Cchiù ccure e ppulizzìa, no pulizziotte!

47

’Nce sta nu virusse cchiù ppericuluso ’e chillo c’ ’a Curona. Int’ ’e ssituazziune d’emergenza se va spannenno e ccuntaggia â ggente ffacenno addiventà l’aria pesante, mutriosa e ammaluta. Sto’ pparlanno ’e nu tuosseco ’mpustatore, che vva serpianno e cche, chianu chianu, arriva a ’nfettà pure ê pperzone che nnun n’avarrian’ ’a essere suggette.  ’O virusse ’e l’autoritarìsemo ’nzisto e vviulento, ’nfatte, cerca l’accasione justa pe sse spalefecà, pruvucanno nu stato addò simmo tuttequante spiunate, secutate e ccuntrullate, naturalmente a nnomme d’ ’a ‘pubbleca sicurezza’…  Se capisce bbuono ca na situazzione d’emergenza sanitaria, c’ave cagnato ’a vita nosta ’e na manera accussì ggrossa e ffuta, nun puteva ppassà senza cunsequenzie pure p’ ’e rrelazziune suciale e ppuliteche. Però ’a nu poco ’e tiempo ’a ggente – cundannate a sta’ ’nzerrate â casa – stanno addeventanno semp’ ’e cchiù abbascuse e afflettive. L’appaura ’e ffa addeventà temmuruse, suspettuse e scunfidente. ’O riseco ca chille che nu’ rrispettano ’e lémmete stabbelite pe llegge putarrìano cuntaggià a ll’ata ggente sta trasfurmanno perzone aggarbate e ggentile int’a ggiustizziere tuoste e spiatate.

 E accussì ’nce sta cchi vo’ cchiù assaje cuntrolle ’e Pulizzìa e cchi adderittura va truvanno ê surdate ’mmiez’ ’e vvie. ’Ncopp’ê social leggimmo ’e ccose cchiù vviulente, addò ’a ggente va cercanno ca chille che vanno passianno p’ ’a via senza rispettà ’a legge hann’a essere tuppetiate cu ’e mmazze, pigliate c’ ’o scurriato, fucilate e nnientemeno abbruciate cu ’e sparafiamme! Sìnnece e ppresidente riggiunale nun perdettero accasione pe sparà ammenacce terribbele, cu ll’intenzione ’e appaurà ê cetatine lloro cchiù ‘ncusciente faccetuoste e smargiasse, cu ll’intenzione ’e ccuntrullà ’a ssituazzione. ’O cchiù ’nzisto fuje ’o ‘guvernatore’ d’ ’a Campania, De Luca, che se facette ascì ’a vocca ’sti pparole: “È arrivato ’o mumento ’e ’nzerrà tuttecose e ’e militarizzà a ll’Italia […] Avimmo addimannato ’e ce mannà ’e fforze armate [..] Nu’ pputimmo ffa’ a mmeno ’e nu cuntrollo militare, danno putere eccezziunale ê fforze ’e ll’ordene”.

Pure ’a ggente commune, però, se vanno cummencenno ca nunn abbastano ’e cuntrolle e cca ce vônno ’e surdate, pecché – comme scrivette quacche giurnale e va dicenno quacche cummentatore – stammo ’nguerra, pirciò sservono legge speciale e pputere eccezziunale. Però chi parla accussì nun fa cunto ca Napule è na cetà assaje difficele, cu nu cuofeno ’e prubbleme suciale, comme na grossa dissoccupazzione e tropp’assaje fameglie arredutte a ccampà int’ ’a nu vascio. Pe nnu’ pparlà d’ ’a ggente c’â casa nun ce po’ sta’ pecché nunn ’a tene e ccampa ’e lemmosene ’mmiez’a na via… Int’a riggione Campania ô 2018 ce steva nu tutale d’ ’o 20,5% ’e dissoccupate e cchiù d’ ’a mmità d’ ’e ggiuvene (15-24 anne) che nu’ ffaticavano. Sulo a Nnapule, l’anno passato se cuntavano 1,5 guaglione ’ncopp’a cciento che nnu’ gghiévano a scola, abbituate a zzunzulìa p’ ’e vvie, ammacaro currenno a ddoje p’ ’e viche ’ncopp’a nu mezzo. Ma overo se penzavano c’abbastava nu decreto pe ttené ’nzerrate â casa pe nnu mese a ttuttaquanta ‘sta ggente?

Vanno dicenno ca nun ce stanno cuntrolle e ca ’nce vônno ’e surdate pe ffa’ rispettà ’a legge. Però s’avarrìa ’a ’nfurmà â ggente – e ppure ô ‘guvernatore’ nuosto… – ca, facenno ’e cunte, ’nCampania già tenimmo ’a bbellezza ’e 22.600 aggente ’e pulezzia judizziaria e cca 14.100 ’e lloro (Carabbiniere e Ffinanziere) songo ‘militare’. Si cuntammo pure ê 900 surdate ’e l’Asercito che ggià ’nce stevano pe ll’operazzione ‘Strade Sicure’ e ll’ati 100 mannate mo, arrivammo a 23.600 aggente ’e pubbleca sicurezza: 4 p’ogne 1.000 cetatine d’ ’a Campania!  Int’a nna cetà comm’a Nnapule tenimmo pure 2.000 persone d’ ’a Pulezzia Munecipale che, summate cu nu quinto e mmiezo ’e ll’aggente riggiunale, fanno 6.300 uommene. Chesto vo’ dicere ca ce se stanno 7 pulizziotte p’ogne 1.000 abbitante: prupurzionatamente, cchiù ’e Nuova York o ’e Londra (4 p’ogne 1.000 abbitante).

Passajeno 350 anne ’a quanno G. B. Basile scrivette int’a una d’ ’e fammose  nuvelle soje: “Tre virtù principale de lo sbirro: abbista, secuta e afferra”. Embé, già tenimmo nu cuofeno ’e ggente che ffanno ’e pulizziotte pe mmestiere. Nun ce servono giuvinotte cu ll’uniforme e ll’arme ’e guerra ‘mmiezz’a via, che nun ponno ‘secutà’ e nemmanco ‘afferrà’, pecché nun l’attocca e ppecché quase sempe stanno ’mpalate a ffà ’a guardia fissa abbecino ê bblindate lloro. Nun vulimmo penzà ca ’e surdate pônno sservì, ’mmece, pe mmantènere l’ordine pubblico, però stammoce attiente a ‘mmilitarizzà l’Italia’ si overo ce tenimmo â democrazzia nosta. A nnuje ce servono dutture, prufessure e assistente suciale – no surdate – int’a na succità addò pure mo, comme tanno scrivette  Viviani: “Una è ’a guerra ca ce spetta / e purtroppo l’îmm’a fa’ / chella llà ca tutte’ ’e juorne / se cumbatte pe ccampà”.