Int’a ’sti juorne âmmo sentuto alluccà p’ ’o munno sano: “Black lives matter!”, che vvo’ dicere:”’E vvite d’ ’e Nire ce ’mportano!”.  Doppo l’accisione ’e George Floyd a Mminneapolis, infatte, s’è scetata ’a cuscienza d’ ’a ggente, e ’stu allucco contr’ ‘a barbarità d’ ’o razzìsemo e ’a viulenza d’ ’e pulizziotte è nu signale forte e cchiaro ca ’sti ccose nunn àveno cchiù ’a succedere. Però viulenza e razzìsemo nun stanno ’e casa sulo int’ ’e State Aunite d’America, pirciò ’sta battaglia ce attocca a ttuttequante, pecché si nun ce sta l’eguaglianza nun ce pônno sta’ nemmanco ggiustizzia né ppace.

Pure d’ ’e pparte noste – ’o ssapimmo – ’e vvite d’ ’e nire e ’e l’ati immigrate spisso contano ’e meno… Però nun ce âmmo scurdà ca nu ssempe ’o razzìsemo è nu fatto ’e pelle cchiù o meno scura. Abbasta ca penzammo ca so’ ppassate 160 anne ’a chella famosa ‘Unnetà d’Italia’, però nuje tutto simmo meno ca eguale… ’O Sudd – che avett’a agliottere ’a cunquista e ssuppurtà ’a culonizzazzione d’ ’e Piemuntise – fuje maletrattato e ’a ggente meridiunale, curnute e mmazziate, fujeno pure cunziderate nu prubblema, nu ’ntuppo ’mpicciuso, nu freno tirato ô sviluppo economico e ssuciale d’ ’a nazzione.

Int’a ’sti juorne, m’è ccapitato ’e leggere na storia napulitana che ppoca ggente canosceno. L’assuciazzione Sud e Civiltà, cu nu video cummentato ‘a Michele Capriello (http://controcorrentedizioni.eu/video-recensione-di-sud-e-civilta-al-nostro-libro-carlo-gentile-un-napoletano-tra-gli-indiani-damerica/) facette ’a recenzione ’e nu libbro, scritto ’a Armando De Simone e ppubblecato ô 2015 ’a ‘Controcorrente’.  “Carlo Gentile. Un napoletano tra gli Indiani d’America” cuntava na storia recenale e signifecativa, si penzammo ca succedette quanno ’o regno d’ ’o Sudd fuje arredutto a pperiferia e ccolonia d’ ’e Nurdiste ’taliane.

Carlo Gentile nascette a Nnapule ô 1835 ma se nne jette ô 1856. Doppo viaggiato a ll’Australia, ê Caraibi e ô Sudd’America, arrivaje a San Francisco, addò se mettette a ffa’ ’o fotografo. Però sulo quanno jette ô Canada accumminciaje a ccunziderà ’a fotografia comm’a nu strumiénto pe ccanoscere e ffa’ canoscere cultura e ttradizziune d’ ’e Pellirosse, l’Inniane ’mericane. Ô 1971 (quanno a Nnapule, passato ’o culera, Depretis e Nicola Amore stevano facenno ’o ‘Risanamento’ d’ ’e quartiere antiche, scaccianno ’a lloco ’a povera ggente) Gentile se truvaje a ppassà pe Adamsville (AR), addò na rocchia ’e bannite pellirosse stevano vennenno cierte guagliune arrubbate ê ffamiglie loro. Fuje accussì ca ’o fotografo napulitano –che s’era appassiunato â cultura d’ ’e Pellirosse – ‘accattaje’ pe 30 dollare ârgiento nu piccerillo apache, che tteneva cinche anne e se cchiammava Wassaja (che vvo’ dicere ‘signale’).

Isso le dette nomme Carlos Montezuma e s’ ’o ccrescette comm’a nu figlio. ’Stu guaglione viaggiaje c’ ’o pate aduttivo pe ttutt’ ’e State Aunite, addò Gentile raccugliette nu cuofeno ’e materiale fotografico ’ncopp’a ll’Inniane. Quanno stevano a Chicago, Carlos, che tteneva 12 anne, spalèfecaje quanto era intelliggente e ccapace. Pirciò, doppo c’ ’o pate ’o ffacette studià pe ddoje anne cu nu pastore battista, ’o guaglione fuje ammesso a ll’Unneversità ’e l’Illinois e ô 1889 (a 33 anne) addeventaje ’o primmo Inniano ‘mericano duttore ’e medicina. Dopp’ ’o 1900, però, Carlos/Wassaja jette a ll’Arizona, addò decidette e s’occupà d’ ’a ggente soja.  Addiventaje accussì nu leader d’ ’a cummunità pellirossa e addefennette ’e deritte civile ’e l’Inniane ‘mericane.

Pure Gentile êva cuntinuato a ffà ’o fotografo, raccuglienno documiente ’ncopp’a cchelle tribbù c’ ’a ggenteWASP (janca, angro-sassone e pprutestante) êvano scamazzato, trattannole comm’a sservaggie e arrubbannole ’a terra.  Carlo murette a Chicago a mmanco sissant’anne, sunnanno forze ’a terra addò partette e addò pure ’e Napulitane erano addiventate ospite…â casa loro. È na bella storia che ffa penzà e s’ammeretava d’essere canosciuta, pecché pure mo ’a ggente nosta s’ha dda riscattà, pe rrecupetà ’a dignità soja.

Ma siccome nuje napulitane propio nun ce ’a facimmo a nnu’ ppazzià pure cu ’e ccose serie, cuncrudo arricurdanno ca tenimmo pure na canzona spassosa che pparla ’e l’Inniane. ’A scrivette ô 1957 Renato Carosone, ’a cantava Geggé Di Giacomo e se chiammava: “’O Pellirossa”:

“So’ Katumba ‘o pellirosse/ tengo ‘a lancia e ‘a pippa ‘e ggesso / ccà nisciuno me fa fesso / songo ‘o meglio d’’a tribbù // Chi mme chiamma Freccia Nera / chi mme chiamma Penna Gialla /Uh, all’anema d’ ’a palla / nun capisco niente cchiù ./ Toro Seduto ‘a ccà /Cavallo Pazzo ‘a llà / e attuorno a mme se metteno a bballà.// So’ Katumba ‘o pellirossa, / pellirossa americano /mo me spasso a ffa’ ll’Indiano / cu ‘o russetto di mammà // “Quando la quinta luna spunterà / tu viso pallido morirai! / Quando della jena sentirai l’ululato…” / chi ha avuto ha avuto e chi ha dato ha ddato.. » 

A pparte ’e scherze, allicudammoce c’ ’a quistione meridiunale’ – comm’a cchella d’ ’e Nire o d’ ’e Pellirossa – nun s’è risolta ancora. Pe cchesto, ‘mmece e cantà sempe “scurdammoce ’o passato”, dammoce ’a fa’ tuttuquante pe ccagnà ‘sta diseguaglianza e pe lluttà contr’a ogne fforma ’e razzisemo.