lungomare affollato

È overamente nu periodo strevuzo. ’A doje mise pare quase c’ ’o munno s’è ffermato: s’è astregnuto d’ ’o punto ’e vista giografeco e s’è arredutto ’a chillo d’ ’a narrazzione d’ ’e fatte.  Però ’stu curnuto ’e coronavirusse – ’mmiez’a ttante guaje che s’è ppurtato appriesso – forze facette pure na cosa bona. Ce ave fatto sentì tuttequante perzone umane, cetatine d’ ’o munno, no taliane, francise, cinìse, mericane o brasiliane. Perzone che sse credevano putiente, ma erano fraggile, suggette ’a nu cusariello invisibbile che ce po’ pure atterrà, stutannoce all’intrasatto comm’a ccannele, e che comunque ce ave custretto a cciuncarce â casa comme carcerate, cagnanno ’e subbeto ’a vita nosta. È stato comme si na fattucchiara ce avesse fatto na fattura…Bell’e bbuono so’ scumparze mure e ccunfine. ‘E vvie ’e Madrìd e Nnova York parevano chelle ’e Milano o Tokyo, cu ppoca ggente che ppassavano, apparicchiate cu gguante e mmascarine e ccercanno ’e scanzà a ll’ate. ’Nzomma, cu ddiviete ’e circulà, puteche ’nzerrate, scole vacante e stabbilimiente fremmate, ’sti ccetà fantaseme s’assumigliavano, però pareva d’essere capitate dint’a nnu film ’e fantascienza…

Mo ’e ccose stanno cagnanno. ’A ggente ’e tutte l’età – a Pparigge comm’a Hong Kong – nun ce ’a fanno cchiù a sse sta’ sode, senza faticà, senza ascì ’a casa e sse ’ncuntrà cu ammice e ppariente. E ppure ’sta ‘fase 2’ ce sta ffacenno sentì nu poco assuciate â ggente ’e ll’ati paise, che tteneno ’e suocce prubbleme nuoste, pure si ’nce sta chi accummencia primma e cchi doppo a tturnà â ’nurmalità’. E ggià: ’a nurmalità… ’Sta frennesia ’e turnà a ccampà comm’a primma ce sta cuntaggianno a tuttequante peggio d’ ’o coronavirusse. ’Ncopp’a ttutto, ce sta facenno scurdà ca propio chella ‘nurmalità’ fuje ’a causa d’ ’e guaje che ttenevemo ggià e cche cce stanno venenno ’ncuollo. Comme scriveva nu giurnalista spagnuolo, Angel Luis Lara, ’o periculo cchiù gruosso è cchello ’e cunziderà ’stu virusse comm’a nnu fenomeno a ssé, senza storia e ssenza nu cuntesto suciale, econommico e cculturale. Fatt’è c’accussì arresecammo a tturnà a cchella fammosa ‘nurmalità’ ch’era overamente ’o prubblema ’e nu munno addò l’interesse cummanna e ’o bbene cummune va scumparenno.

Però gaurdanno ’ncopp’a ggiurnale, tivvù e ‘social media’ pare ca l’unneca cosa che c’ha dda ’mpurtà è comme putimmo ascì subbeto subbeto ’a ’sta fattura. Comme putimmo scancellà mo mmo nu periodo addò, stuorte o muorte, âmm’avuto ’a ce fermà, pe rrepiglià ’a ccorrere addereto ô ‘prugresso’, â ‘crescenza’ ’e l’economia e – pe quaccheduno – pure â putenzia militare. ’Nzomma, pare ca chello che cc’è ccapitato nun ce ave ’mparato propeto niente. ’A mala fattucchiara ’e l’Est – comme ddint’â storia d’ ’o Mago ’e Oz – è stata luvata ’a miezo e pputimmo finalmente turnà a ssecutà chillo mudello ’e sviluppo che cce piace tanto… Che ffa ca stammo scarrupanno l’unneco pianeta che ttenimmo? Che cce ’mporta si quase nu meliardo ’e crestiane stanno murenno ’e famma addò ’nce sta chi more pecché magna troppo assaje e mmalamente? Che cce po’ ’mpurtà ca – int’a dduje anne (2017-18) – sulamente int’a ll’Affrica, l’Asia e ’o Medio Oriente – pe gguerre e gguerriglie murettero nientemeno 193.000 perzone?

Nu grand’ommo comme Alex Langer scrivette tanno c’avarriamo ’a cagnà nu mudello ’e sviluppo che ppare abbasato ’ncopp’ô mutto latino ’e l’Olimpiade: “cchiù vveloce – cchiù àuto – cchiù fforte”. Embé, so’ ppassate 30 anne ma stammo arraggiunanno ancora comme si ll’uommene gariggiassero senza pace p’arrivà primme a nna curzera addò chille che venceno se pigliano tuttecose. Ato ca “cchiù cchiano – cchiù pprufunno – cchiù llieggio”!  Dopp’ ’a pandemia s’accummencia n’ata vota comme primma, senza guardà quanto ce po’ ccustà e quantu tiempo ancora ’a Terra ce suppurtarrà… Tornano a mmente chille fammuse vierze ’e chill’atu grann’ommo che se chiammava Rafele Viviani, che ppareno scritte mo mmò:

«Si vire a ll’animale / che stanno ’ncopp’a terra/ tu pienze sempe a mmale,/ tu vide sempe guerra! […] Largo e ttunno /chisto è ’o munno: /pure ll’uommene, se sa /s’hann’ ’a massacrà. / Che l’afferra / ca na guerra /ogne tanto s’ha dda fa’ ? / Forse pe’ sfullà ?!/ So’ ’e putiente, /malamente, / ca cchiù ’a vorza hann’ ‘a ’ngrassà, /senz’ave’ pietà. / ’O prugresso? /More ’o fesso! / Ih che bbella civiltà! / Che mmudernità! […] (Ma) c’è cara ’a vita nosta, /pirciò merita rispetto. /E vvedimmo, pe ’stu fatto, / ’e campà cu ’a legge ’e Ddio! / ’Nnanze a Ddio nuje simmo eguale:/nun ce stanno “tu” e “io”./ Ma però ’e Cumandamente  / se rispettano? Nun sempe! /  E sse sape, ’o munno è ttristo. / Chisti ccà so’ brutti tiempe. /E ma allora,  ’o munno è ttristo /e nnisciuno ’o ppo’ cagnà? /Mo nce vo’, ’e Cumandamente / nun se ponno rispettà…?»

Sperammo ’mmece ca ’stu ‘munno tristo’ ’o pputimmo cagnà, pure pecché si ’o Coronavirusse c’ha fatto capì quaccosa è ca “c’è ccara ’a vita nosta”. Ma, ’ncopp’a ttutto, c’avarria avuto ’a ’mparà ca overamente “nun ce stanno ‘tu’ e ‘io’”…