce stanno.
Eppure ’o Cuorpo ’e Pulezzia Municipale napulitano, c’ ’a storia che ttene, s’ammeretarrìa na sorta cchiù mmeglia. ’Ncopp’ ô pizzo-web cummunale steva scritto ca esso è ffiglio d’ ’o Cuorpo d’ ’e Guardie Municipale funnato ô 1861, quanno facettero ll’Unnetà d’Italia. Però chesta è una d’ ’e ffauzarìe ’e na storia cuntata ’a chi culunizzaje ’o Sud d’ ’a penisula taliana, cercanno ’e scancellà pure ’a memmoria d’ ’o Regno d’ ’e Dduje Sicilie. Isso, ’mmece, teneva n’amministrazzione accorta e n’urganizzazzione efficace e spisso assaje muderna. ’E Burbone, ô 1816, tenevano ggià nu funziunario, chiammato Primmo Eletto, e nu Sottocapo che s’occupavano d’ ’a Pulezzia urbana e rurale, facenno cuntravvenziune – ’nnanz’ ô Sinneco e ’o Judece ’e Pace – a cchi nun rispettava ’e llegge d’ ’a cetà. Ô 1821 istituettero ’e Guardie Civiche, pavate cu nna mesata scarzulella (5 o 6 ducate = 100-150 euro) e cche s’avevano pure prucurà ll’uniforme (giacchetta blù c’ ’o cullarino russo, cappiello tùnno cu ccuccarda rossa, patruncina a ttracolla ’e cuorio giallo). Però, ô 1827, Francisco II, pe vvia ca ’e cetatine nu’ ppavavano ’a tassa p’ ’e mmantènere, cagnaje legge e istituette ’o Cuorpo d’ ’e Guardie Urbane, nu servizzio ubbrecatorio e nu’ ppavato, na “…milizia civile […] che debbe ogni sua cura al mantenimento dell’ordine interno e alla sicurezza delle persone e delle sostanze dei cittadini”.
D’ ’o 1848 ’e guardie municipale addeventajeno cchiù mmilitare: avevan’ ’a vèstere na divisa e avevan’ ’a essere “istruite int’a ll’esercizzie militare”. ’Nfra 1850 e 1854, ’e guardie urbane rummanettero nu cuorpo paramilitare, scìvete ’a sìnnece e intenniente ’nfra chille ch’erano già pavate ’a cummune e ppruvincie, occupannose perzì ’e ‘pulezzia sanitaria’. Ô 1860 però arrivaje Garibbalde e ccagnaje tuttecose, custituenno ’o Cuorpo d’ ’e Riàle Carabbiniere ’e Sicilia. Grazzie ê Piemuntise ch’ ’e ttenevano ggià d’ ’o 1814 – se chiudette accussì ’o chirchio d’ ’a militarizzazione d’ ’e guardie ‘civiche’, tant’è ca pure mo recurrimmo ê surdate ’e ll’esercito pure pe ccuntrullà ’e vvie e applicà ’e llegge p’ ’a salute pubbreca. Pe ttramente, quanno truvammo machine parcheggiate ’ncopp’ ê strisce pedunale o addò ce avesser’ ’a sta’ sulo disabbele; quanno ’e spazzie pubbrece songo occupate abbusivamente o quanno nun veneno rispettate ’e rreole contr’ ô Covìdde, nun ce penzate propio c’arriva nu guardio municipale. Dicevano tanno ’e Rumane antiche: “Quis custodiet custodes?”. Napulitanamente: “E cchi guarda ’e guardie?” …