Tempo di lettura: 3 minuti

“Napule è mille culure…”. Accussì cantava Pino Daniele e ’sta canzona è addeventata quase l’inno d’ ’a cetà, che overamente tene n’immaggine chiena ’e culure, comme succede pure p’ ’a gente e ’a sapurita lengua nostra. Però quacche vvota, quanno leggimmo ’e giurnale, pare ’e vedé Napule cchiù comme na fotografia a gghianco e nniro o, pe ccità n’ata vota a Ppino, “nera a metà”. ’O ssapevamo già ca ’sta cetà è sempe stata chiena ’e cuntraddizziune, pecché stessa ’a storia soja è na sequenzia ’e fatte nobbele e ggroliuse, ma pure ’e sbenture e stierne. Però, pure si già sapimmo tutto, Napule riesce sempe a cce stupetià, pusitivamente o negativamente. Abbasta ’nfatte ca sfugliammo nu quotidiano e ttruvammo assaje nutizzie bone e mmalamente.


Pigliammo chillu spettaculo overo eccezziunale che s’è ttenuto ô Llario ’e Palazzo (che ccuntinuano a cchiammà ‘piazza del plebiscito’…), addò ’o San Carlo (uno d’ ’e triate liriche cchiù antiche e ’mpurtante d’ ’0 munno) ha miso ’nscena a ll’apierto na bella edizzione d’ ’a Tosca ’e Puccini, ’nterpretata ’a na suprano assaje famosa comme Anna Netrebko. Ma si chisto è ’o lato janco – che ce jenche ’e suddisfazzione – scurrenno ’o giurnale, ssempe a pproposeto ’e triate, capita pure ’e truvà na nutizzia assaje nera. ’O Matino, ’nfatte, ce fa sapé ca ll’Auditorium ’e Scampia è “inagibile e negato ai cittadini”. So’ ssicuro ca paricchie napulitane manco ’o ssapevano ca lloco ’nce steva nu bellu triato, che vvuleva essere ’o simbulo d’ ’a rinasceta ’e Scampia e cche, ô 2016, fuje ’ntitulato a Fabrizio De André. ’O guajo è ca, doppo n’anno, chillu triato nun teneva ancora l’impianto d’ ’e lluce e, cchiù ’e na vota, s’erano arrubbate l’attrezzature (mixèr, microfone, casce…), pecché nun ce stava manco na guardianìa. Doppo c’appicciajeno ’o campo lloro ô 2017, nu sacco ’e fameglie rom fujeno sistimate dint’a ll’auditorium, libberato però sulo 16 mise doppo, carrecanno ’ncopp’ô cummune nu danno ’e centinara ’e migliara d’euro. Chella struttura, pure cu quacche ristrutturazzione, rummane accussì ancora inaggibbile. Facimmo n’ato esempio. Già d’ ’o mese ‘e marzo, stanno arrivanno a Nnapule d’ ’a Spagna ’a bellezza ’e vinte triene nuove-nuove p’ ’a linea 1 d’ ’a Metropolitana. Luonghe 108 metre, capace ’e 1.200 passiggiere, muderne silenziuse e spazziuse, cu ll’impianto ’e cundizzionamento ’e ll’aria e ppure cu ’e puoste p’ ’e ccaruzzelle pe ddisabbele. S’è pprevisto ca passarrà nu treno ô mmassimo ogne sette minute e se capisce buono ca sarrà nu cagnamiento assaje ’mpurtante p’ ’a gente c’ausa (o che vurrìa ausà…) ’e traspuorte pubblece ’mmece d’ ’e mmachine. E pperò ’ncopp’a ’sta sbrennente rivoluzzione d’ ’e nuove triene (janche…) ’e Metronapoli passa ’a sòleta nuvula nera ’e nu servizzio che, pe mmo, cuntinua a ttené nu cuofeno ’e prubbleme. Rummane, ’nfatte, ’o ggiallo d’ ’e viecchie triene gialle, cu cchiusure anticipate, fermate all’intrasatta d’ ’a circulazzione, vetture zuzzose e ’nzevate, affullamiente e male servizzie comme quanno, ô mese passato, nu treno se fermaje ’e bbotto e 50 passeggiere s’ânn’avuto ’a fa’ a ppede tutta a galleria ’nfra Museo e Mmaterdei…


Sfuglianno ’e giurnale venimmo a sapé pure ca na giovane ’ngegniera napulitana, cercatrice all’ENEA ’e Puortece – sta ’mmiezo ê 40 cchiù mmeglio taliente nuoste, selezziunate d’ ’a revista Fortune Italia. Ati nnutizzie janche ce fanno sapé c’ ’a squadra chirurgeca ’e nu spitale d’ ’a pruvincia ’e Napule ha ffatto n’operazzione a ddistanza int’a n’atu spitale, ausanno nientemeno nu robbotte. Leggimmo pure ca, ô spitale pediatrico Santobono che sta ô Vommero, stanno spremmentànno nu bellu sistema pe scanzà l’uso d’ ’o ggesso pe ssanà ’e ffratture che spisso se fanno ’e ccriature cadenno. Se tratta ’e nu tutore perzunalizzato, stampato a 3D, che finalmente darrà na risposta cchiù adatta ê 15.000 guagliune/one che, og’anno, fernesceno ô pronto succurzo d’ ’e Santobono. Ma però ’e giurnale ce parlano spisso d’ ’e ccose overamente nere che ccapitano dint’ê spitale nuoste: paziente lassate pe gghiuorne ’ncopp’ê lettighe; pariente scrianzate e vviulente che vvatteno ’e miedece e scassano tuttecose; prontesuccurze che, dopp’ ’o Covìd, nun arapeno ancora; ’nfermiere che pprutestano pecché nun so’ trattate buono, etc. etc.
Janco e nniro, janco e nniro… se putarrìa cuntinuà ancora a lluongo, però nun me pare ’o caso. È mmeglio a llassà ’a parola ancora a Pino Daniele, pur’isso miso ’nmiezo a na pulemica inutele, ’a jacuvella ’ncopp’ô murale c’ ’a faccia soja che Jorit aveva pruggettato p’ ’a facciata vacante d’ ’o grattacielo d’ ’a Stazzione Centrale. Na bell’idea p’arricurdà Pino nuosto, però nu poco sballata, per vvia ca chillu ‘Palazzo Alto’ è n’opera architettonica a ssé, e poco ce azzecca pure cu ’e ffinaletà ’e ‘rigenerazione sociale’ d’ ’a Street Art. Certo, pure si ’nce stanno bone raggione pe ffermà stu pruggetto, Pino ce sarrà rummaso malamente. Pirciò spetta a isso ’e cuncrudere, cu ’e vierze pigliate ’a ‘Nero a metà’: «A mme me piace ’o blues e tutt’ ’e journe aggi’ ’a cantà’ /pecchè so’ stato zitto e mmo è ’o mumento ’e me sfucà / Ma po’ ’nce resta ’o mare e ’a pacienza ’e suppurtà / ’a gente ca cammina /miez’ â na via pe sbraità / i’ vengo appriesso a tte pecchè so nato ccà / saje che sso’ nniro ma nun te pozzo lassà…».