L’urdemo rapporto ’e Legambiente ce fa sapé ca in Campania ’nce stanno 812 rifiute p’ogne 100 metre ’e spiaggia

’Sti vierze, comme succede sempre quanno a Nnapule se parla d’ ’o mare, so’ cchiene ’e puisìa. O almeno succedeva na vota, quanno se scriveva: “…l’onna chianu chiano / vasa ’a rena e ppo’ scumpare” (G. B. De Curtis e E. De Curtis, 1011), e sse senteva dicere ’stu pruverbio: “Chi a ffemmene crede, ara ’o mare e semmena ’a rena”. Però, cu ttutte ’e prubbleme che cce stanno pe mmezza d’ ’o Coronavirùs, mo parlà ’e mare e spiagge purtroppo è addeventato n’argumento assaje delicato e ppe nniente puetico.
Distanze ’e sicurezza ’a rispettà, puoste ’a prenotà, mascarine chirurgeche ammescate cu ’e mmascare pe nnatà sott’acqua, ammacaro pure docce cu ’o ggell disinfettante… ’Nzomma, nu bellu casino, addò chille che ttenevano ’e cuncessiune p’ ’e spiagge hanno avuto pure nu sacco ’e prubbleme pe s’adattà ê rreole nove. E pperò mo se stanno rifacenno bbuono d’ ’e spese fatte, a ppreggiudizzio d’ ’a ggente che se vurriano fa’ quacche bbagno a mmare, ma nun trovano cchiù na chiajulella libbera e hann’ ’a pavà nu sacco ’e denare sulo pe llucà nu ’mbrellone e quacche seggia.


Se diceva tanno ca, pe vvia ca ’o mare è ’e tuttequante, nisciuno se puteva permettere ’e privatizzà ’stu bbene cummune. Eppure ô 2018 Legambientece facette sapé ca in Italia – che ttene 8.000 chilometre ’e coste – tenevemo già riggione addò ’o 90 pe cciento d’ ’e spiagge erano addiventate private. ’Nfatte, scrudenno Puglia Sardegna e Llazzio cchiù virtuose, chella parte d’ ’o litorale nuosto ch’è stato lassato libbero va d’ ’o quaranta ô zzero pe cciento. Ato ca “deritto ô mare e dd’ ’o mare”, comme predecava na campagna ambientalista che V.A.S.prencepiaje ô 1996!…
C’ ’o prubblema d’ ’o Covìd, po’, ’ncopp’a pparecchie spiagge che ancora libbere mo nun ce putimmo jì cchiù libberamente, pecché cierte cummune, visto ca ’e puoste so’ llimitate, pensajeno bbuono ’e lle riservà sulo p’ ’e cetatine lloro. N’atu bruttu guajo p’ ’e spiagge taliane songo ’e ttunnellate ’e munnezza che ’nce putimmo truvà abbandunate. A vvasà ’a rena, oramaje, nun so’ cchiù sulo ll’onne, pecché ’nce truvammo overamente nu ppoco ’e tutto, traspurtato d’ ’o mare ma pure scarrecato ’a ggente zuzzosa e ssenza rispetto. L’urdemo rapporto ’e Legambiente ce fa sapé ca in Campania ’nce stanno 812 rifiute p’ogne 100 metre ’e spiaggia (654 si parlammo ’e ll’Italia sana). Chesto vene a ddicere ca, si è overo ca ogne ’mbrellone cu 4-5 perzone ha dda a fforza tené attuorno nu spazzio quase ’e cinche metre, a ogne pposto spettano na quarantina ’e rifiute, dicimmo… otto/diece pe ccranio…!
Si po’ vulite sapé pure qua’ specie ’e munnezza se trovano ’ncopp’ ê spiagge d’ ’a Campania infelix, l’indaggine ‘Beach Litter’ ce conta ca se tratta ’e muntune ’e scatule, piatte e ppusate ’e plasteca; cuòfene ’e mezzune ’e sigarrette; lignamme e scàrreche varie d’ ’e fravecature e, cosa sicuramente nova, guante ’e gomma e mmascarine varie. ’A plasteca naturalmente fa ’a parta d’ ’o… gallo ’ncopp’â munnezza, pecché è l’88%’e tuttecose; lle veno appriesso ’e metalle (3,3), ’o lignamme (2,4) e bbrito e ppurcellana (2,3). ’O rapporto ’e Legambientece parla d’ ’a Campania, però ’o riesto d’’e ccoste taliane nun stanno cchiù mmeglio, pecché nun ce stanno spiagge addò nun truvammo spase mezzune, butteglie ’e plasteca e bbuste p’ ’a spesa.
Pe cchesto, nun abbasta descrivere pueticamente ’o mare ’e Margellina, Pusilleco e Ssurriento oppure cantà ”Licola sotto la canicola” e nemmanco putimmo rivendicà ’o deritto d’avé spiagge libbere pe tuttequante, si nun ce sapimmo purtà comme perzone educate e nu’ rrispettammo ’o mare nostrum.
Nu’ sse chiamma accussì pecchè ’nce putimmo scrianzatamente fa’ tutto chello che vvulimmo, ma pecché è nu bene comune e n’ambiente ’a pruteggere. Diverzamente, Covìd o non Covìd, pe cce fa nu bagno nun ce aspettano cchiù spiagge private o pure lide mappatella, ma sulo na zuzzosa e ppericulusa… Munnezzella Beach!